Yeso ambɔsɔna apɔstɔlɔ dikumi l’ahende

Ambeta oko ɔnɔnyi l’etenyi ntatɛ lam’akate Joani Obatizanyi dia Yeso ekɔ Ɔna Ɔkɔkɔ wa Nzambi. Lam’akatatɛ Yeso olimu ande wa lo sɛkɛ, efula k’apami waki l’etema w’ɛlɔlɔ wakakome ambeki ande, ɛnyɛlɔ oko Andɛlɛ, Simɔna Petero, Joani ndo ondo Jakɔba (ɔnango Joani), Filipɛ, Bartɛlɛmi (lelamɛ nto Natanayɛlɛ). L’edjedja ka wonya, ambeki akina efula wakayoyelaka Yeso.​—Joani 1:45-47.

Kakianɛ Yeso aya suke la nsɔna apɔstɔlɔ ande. Wasɔ mbayonga angɛnyi ande wa suke suke ndo mbayolongola olowanyelo wa laande. Koko la ntondo ka nde mbasɔna, Yeso akatshu lo dikona ondo diaki suke la Ndjale ka Ngalileya, suke la Kapɛrnauma. Nde akalɔmbɛ otsho w’otondo, ondo lo nyanga lomba ndo ɛtshɔkɔ wa Nzambi. La wedi a pindju, nde akelɛ ambeki ande ndo akasɔnɛ ambeki 12 dia vɔ monga apɔstɔlɔ ande.

Yeso akasɔnɛ ambeki asamalo woshilami nkombo yawɔ la diko, kaamɛ ndo Mateo ɔnɛ lele Yeso akawelɛ oma lo biro wafutshanyawɔ elambo. Ambeki akina atanu wakandasɔnɛ ko, Judasɛ (lelamɛ nto ɔnɛ Tadɛyo ndo “ɔna Jakɔba”), Simɔna ose Kanana, Tɔma, Jakɔba ɔna Alafayo ndo Judasɛ Iskariyɔtɛ.​—Mateo 10:2-4; Luka 6:16.

Ambeki 12 asɔ wakatɛngɔlaka la Yeso ndo nde owaeya dimɛna. Efula ka l’atei awɔ wekɔ ewotɔ ande. Mɛnamaka dia Jakɔba la Joani mbaki anto wa ntondo wakelanɛka la Yeso ana l’ana. Ndo oko wakataka anto amɔtshi, naka Alafayo aki ɔnango Yɔsɛfu she kalodia kaki Yeso, laasɔ kete ɔpɔstɔlɔ Jakɔba ɔna Alafayo akahombe nto monga nde la Yeso ana l’ana.

Lo mɛtɛ, Yeso kokoka monga l’okakatanu dia mbohɔ nkombo y’apɔstɔlɔ ande. Ko onde wɛ koka mbohɔ nkombo yawɔ? Yoho mɔtshi ele lo mbohɔ dia ekɔ ahende waki la nkombo ya Simɔna, ahende Jakɔba ndo ahende Judasɛ. Simɔna (Petero) aki l’ɔnango lelamɛ Andɛlɛ ndo Jakɔba (ɔna Zebede) aki l’ɔnango lelamɛ Joani. Ɔsɔ kele yoho yoleki dimɛna ya mbeya nkombo y’apɔstɔlɔ enanɛi. Apɔstɔlɔ akina anɛi mbidja ndo ofutshanyi w’elambo (Mateo), okina ele ɔnɛ lakayodjaka taamu (Tɔma), ndo ɔnɛ lakelamɛ oma l’ɛsɛ k’osongo (Natanayɛlɛ), ndo ɔngɛnyi waki Natanayɛlɛ (Filipɛ).

Apɔstɔlɔ dikumi l’ɔtɔi wekɔ ase Ngalileya, ɛtshi ka nkɛtɛ kakotɔ Yeso. Natanayɛlɛ aki ose Kana. Filipɛ, Petero ndo Andɛlɛ, waki ase Bɛtɛsayida. Petero nde la Andɛlɛ wakayonɔka la Kapɛrnauma, ondo lɛnɛ akadjasɛka Mateo. Ndo Jakɔba nde la Joani vɔ lawɔ wakadjasɛka la Kapɛrnauma kana suke la lɛkɔ ndo wakasalaka olimu wa minda nse suke la lɛkɔ. Mɛnamaka dia Judasɛ Iskariyɔtɛ lakayofungaka Yeso mbaki ɔtɔi w’ɔpɔstɔlɔ w’ose Judeya.