ƆKƆNDƆ 91

Yeso ambetsha lo dikona

HƐNYI Yeso odjashi lanɛ. Nde ekɔ lo mbetsha anto ango tshɛ wele lo dikona dimɔtshi la Ngalileya. Wanɛ wodjashi suke lande ango wekɔ ambeki ande. Nde akasɔnɔla dikumi l’ahende oma l’atei awɔ dia vɔ ndjâla apɔstɔlɔ. Apɔstɔlɔ kɛdikɛdi ambeki wa lânde waki Yeso. Onde wɛ mbeyaka nkombo yawɔ?

Ekɔ Simɔna Petero nde l’ɔnango Andɛlɛ. Ko Jakɔba la Joani, onto l’ɔnango ndo vɔ lawɔ. Ɔpɔstɔlɔ okina lokombo lande Jakɔba, ndo okina nto lokombo lande Simɔna. Apɔstɔlɔ ahende nkombo yawɔ Judasɛ. Ɔmɔtshi lokombo lande Judasɛ Isakariyɔtɛ, ndo Judasɛ kina akelamɛka nto ɔnɛ Tadayo. L’ɔkɔngɔ diko, akina nkombo yawɔ Filipo la Natanyɛlɛ (lakawelɛka nto ɔnɛ: Baratɔlɔmayo), ndo Mateo nde la Tɔmasɛ.

L’ɔkɔngɔ wa nde kalola oma la Samariya, Yeso akatatɛ la sambisha mbala ka ntondo ate: ‘Diolelo dia l’olongo diaya suke.’ Onde wɛ mbeyaka ele diolelo diakɔ sɔ? Diɔ diekɔ ɛlɔmbwɛlɔ ka mɛtɛ kaki Nzambi. Yeso kele nkumekanga k’ɛlɔmbwɛlɔ kakɔ. Nde ayolɛ oma l’olongo ko ayela wɔladi lanɛ la kɛtɛ. Diolelo diaki Nzambi diayokadimola kɛtɛ k’otondo paradiso ka dimɛna hangɔnɛ.

Lanɛ, Yeso aki lo mbetsha anto kɛnɛ k’endana la diolelo. Nde akawalembetshiya ate: ‘Kanyɔlɔmbake ɔnkɔnɛ. Sheso lele l’olongo, lokombo layɛ lalɛmiami. Diolelo diayɛ diaye. Lolango layɛ latshame la kɛtɛ oko atshamalɔ l’olongo.’ Anto efula mbelɛka dɔmbɛlɔ sɔ vate: ‘Disambɛ dia Sheso.’ Anto akina dielɛka ɔnɛ: ‘Sheso.’ Onde wɛ kokaka mbuta dɔmbɛlɔ sɔ di’otondo?

Ndo nto, Yeso aki lo mbetsha anto woho wahombawɔ salɛ anyawɔ. Nde akate ate: ‘Otshelake akina kɛnɛ kalangayɛ vɔ kotshela.’ Shi wɛ tolangaka anto akina kotshelɛ akambo w’ɔlɔlɔ? Ɔnkɔnɛ, oko wakadite Yeso, sho pombaka salɛ anto akina akambo w’ɔlɔlɔ. Kema ayoyala dimɛna efula lo paradiso ka la kɛtɛ lam’ayosalaka anto tshɛ dikambo sɔ?

Mateu tshapita 5 polo 7; 10:​1-4.