ƆKƆNDƆ 36
Ɔna Ngɔmbɛ La Paunyi
HAI! Kakɔna kosala anto kakianɛ na? Vɔ wekɔ lo tɛmɔla ɔna ngɔmbɛ! Lande na kasalawɔ nganɛ na?
Lam’akaviya Mɔsɛ lo dikona, anto wakate vɔate: ‘Sho hateye kakɔna kambototombɛ Mɔsɛ. Ɔnkɔnɛ, nyɛsɔ tosale jambizambi yatɔlɔmbɔla dia totondja oma lo kɛtɛ nyɛ.’
Ɔnango Mɔsɛ le Arɔna akate ate: ‘Kawɔ. Nyonya adjama anyu wa paunyi kele nyombelawɔ.’ Etena kakawawela adjama akɔ, nde akâlɛlɔla ndo akasale ɔna ngɔmbɛ la paunyi. Ko anto wakate vate: ‘Nzambi kaso kakatotondja oma l’Edjibito nde ɔnɛ!’ Ko Ase Isariyɛlɛ wakasale dambo dia woke efula ndo wakatɛmɔla ɔna ngɔmbɛ la paunyi.
Etena kakɛnyi Jehowa dikambo nɛ, nde akomala efula. Ko nde akatɛ Mɔsɛ ate: ‘Holɔ esadi esadi. Anto wambosala dikambo dia kɔlɔ efula. Vɔ wambohɛ ɛlɛmbɛ ami ndo wambokusamɛ ɔna ngɔmbɛ la paunyi.’
Mɔsɛ akaholɔ esadi esadi oma lo dikona. Lam’akandasukana, nde akɛnyi dikambo diakɔ. Anto waki lo tshimba ɔna ngɔmbɛ la paunyi la nkembo ndo la wɛnyɛ! Mɔsɛ akomala efula ko nde akakasha pase pende di’ave w’ɛlɛmbɛ la kɛtɛ ko diɔ diakatɛ bɛtshi bɛtshi. Nde akɔsɛ ɔna ngɔmbɛ la paunyi ko akɔ̂lɛlɔla. Nde akakitshutshuna ofushi oto.
Anto wakasale dikambo dia kɔlɔ efula. Omalɔkɔ, Mɔsɛ akatɛ apami amɔtshi dia vɔ mbɔsa tokuwa tawɔ. Nde akate ate: ‘Anto wa kɔlɔ wakatɛmɔdi ɔna ngɔmbɛ la paunyi pombaka mvɔ.’ Ko apami akɔ wakadiake anto 3 000! Kema dikambo sɔ tɛnyaka dia sho pombaka ndjalama di’aha tɛmɔla tozambizambi tokina ta kashi paka Jehowa oto?