ƆKƆNDƆ 97

Yeso amboya oko nkumekanga

ATAYALA edja l’ɔkɔngɔ wa nde kɔnɔla ase kɛtshi ahende wa totshungu, Yeso akakome lo ngielongelo mɔtshi yakasukana la Jerusalɛma. Nde akatɛ ambeki ande ahende ate: ‘Nyutshu lo ngielongelo ndjo, nyayototana ɔna ponda. Kanyokikelekole kele nyombelatɔ.’

Lam’akawela Yeso ponda kakɔ, nde akahema lâdiko dia tɔ. Nde akatatɛ lɔkɛndɔ otsha la Jerusalɛma. Lam’akandasukana l’osomba, olui a woke w’anto wakaye dia ndjohomana lande. Efula ka l’atei awɔ wakɔshi ahɔndɔ awɔ ko wakâlɛ lo mboka. Akina wakakɔtɛ wanga w’atoko. Vɔ wakake wanga akɔ lo mboka, ko wakatatɛ la pangɔhangɔ vate: ‘Ɔnɛ layaye lo lokombo la Jehowa atombwame!’

Lo nshi ya ntondo, lo ndjela etshelo kaki l’Ase Isariyɛlɛ, nkumekanga k’oyoyo akahombaka mbahema lâdiko di’ɔna ponda ko nde mbɔtɔ lo Jerusalɛma dia ndjoyaɛnya la ntondo k’anto. Dikambo sɔ mbakasale Yeso lanɛ. Ndo anto asɔ waki lo mɛnya dia vɔ wakalangaka Yeso monga nkumekanga kawɔ. Koko aha anto tshɛ mbakôlangaka. Sho kokaka mɛna dikambo diakɔ oma lo kɛnɛ kakatokomɛ Yeso lam’akandatshu otsha lo tɛmpɛlɔ.

Lo tɛmpɛlɔ, Yeso akakɔnɔla akanga a totshungu ndo akanga wa tshumbe. Lam’akɛnyi ana w’akɛnda akambo asɔ, vɔ wakatatɛ la tombola Yeso. Koko dikambo sɔ diakokiya ɛlɔmbɛdi kɛlɛ ko vɔ wakatɛ Yeso vate: ‘Onde wɛ ekɔ lo mboka kɛnɛ kata ana w’akɛnda asɔ?’

Yeso akakadimola ate: ‘Eelo. Onde nyu nyatale lo Bible lo dihole diata ɔnɛ: “We akaluwanya [lotombo, NW] l’enyo wa ana w’ashashi la waloma?”’ Diɔ diakɔ diakakɔlamelaka ana w’akɛnda la tombola Nkumekanga kakadjama oma le Nzambi.

Sho nangaka ndjâla oko ana w’akɛnda asɔ, shi mɛtɛ? Anto amɔtshi mbeyaka toshimba dia sambisha diolelo diaki Nzambi. Koko sho tayɔkɔlamelaka sanyɛ anto akina akambo w’ɔngɛnɔngɛnɔ efula wayosalɛ Yeso anto.

Aha l’etena kɛsɔ mbakahombe Yeso tatɛ la mbolɛ oko nkumekanga lam’akinde la kɛtɛ. Ko l’etena kakɔna kayondolɛ na? Ambeki waki Yeso wakalangaka mbeya dikambo sɔ. Tayala dikambo diakɔ lo dikatshi diayela.

Mateu 21:​1-17; Joani 12:​12-16.