Jɔbɔ aakinde?

Aki pami kɛmɔtshi kakadjasɛka lo wodja wa Uzɛ kakatɛmɔlaka Jehowa. Lokombo lande Jɔbɔ. Nde aki pami k’ɔngɔnyi efula ndo aki la nkumbo ka woke. Nde aki onto ɔlɔlɔ, ndo nde akakimanyiyaka ase wola, wadi waki edo ndo ana wa tshike. Ko onde Jɔbɔ komonga l’ekakatanu l’ɔtɛ wakandasalaka kɛnɛ kele ɔlɔlɔ?

Jɔbɔ kombeya dia Satana Diabolo akawendaka. Jehowa akatɛ Satana ate: ‘Onde wɛ akɛnyi okambi ami Jɔbɔ? Ndooko onto lele oko nde la nkɛtɛ. Nde kitanyiyakami ndo salaka kɛnɛ kele ɔlɔlɔ.’ Satana akakadimola ate: ‘Mɛtɛ Jɔbɔ kokitanyiyaka. Wɛ mbokokɛka ndo mbɔtshɔkɔlaka. Wɛ akawosha ɛtshi ka nkɛtɛ ndo nyama. Ohɔsa diangɔ sɔ tshɛ, nde hatotetemala kɔtɛmɔla.’ Jehowa akate ate: ‘Wɛ mbeyaka mpemba Jɔbɔ. Koko, toodiakake.’ Lande na kaketawɔ Jehowa dia Satana mpemba Jɔbɔ? Nde aki l’eshikikelo dia Jɔbɔ ayoshika ntanga.

Satana akatatɛ mpemba Jɔbɔ la lokema la mpokoso. Ntondotondo, nde akatome ase Sɛba dia ndjova ngɔmbɛ la mponda yaki Jɔbɔ. Oma laasɔ, dja yakatshumbe ɛkɔkɔ tshɛ waki Jɔbɔ. Olui okina w’anto, mbuta ate ase Kaladiya wakave kamɛlɔ yande. Ekambi ande wakalamaka nyama shɔ, wakadiakema. Oma laasɔ, mpokoso koleki tshɛ kɔlɔ kakokomɛ. Ana wa Jɔbɔ tshɛ wakavu etena kakanyukɔ luudu lakawasalaka fɛtɛ lɔkɔ. Jɔbɔ aki la lɔkɔnyɔ l’efula, koko nde kotshika dia ntɛmɔla Jehowa.

Satana akakombolaka nyomoleka nsoya Jɔbɔ, ɔnkɔnɛ nde akotondja atshutshu wakalanya demba diande di’otondo. Jɔbɔ aki la paa k’efula. Nde kombeyaka lande na kakokomɛka asui asɔ tshɛ. Koko, Jɔbɔ akatetemalaka ntɛmɔla Jehowa. Nzambi akɛnaka akambo asɔ tshɛ ndo nde aki l’ɔngɛnɔngɛnɔ efula lo dikambo dia Jɔbɔ.

Oma laasɔ, Satana akatome apami asato dia ndjohemba Jɔbɔ. Vɔ wakawotɛ vate: ‘Wɛ akasale pɛkato ndo wɛ akakishɛ. Diakɔ diambokosha Nzambi dilanya.’ Jɔbɔ akate ate: ‘Dimi kosala ndooko dui dia kɔlɔ.’ Oma l’etena kɛsɔ, Jɔbɔ akatatɛ mfɔnya dia Jehowa mbele lo kiɔkɔ y’ekakatanu ɛsɔ ndo nde akate dia Nzambi bu la losembwe oya le nde.

Ɔlɔngɔlɔngɔ wakawelɛka Elihu, akahokamɛka sawo aha la mbahola. Oma laasɔ, nde akatɛkɛta ndo akate ate: ‘Kɛnɛ tshɛ kambonyota kekɔ kɔlɔ. Jehowa ekɔ woke ndeka ndo woho wakokaso nshihodia. Nde hakokaki pondjo nsala kɛnɛ kele kɔlɔ. Nde mɛnaka akambo tshɛ ndo nde kimanyiyaka anto l’ekakatanu awɔ.’

Oma laasɔ, Jehowa akatɛkɛta la Jɔbɔ. Nde akawotɛ ate: ‘Lende akiyɛ etena kakamatonge olongo la nkɛtɛ? Lande na katayɛ dia dimi keema la losembwe? Wɛ ekɔ lo ntɛkɛta, koko wɛ heye lande na katomba akambo.’ Jɔbɔ akasuya munga kande ko akate ate: ‘Laki lo dindja. Dimi lakoke akambo wendana la yɛ, koko wonya ɔnɛ dimi lambokeya mɛtɛ. Ndooko dikambo diahayakoke nsala. Lambonyanga lo kɛnɛ kakamatshi.’

Etena kakashile ehemba, Jehowa akasha Jɔbɔ demba dia dimɛna nto ndo akawosha diangɔ efula oleki nɛ diaki la nde ntondo. Jɔbɔ akasɛnɛ edja efula ndo aki la lɔsɛnɔ l’ɔngɛnɔngɛnɔ. Jehowa akatshɔkɔla Jɔbɔ l’ɔtɛ wakandokitanyiya oyadi kaanga l’etena kaki dikambo sɔ wolo. Onde wɛ ayokoya Jɔbɔ ndo ntetemala ntɛmɔla Jehowa oyadi kɛnɛ tshɛ kakoka kokomɛ?