Davidɛ komonga la wɔma

Kakɔna katoyosalaka etena katoyokaka wɔma?— Ondo wɛ totshɔka le mama kana papa dia toyanga ekimanyielo. Koko ekɔ onto okina lakoka kokimanyiya. Nde ekɔ la wolo efula ndeka anto tshɛ. Onde wɛ mbeeyaka?— Onto akɔ ko Jehowa Nzambi. Ɛsɔ tɔsɛdingole awui amɔtshi wendana l’ɔlɔngɔlɔngɔ Davidɛ wele Bible tɛkɛtaka dikambo diande. Lam’ele Jehowa akookimanyiyaka nshi tshɛ, nde komonga la wɔma.

Oma ko kiɛndakɛnda yande, ambutshi wa Davidɛ wakawetshaka dia nde mboka Jehowa ngandji. Dui sɔ diakakimanyiya Davidɛ diaha nde mboka wɔma kaanga la ntondo k’awui amɔtshi wa wɔma wakookomɛ. Nde akeyaka dia Jehowa aki ɔngɛnyi ande ndo ayowokimanyiya. Mbala kɛmɔtshi, etena kakalamaka Davidɛ ɛkɔkɔ, tambwɛ kɛmɔtshi ka woke kakaye, ko kakɛmbɛ ɔkɔkɔ ɔmɔtshi lo onyɔ atɔ. Onde wɛ mbeyaka kɛnɛ kakasale Davidɛ? Nde akatshanya tambwɛ kɛsɔ ndo akatokidiaka la yoka ave yande. Ndo l’ɔkɔngɔ wa laasɔ, etena kakaye laondo dia ndjonda ɛkɔkɔ, Davidɛ akalidiake nto. Onto akɔna lafɔnyayɛ lakakimanyiyaka Davidɛ?— Lo mɛtɛ, aki Jehowa.

Ekɔ etena kekina kakakɛnɛmɔla Davidɛ dihonga lo yoho ya laande. Ase Isariyɛlɛ wakalɔshanaka l’ase Filistiya. Ase Filistiya waki la sɔda dimɔtshi diaki dikongote dia mamba ndo otale tshwa. Lokombo lande ko Ngɔliyatɛ. Dikongote sɔ akadjaka asɔda w’ase Isariyɛlɛ ndo Jehowa tɔfwɛfwɛ. Ngɔliyatɛ akalɔmbaka asɔda w’ase Isariyɛlɛ dia vɔ ndjɔlɔ la nde. Koko ase Isariyɛlɛ tshɛ waki la wɔma dia ndɔ la nde. Etena kakoke Davidɛ dui sɔ, nde akatɛ Ngɔliyatɛ ate: ‘Dimi layɔlɔ la yɛ. Jehowa ayonkimanyiya ndo dimi layokɔlɛndja.’ Onde wɛ fɔnyaka dia Davidɛ aki la dihonga?— Eelo, nde aki la dihonga di’efula. Onde wɛ nangaka mbeya kɛnɛ kakayotomba l’ɔkɔngɔ?

Davidɛ akɔshi yoka ave yande ndo mbɔkɔ tshanu, ko akatshu dia tɔlɔ la dihangamende sɔ. Etena kakɛnyi Ngɔliyatɛ dia Davidɛ ekɔ dikɛnda, nde akatatɛ mbɔɔnyɔla. Koko Davidɛ akawotɛ ate: ‘Wɛ ekɔ lo ndjaye le mi la yɔɔmbɔ, koko dimi lekɔ lo ndjaye le yɛ lo lokombo la Jehowa.’ Oma laasɔ, nde akɔshi lɔwɔkɔ, akadje lo yoka ave yande, ko akalawɔ otsha le Ngɔliyatɛ ndo akoofufelɔ. Lɔwɔkɔ lɔsɔ lakakɔmɔla Ngɔliyatɛ l’okoko. Dihangamende sɔ diakasongotɔ lo nkɛtɛ ndo diakavu. Ase Filistiya wakoke wɔma ndo vɔ tshɛ wakalawɔ. Ngande wakakoke ɔlɔngɔlɔngɔ Davidɛ monga l’akoka wa ndjaka dihangamende sɔ?— Jehowa mbakookimanyiya, ndo Jehowa aki la wolo ndeka dihangamende sɔ.

Wetshelo akɔna wakokayɛ nkondja oma l’ɔkɔndɔ wa Davidɛ?— Jehowa ekɔ la wolo wa mamba ndeka oseka onto tshɛ. Koko nde ekɔ ɔngɛnyi ayɛ. Ɔnkɔnɛ, mbala kekina kayoyonga la wɔma, koohɔ dia Jehowa koka kokimanyiya dia wɛ monga la dihonga.