ƆKƆNDƆ 51

Ruta la Naɔmi

WƐ AYOTANA dibuku dimɔtshi dielɛwɔ Ruta lo Bible. Ekɔ ɔkɔndɔ wa nkumbo kɛmɔtshi kaki la lɔsɛnɔ lo etena kakalɔmbwamaka Isariyɛlɛ oma le tushushi. Ruta aki osekaseka wa lo wodja wa Mɔaba; nde kondjala Ose Isariyɛlɛ, wodja wa Nzambi. Koko etena kakêye Ruta Jehowa Nzambi ka mɛtɛ, nde akatatɛ mbolanga efula. Naɔmi, osombe ɔmɔtshi wa omoto mbakôkimanyiya dia nde mbeya Jehowa.

Naɔmi aki omoto Ose Isariyɛlɛ. Nde l’omɛnde l’anande ahende w’apami wakônɔ tshalo wodja wa Mɔaba etena kakayala ndjala ka kasha l’Isariyɛlɛ. Lushi lɔmɔtshi, om’aki Naɔmi akavu. Ko l’ɔkɔngɔ diko, anande wakatshuke ana wa amato ahende w’Ase Mɔaba; Ruta la Ɔrɔpa. Koko l’ɔkɔngɔ w’ɛnɔnyi dikumi l’ɛmɔtshi, anande akɔ ahende wakavu. Ande kandji kakoke Naɔmi nde l’akilo ande ahende asɔ lee! Naɔmi akandahombe sala kakianɛ na?

Lushi lɔmɔtshi, Naɔmi akɔshi yɛdikɔ dia kalola le ase wodja ande hita. Ruta nde l’Ɔrɔpa konangaka kakitɔna lande, ko vɔ wakoyele. Ko l’ɔkɔngɔ a vɔ ntshɔ tshale y’ɔlɔlɔ, Naɔmi akakadimɔ tshale an’akɔ wa amato ko nde mbatɛ ate: ‘Nyokalole lawakanyu, nyotodjasɛ lale anyɛngɛnyu.’

Naɔmi akâkumbatɛ ndo akalakana lawɔ. Vɔ wakatondo l’alelo nɛ dia vɔ wakalangaka Naɔmi efula. Vɔ wakawotɛ vate: ‘Kema! Sho nangaka ntshɔ layɛ lo wodja ayɛ.’ Koko Naɔmi akâkadimula ate: ‘Anami wa amato, nyu pombaka kalola. Nyu nyayotoleka monga dimɛna la wakanyu.’ Ɔnkɔnɛ Ɔrɔpa akakalola lakawɔ. Koko Ruta akatshikala.

Naɔmi akawotɛ ate: ‘Enda Ɔrɔpa ambokalola. Ndo wɛ lawɔ tshɔka lande lakanyu.’ Ko Ruta akôkadimula ate: ‘Totshutshuyake dia dimi mangana layɛ! Otshike ntshu layɛ. Dihole diayoyotshɔ mbayomotshɔ, ndo lɛnɛ ayoyodjasɛ mbayomodjasɛ. Anto ayɛ wayoyala anto ami ndo Nzambi kayɛ mbayoyala Nzambi kami. Lɛnɛ ayoyovɔ mbayomovɔ ndo dimi, ndo lɛkɔ mbayomokundɛma.’ Etena kakate Ruta ɔsɔku, Naɔmi kombosokoya nto dia nde kalola lakawɔ.

Amato akɔ ahende wakatokomaka l’Isariyɛlɛ. Vɔ wakadjasɛ lɛkɔ. Kem’edja Ruta akatatɛ kamba olimu lo dikambɔ nɛ dia aki nshi ya dinela di’eponga. Pami kɛmɔtshi kakawelɛka Boaza akôtshike dia nde tatɔngɔnaka washa w’eponga lo dikambɔ diande. Onde wɛ mbeyaka ɔnɛ laki nyango Boaza? Toko Rahaba ose osomba wa Jeriko.

Lushi lɔmɔtshi, Boaza akatɛ Ruta ate: ‘Wakambutɛ akambo ayɛ tshɛ, ndo woho wakayasalɛ Naɔmi ɔlɔlɔ. Dimi mbeyaka dia wɛ akatshike shɔ la nyɔ ndo wodja ayɛ hita dia ndjodjasɛ l’anto wakiyɛ kombeyaka ntondo. Jehowa akofute difuto diayɛ!’

Ruta akôkadimula ate: ‘Wɛ ambosalɛ ɔlɔlɔ efula. Wɛ ambombutɛ awui efula w’ɔlɔlɔ ndo ambosamba.’ Boaza akalangaka Ruta efula ko, kem’edja nde akôtshuke. Ande Naɔmi ɔlɔ lee! Naɔmi akaleke ngɛnangɛna etena kakote Ruta nde la Boaza ɔnawɔ l’enondo lakawelɛka Obede. Obede akɔ mbakayongaka tshɛnde la Davidi, layotɔtɛkɛta dikambo diande yema l’ɔkɔngɔ.

Dibuku dia Ruta.