ƆKƆNDƆ 25
Nkumbo k’otondo ambonɔ l’Edjibito
YƆSƐFU kokoka keketsha otema edja nto. Nde akatɛ ekambi ande tshɛ dia vɔ tomba oma lo luudu. Lam’akandatshikala l’anango ato, Yɔsɛfu akatondɔ la delo. Sho koka fɔnya woho wakâmbe anango nɛ dia vɔ kombeyaka bonde kalelande. Ko nde akayokitɛ la mbatɛ ate: ‘Dimi Yɔsɛfu. Onde na, papa kami eke la lɔsɛnɔ ondo?’
Anango wakâmbe hakoke ndo vɔ kokoka tɛkɛta ndoko dui. Wakoke wɔma efula. Koko Yɔsɛfu akawatɛ ate: ‘Nyusukane lalemi lam’alanganyu.’ Etena kakawasukana, nde akawatɛ ate: ‘Dimi ɔnangɛnyu Yɔsɛfu lakanyasondja l’Edjibito.’
Yɔsɛfu akatetemala mbatɛ woho w’ɔlɔlɔ ate: ‘Tonyoyatshumuyake di’ɔnɛ nyakasondja lendo. Ekɔ mɛtɛ, Nzambi mbakatome l’Edjibito dia mbitsha nyumu y’anto. Farawɔ ambombetɛ owandji wa wodja w’otondo. Kakianɛ, nyusamanya, nyutshu le papa nyotowote ngasɔ. Ndo nyowote aye ayodjasɛ lendo.’
Ko Yɔsɛfu akambamɛ anango lo kingo, akanonana lawɔ ndo akakumbatɛ vɔ tshɛ. Etena kakoke Farawɔ ɔnɛ anango Yɔsɛfu wamboya, nde akatɛ Yɔsɛfu ate: ‘Tshikawɔ wɔsɛ pusupusu kele watɔshi shɛwɔ la nkumbo yawɔ yalendo. Dimi layowasha kɛtɛ yoleki dimɛna l’Edjibito w’otondo.’
Ko vɔ wakasale ɔsɔku. Nyekɔ lo mɛna lanɛ Yɔsɛfu ambohomana la she etena kakandaye l’Edjibito la nkumbo kande k’otondo.
Nkumbo ka Jakɔbɔ kakayokomaka woke efula. Jakɔbɔ l’anande l’ekana ande tshɛtshɛ waki 70 lam’akawonɔ l’Edjibito. Koko vɔ waki ndo la wa wadi ndo ekambi efula. Vɔ tshɛ wakadjasɛ l’Edjibito. Wakawaetaka Ase Isariyɛlɛ dikambo dia Nzambi akakadimola lokombo la Jakɔbɔ ate: Isariyɛlɛ. Ase Isariyɛlɛ wakayongaka dioho diakasɔnama oma le Nzambi, oko wayotɛna l’ɔkɔngɔ.