Tshapita 34

Ambɔsɔna apɔstɔlɔ ande

AMBETA oko ɔnɔnyi w’otondo l’etenyi tatɛ oma lam’akɛnyanya Joani Obatizanyi Yeso oko Ɔna Ɔkɔkɔ wa Nzambi ndo lam’akatatɛ Yeso olimu ande w’esambishelo. L’etena kɛsɔ ko Andɛlɛ, Simɔna Petero, Joani, ondo ndo Jakɔba (ɔnango Joani), kâmɛ la Filipɔ la Natanyɛlɛ (ɔnɛ lakawelɛka nto ɔnɛ: Baratɔlɔmayo), wamboshilaka ndjâla ambeki ande wa ntondo. L’edjedja wonya, akina wakayɔtɔka l’ɔnɔngɔ awɔ dia ndjela Kristo.

Kakianɛ, Yeso ekɔ suke la sɔnɔla apɔstɔlɔ ande. Vɔ mbayoyala akimanyedi ande wa mamba ndo mbayolowanyema lo yoho ya lânde. Koko, la ntondo ka nde mbasɔnɔla, Yeso ambotshɔ otsha lo dikona dimɔtshi ko ambetsha otsho w’otondo lo nɔmbaka Nzambi dia nde mbosha lomba ndo mbɔtshɔkɔla. La wedi a pindju, nde ambelɛ ambeki ande ko ambɔsɔna 12 oma l’atei awɔ. Koko, lam’ele vɔ wekɔ lo tetemala mbetshama oma le Yeso, wâkakɔlamɛ mbaelɛ ɔnɛ ambeki.

Asamalo wakatɛnyi nkombo yawɔ la ntondo mbele ambeki wa ntondo wambɔsɔnɔla Yeso. Ndo Mateo, ɔnɛ lakete Yeso oma lo bilɔ kande k’elambo mbambɔsɔnama. Akina atanu wambɔsɔnama v’anɛ: Judasɛ (ɔnɛ lakawelɛka nto ɔnɛ: Tadayo), Judasɛ Isakariyɔtɛ, Simɔna Ose Kanana, Tɔmasɛ, la Jakɔba y’ɔna Alafɛyo. Vɔ mbelɛka Jakɔba shɔ ɔnɛ Jakɔba ya Dikɛnda, ondo nɛ dia nde mboleki tshitshɛ lo demba kana ɔpɔstɔlɔ okina welɛwɔ Jakɔba mbôlɛ.

Aya edja efula kele apɔstɔlɔ asɔ dikumi l’ahende kâmɛ la Yeso, ndo nde mbaeyaka ɔlɔlɔ. Mɛtɛ, amɔtshi wa l’atei awɔ mbotɔka la nde. Aha la tamu, Joani nde la Jakɔba y’ɔnango mbele anto wa ntondo wetana la Yeso ana l’ana. Ondo Alafɛyo ekɔ ɔnango Yɔsɛfu, ombutshi a pami wakodia Yeso. Lâsɔ kete ɔpɔstɔlɔ Jakɔba, ɔn’aki Alafɛyo mbetanaka nde la Yeso ana l’ana.

Mɛtɛ, Yeso mbohɔka nkombo y’apɔstɔlɔ ande aha ndoko l’okakatanu. Ko onde, wɛ kokaka mbohɔ nkombo yawɔ? Ohɔ dia, apɔstɔlɔ amɔtshi ahende nkombo yawɔ Simɔna, ahende akina Jakɔba, ndo ahende nto Judasɛ, eya nto ɔnɛ Simɔna ekɔ l’ɔnango lelɛwɔ ɔnɛ Andɛlɛ ndo Jakɔba ekɔ l’ɔnango lelɛwɔ ɔnɛ Joani. Ɔsɔku mbakokayɛ nembetɛ nkombo y’apɔstɔlɔ enanɛi. L’atei w’apɔstɔlɔ akina anɛi, ɔmɔtshi ekɔ olongodi w’elambo (Mateo), ɔpɔstɔlɔ ɔmɔtshi akayodjaka tamu l’ɔkɔngɔ diko (Tɔmasɛ), okina aki la tshina di’osongo lam’akawete Yeso (Natanyɛlɛ) ndo ɔngɛnyi ande Filipɛ.

Apɔstɔlɔ dikumi l’ɔtɔi wekɔ Ase Ngalileya, oko wele Yeso ose lɛkɔ. Natanyɛlɛ ekɔ Ose Kana. Filipɛ, Petero, l’Andɛlɛ wekɔ Ase Bɛtɛsayida, ko l’ɔkɔngɔ diko, Petero l’Andɛlɛ wakayonɔka otsha la Kapɛrɛnauma, ondo mɛtɛ lɛkɔ mbakadjasɛka Mateo. Jakɔba la Joani waki amundji a nse, ndo ondo vɔ wakadjasɛka mɛtɛ la Kapɛrɛnauma kana l’emamu wa ngelo kakɔ. Ondo Judasɛ Isakariyɔtɛ, ɔnɛ lakayofungaka Yeso, ndamɛ oto mbaki Ose Juda. Mako 3:13-19; Luka 6:12-16.

▪ Apɔstɔlɔ akɔna ondo wele ewotɔ wa Yeso?

▪ Wa na wele apɔstɔlɔ wa Yeso, ndo woho akɔna wakokayɛ mbohɔka nkombo yawɔ?

▪ Apɔstɔlɔ asɔ wakikɔ ase ngelo yakɔna?