ƆKƆNDƆ 29

Lande na atalawɔ Mɔsɛ

ENDA Mɔsɛ atalawɔ oma l’Edjibito. Onde wɛ ekɔ lo mɛna apami wayawotshanya ango? Onde wɛ mbeyaka lande na kalangawɔ ndjaka Mɔsɛ? Tênde kana tayoshola dikambo diakɔ.

Mɔsɛ akôle lo luudu laki Farawɔ, nkumekanga k’Edjibito. Nde akakome pami ka lomba ndo dikongote. Mɔsɛ akeyaka dia nde kema Ose Edjibito, koko ambutshi ande wa mɛtɛ waki Ase Isariyɛlɛ wa fumbe.

Lushi lɔmɔtshi, lam’akinde l’ɛnɔnyi 40, Mɔsɛ akɔshi yɛdikɔ dia ntshɔ la tênda woho wa lɔsɛnɔ lasɛna anto ande. Waki lo sɔkishama mɛtɛ. Nde akɛnyi Ose Edjibito akula Ose Isariyɛlɛ ludui la mamba. Mɔsɛ akɛwɛwa lasuke lande, ko lam’akinde kɔmɛna ndoko onto la wênda, nde akakɔmɔla Ose Edjibito ko ɔsɔ akavu. Ko Mɔsɛ akashɛ odo ande lo ditshu.

La wedi a pindju, Mɔsɛ akatshu la tênda anto ande nto. Nde akafɔnyaka ate kana nde kokaka mbakimanyiya dia vɔ tomba oma lo fɔnu ka lɔhɔmbɔ lawɔ. Koko nde akatane apami ahende w’Ase Isariyɛlɛ walɔ ta, ko Mɔsɛ akatɛ ɔnɛ laki la munga ate: ‘Lande na akɔmɔlayɛ ɔnanyɔ na?’

Ko pami kakɔ akawotɛ ate: ‘Akakodje nkumekanga ndo shushi yaso na? Wate kodiake oko wakayadiake Ose Edjibito?’

Ko Mɔsɛ akatatɛ mboka wɔma. Nde akeye dia anto wakashile mbeya kɛnɛ kakandasalɛ Ose Edjibito. Kânga Farawɔ akoke dui diakɔ, ko nde akatome anto dia vɔ todiaka Mɔsɛ. Diɔ ndo diatalawɔ Mɔsɛ oma l’Edjibito.

Lam’akamɔ Mɔsɛ oma l’Edjibito, nde akatshu etale lo kɛtɛ ya Midiyana. Lɛkɔ nde akateyana la nkumbo ka Jetero, ndo nde akatotshukaka ɔnande ɔmɔtshi la omoto lakawelɛka Zipora. Mɔsɛ akakome olami w’ɛkɔkɔ ndo akalamaka ɛkɔkɔ wa Jetero. Nde akadjasɛ ɛnɔnyi 40 lo kɛtɛ ya Midiyana. Nde aya kakianɛ l’ɛnɔnyi 80. Ko lushi lɔmɔtshi, lam’akalamaka Mɔsɛ ɛkɔkɔ wa Jetero, dikambo dimɔtshi dia mamba diakatombe diakatshikitanya lɔsɛnɔ la Mɔsɛ l’otondo. Fola dikatshi kele ênde dikambo diakɔ dia diambo.

Etumbelu 2:​11-25; Etsha wa Atumami 7:​22-29.