ƆKƆNDƆ 16
Isaka ambokondja wadi l’ɔlɔlɔ
ONDE wɛ mbeyaka omoto lele l’osato ɔnɛ? Lokombo lande Rɛbɛka. Ndo pami kayandaye dia ndjohomana lande ko: Isaka. Nde ekɔ lotatshu dia tonga wadiɛnde. Woho akɔna wakasalema dikambo sɔ na?
Mɛtɛ, she Isaka le Abarahama akalangaka kondjɛ ɔnande wadi l’ɔlɔlɔ. Nde konanga Isaka tshuka ɔmɔtshi a l’atei wa amato w’Ase Kanana, dikambo anto akɔ wakatɛmɔlaka tozambizambi ta kashi. Omalɔkɔ, Abarahama akelɛ okambi ande ndo akawotɛ ate: ‘Dimi nangaka wɛ kalola lɛnɛ ele ewotɔ ami la Harana kele totshuke ɔnami Isaka wadi.’
Kem’edja okambi w’Abarahama akɔsɛ ponda dikumi ndo akasale lɔkɛndɔ l’otale. Lam’akandakome suke la lɛnɛ akadjasɛka ewotɔ w’Abarahama, nde akemala la ɛtɛkɔ kɛmɔtshi. Aki la dikɔlɔ, wonya watoyakaka amato wa l’osomba dia ndjotahola ashi l’ɛtɛkɔ. Ko okambi w’Abarahama akalɔmbɛ Jehowa ate: ‘Omoto layombisha ashi a nnɔ ndo layɔnɔsha ponda, kayale ɔnɛ lamboyɔsɔna dia ndjâla wadi a Isaka.’
Kem’edja Rɛbɛka akaye dia ndjotahola ashi. Lam’akɔlɔmbɛ okambi ashi a nɔ, nde akawosha. Ko nde akatɔsa ndo ashi akina dia mbisha ponda tshɛ yakomanɛ weodi. Ɔsɔ aki olimu wa wolo efula nɛ dia ponda nɔka ashi efula.
Lam’akashidiya Rɛbɛka sala ɔnkɔnɛ, okambi w’Abarahama akawombola lokombo la she. Nde akawombola nto dia kana nde kokaka ndala lo luudu lawɔ. Nde akate ate: ‘Betuɛlɛ mbele mbapa, ndo luudu lekɔ lakaso la wɛ ndala.’ Okambi w’Abarahama akeyaka ɔnɛ Betuɛlɛ ekɔ ɔn’aki onango Abarahama le Nahɔra. Omalɔkɔ, nde akakusɛ adwe ndo akakaloya Jehowa losaka lo woho w’ɔlɔmbɔdinde laka wanɛ w’otɔ l’Abarahama.
Ko l’otsho, okambi w’Abarahama akatɛ Betuɛlɛ ka she Rɛbɛka la Labana l’ɔnango ɔkɔkɔ w’oyelo ande. Vɔ tshɛ wakangɛnangɛna dia Rɛbɛka ntshɔ lande ndo tshukana la Isaka. Kakɔna kakate Rɛbɛka lam’akawawombola na? Nde akate ate: ‘Eelo,’ nde aketawɔ dia ntshɔ. Ko, wedi a pindju, vɔ wakɔsɛ wa ponda ndo wakatatɛ lɔkɛndɔ l’otale dia kalola oya la Kanana.
Lam’akawakome, aki la dikɔlɔ. Rɛbɛka akɛnyi pami kɛmɔtshi ayasembola ekolo l’ekambɔ. Pami kakɔ aki Isaka. Nde akangɛnangɛna dia mɛna Rɛbɛka. Nyango le Sara mala mvɔ ambeta ɛnɔnyi esato, ko nde aki l’olengolengo efula dia dikambo diakɔ. Koko, kakianɛ Isaka amboyolanga Rɛbɛka efula, ko nde akayonga l’ɔngɛnɔngɛnɔ nto.