ƆKƆNDƆ 58
Davidi la Ngɔliyatɛ
ASE Filistiya wakaye nto dia ndjɔlɔsha Isariyɛlɛ. Ndo nondo dia Davidi sato mbaki l’olui w’alembe wa Saulo. Ko lushi lɔmɔtshi Jɛse akatɛ Davidi ate: ‘Ɔsa saka di’ahɔhɔ la mma kele ɔtɔlɛ ananyɔ. Kotambudi kana vɔ wekɔ la wolo.’
Lam’akakome Davidi lo pango k’alembe, nde akalawɔ otsha l’ɔnɔngɔ wa ta dia tênda anango. Ngɔliyatɛ, dihangamende di’Ose Filistiya, akaye dia ndjɔsɔka Ase Isariyɛlɛ. Nde akasalaka ɔsɔku pindju la dikɔlɔ tshɛ, nshi 40 y’etondo. Nde akawatɛka ate: ‘Nyɔsɔnɛ pami kɛmɔtshi l’atei anyu kele ayɔlɔ lami. Naka nde ndekami wolo ndo ndjakami, kete sho ndjâla ɛhɔmbɔ anyu. Koko naka dimi mboleka wolo ndo lambodiaka, kete nyu ndjâla ɛhɔmbɔ aso. Dimi lambonyodja tɔfwɛfwɛ nte: nyombisha pami kɛmɔtshi, tɔlɔ dimi la nde.’
Davidi akambola asalayi amɔtshi ate: ‘Kayowosalɛ onto layodiaka Ose Filistiya ongo ndo layonya Isariyɛlɛ oma lo sɔnyi?’
Osalayi akawotɛ ate: ‘Saulo ayowɔngɔnya ndo ayowosha ɔnande la omoto oko wadi.’
Koko Ase Isariyɛlɛ tshɛ wakokaka Ngɔliyatɛ wɔma nɛ dia nde aki dihanɔki. Nde aki otale suke la mɛtɛlɛ shato, ndo nde aki l’osalayi okina wakatawɛmbɛka engawo kande.
Asalayi amɔtshi wakatshu dia totɛ Saulo ɔnɛ: Davidi nangaka ndɔ la Ngɔliyatɛ. Koko Saulo akatɛ Davidi ate: ‘Wɛ hakoke ndɔ l’Ose Filistiya ongo. Wɛ eke dikɛnda, ndo nto lɔsɛnɔ lande l’otondo nde okongaka paka osalayi.’ Davidi akakadimola ate: ‘Dimi lakadiake tambwɛ la kimbwe yakatondaka ɛkɔkɔ wa papa. Ndo Ose Filistiya ongo ayoyala oko nyama kɛmɔtshi l’atei ayɔ. Jehowa ayokimanyiya.’ Omalɔkɔ, Saulo akawotɛ ate: ‘Tshɔka, Jehowa ayale la yɛ.’
Davidi akatshu l’ɔkɛdi ɔmɔtshi akatɔsa mbɔkɔ tshanu, ndo akayidje lo tapa diande. Ko nde akɔshi yoka ave yande, akatshu dia tohomana la dihangamende. Lam’akawɛnyi Ngɔliyatɛ, nde akâmbe efula. Nde akafɔnya ate hatonga wolo dia ndjaka Davidi.
Ngɔliyatɛ akawotɛ ate: ‘Yaka oya le mi kele mbisha tofudu la wa nyama demba diayɛ wale.’ Koko Davidi akawotɛ ate: ‘Wɛ ekɔ lo ndjaye oya le mi la yɔmbɔ, l’okalemba ndo la dikɔnga, koko dimi lekɔ lo ndjaye oya le yɛ la lokombo la Jehowa. Lushi l’ɛlɔ lɔnɛ Jehowa ayokokimɔ l’anya ami ndo dimi layokomba la kɛtɛ.’
Ko Davidi akalawɔ otsha le Ngɔliyatɛ. Nde akɔ̂shi lɔwɔkɔ oma lo tapa diande, akalidje lo yoka ave yande, ndo akalioke la wolo ande tshɛ. Lɔwɔkɔ lakande Ngɔliyatɛ l’okoko ndo lakɔ̂tɔ l’etei k’ɔtɛ, ko nde akakɔ odo! Lam’akɛnyi Ase Filistiya dia dihoka diawɔ ambɔkɔ, vɔ tshɛ wakalawɔ. Ase Isariyɛlɛ wakawatshanya ndo wakadje otshumba lo ta diakɔ.