ƆKƆNDƆ 42

Ponda kambɔtɛkɛta

ONDE wɛ akoke ponda atɛkɛta lushi lɔmɔtshi? Wɛ ayota w’ate: ‘Kema. Nyama hayokoke tɛkɛta.’ Koko Bible ekɔ lo mbuta dikambo dia ponda kakatɛkɛta. Tênde woho wakasalema dikambo sɔ.

Ase Isariyɛlɛ wakayala suke la koma lo kɛtɛ ya Kanana. Balaka, nkumekanga ka la Mɔaba akokaka Ase Isariyɛlɛ wɔma efula. Ɔnkɔnɛ nde akatoyangaka wetshi ɔmɔtshi a pami wakawelɛka Balama dia nde ndjodja Ase Isariyɛlɛ mananu. Balaka akalake Balama akuta efula, diɔ diakɔ diakahema Balama lo ponda kande ndo akakimɛ lɔkɛndɔ tshala tɛnana la Balaka.

Jehowa akashimbe Balama di’aha nde mbidja wodja ande mananu. Omalɔkɔ, nde akatome ondjelo ɔmɔtshi la lokuwa l’otale dia nde tekamɛ Balama lo mboka. Balama kɔmɛna ondjelo akɔ, koko ponda kande akawɛnyi. Ko ponda akayange woho wa tshimbwɛ ondjelo akɔ, edja ndo ndjokitɛ lo mbidjasɛ la kɛtɛ kusaa. Balama akadanɛ la kɛlɛ, ndo akakitɛ lo kɔmɔla ponda kande ɛhɛhɛla.

Ko Jehowa akasale dia Balama mboka ponda kande awɔtɛkɛtɛ. Ponda akawombola ate: ‘Okotshemi kakɔmɔlayɛ na?’

Ko Balama akawotɛ ate: ‘Nɛ dia wɛ ekɔ lo kɛnya lami. Otomonga la lokuwa tshike lotokodiaka!’

Ko ponda akawombola ate: ‘Onde wɛ ambɔmɛnaka lakosalɛ ɔnkɔnɛ lushi lɔmɔtshi oka?’

Ko Balama akakadimula ate: ‘Kema.’

Ko Jehowa akadihola asho wa Balama dia nde mɛna ondjelo wakemala la lokuwa lo mboka. Ondjelo akawotɛ ate: ‘Lande na akayakɔmɔdi ponda kayɛ na? Dimi lakaye dia ndjokodihɛ mboka, di’aha wɛ ntshɔ la tondja Isariyɛlɛ mananu. Otondonga ponda kayɛ handawoe, tshike lotokodiaka wɛ, ko ponda kayɛ ototshikala la lɔsɛnɔ.’

Balama akate ate: ‘Lakasadi pɛkato. Dimi hambeyi nte wɛ akemadi lo mboka.’ Ondjelo akatshike Balama dia nde ntshɔ la tɛnana la Balaka. Nde akahembe mbidja Isariyɛlɛ mananu, koko lo dihole dia mananu, Jehowa akâtshɔkɔla mbala shato.

Walelu 21:​21-35; 22:​1-40; 23:​1-30; 24:​1-25.