ƆKƆNDƆ 26

Jɔbɔ ekɔ la kɔlamelo le Nzambi

ONDE wɛ ekɔ lo mboka pami katata hemɔ kɛnɛ kɛtshi? Lokombo lande Jɔbɔ, ndo omoto ongo wadiɛnde. Onde wɛ mbeyaka kɛnɛ katɛnde Jɔbɔ? ‘Tɛnga Nzambi kele ovu.’ Tênde la bonde keyande mbuta ngasɔ ndo ɔkɔkɔ akɔna wɛna Jɔbɔ shɔkɔ ya nganɛ.

Jɔbɔ aki pami ka kɔlamelo, kakakitanyiyaka awui wa Jehowa. Nde akadjasɛka lo kɛtɛ ya Uza, kem’etale la Kanana. Jehowa akalangaka Jɔbɔ efula, koko aki onto ɔmɔtshi lakôhetshaka. Onde wɛ mbêyaka?

Toko Satana Diabolo mbakinde. Ohɔ dia Satana ekɔ ondjelo wa kɔlɔ wahetsha Jehowa. Nde akadja dia kumiya Adama la Eva lo tɔmbɔkwɛ Jehowa, ndo nde akafɔnya ate: nde kokaka minganyiya ndo anto akina tshɛ dia vɔ tɔmbɔkwɛ Jehowa. Ko onde nde akadja lo dikambo sɔ oka? Kema. Ohokanyiya dia anto efula wa kɔlamelo apami ndo amato wakateke akambo awɔ. Angana wokokiyɛ shila nkombo na?

L’ɔkɔngɔ a nyɔi ka Jakɔbɔ la Yɔsɛfu l’Edjibito, Jɔbɔ aki onto lakaleke monga la kɔlamelo le Jehowa lo kɛtɛ k’otondo. Jehowa akalange tshika Satana dia nde mbeya ɔnɛ nde hakokaki kumiya anto tshɛ lo kɔlɔ, ɔnkɔnɛ nde akawotɛ ate: ‘Ohênda Jɔbɔ. Enda woho wende la kɔlamelo le mi.’

Satana akâmi ata ate: ‘Nde ekɔ la kɔlamelo dikambo wɛ akɔ̂tshɔkɔla ndo nde ekɔ la diangɔ di’amɛna efula. Koko naka wɛ mbɔkɔsɔladiɔ, nde ayokɔsɛka.’

Omalɔkɔ, Jehowa akawotɛ ate: ‘Ntshɔka. Kɔsɔlande tshɛ. Salɛ Jɔbɔ kɔlɔ tshɛ kalangayɛ. Tayɛna kana nde ayɔsɛka. Koko dikambo ɔtɔi tôdiakake.’

Ntondo, Satana akasale dia anto mbiva ponda la dongalonga diaki Jɔbɔ tshɛ, ndo ɛkɔkɔ ande wakadiakema. Ko nde akadiake anande 10 w’apami ndo wa amato la lɔpɛpɛ la wolo. L’ɔkɔngɔ, Satana akôke Jɔbɔ hemɔ ka wolo efula. Mɛtɛ Jɔbɔ akɛnyi pâ efula. Diɔ diakɔ diakawotɛ wadiɛnde ate: ‘Sɛka Nzambi kele ovu.’ Koko Jɔbɔ konanga sala ɔsɔku. Ko, angɛnyi asato wa kɔlɔ wakaye ndo wakawotɛ ɔnɛ nde akasale akambo amɔtshi wa kɔlɔ. Koko Jɔbɔ akalame kɔlamelo yande.

Dikambo sɔ diakangɛnyangɛnya Jehowa efula ndo l’ɔkɔngɔ diko, nde akayɔtshɔkɔla Jɔbɔ, oko wɛnayɛ l’osato. Nde akɔ̂kɔnɔla hemɔ kande. Jɔbɔ akayotaka ana 10 wakaleke amɛna, ndo akayonga la dongalonga, ɛkɔkɔ la ponda mbala hiende oleki lofulo laki lande ntondo.

Onde wɛ ayongaka nshi tshɛ la kɔlamelo le Jehowa oko Jɔbɔ oka? Naka wɛ sala ɔsɔku, kete Nzambi ayokɔtshɔkɔla ndo wɛ lawɔ. Wɛ ayokoka sɛna pondjo etena kayonga kɛtɛ dimɛna oko ekambɔ k’Ɛdɛna.

Jobo 1:​1-22; 2:​1-13; 42:​10-17.