Etshumanelo k’Akristo wa l’Eleko ka Ntondo
Lo Pɛntɛkɔsta ka l’ɔnɔnyi 33 T.D., spirito k’osanto kakatshulwama le ambeki wa Kristo 120, ko vɔ wakatatɛ la tɛkɛta akambo w’amɛna wa Nzambi l’ɛtɛkɛta efula. Ɔsɔku mbakahikama etshumanelo k’Akristo. Otsha lo yɛdikɔ y’ambeki w’eyoyo 3 000 wakabatizama lushi lakɔ.—Etsha tshapita 2.
Lofulo la tshumanelo dia lo ngelo yotshikitanyi lakatahamaka, omalɔkɔ, apɔstɔlɔ la ambeki wakatatetemalaka la mbewoya Dui dia Nzambi la dihonga. Oko wofundamidiɔ lo dibuku di’Etsha, esambishelo kotshimbatshimba dia tɔ diangana lo lɛtshi la kɛtɛ la Mediteraneya, tatɛ oma la Babilɔna la lo Nɔrdɛ ka l’Afrika polo ndo la Romo ndo ondo polo ndo l’Ɛspanyɛ.—Romo 15:18-29; Kolosai 1:23; 1 Petero 5:13.
Tshumanelo diakâtemaka l’ahole tshɛ wakakomaka anto ambeki w’eyoyo. Apami wambotshunda wɛɔngɔ ndo wakoka wakasɔnwamaka oko dikumanyi kana emendji dia vɔ nama ɛnyɛlɔ ka wetshelo w’osembwe ndo ka dionga di’ɔlɔlɔ l’atei wa tshumanelo. Koko, vɔ kôndjala ɔnɔngɔ ɔmɔtshi w’ewandji wa tɛmwɛlɔ; vɔ waki ekambi ndo wakakambaka kâmɛ dikambo dia Diolelo dia Nzambi.—Etsha 14:23; 20:28; 1 Koreto 3:5; 5:13; Kolosai 4:11; 1 Timote 3:1-15; Heberu 13:17; 1 Petero 5:1-4.
Apɔstɔlɔ l’akina wakakambaka mâma kâmɛ lawɔ mbaki olui walɔmbɔla. Vɔ mbakalɔmbɔlaka olimu w’esambishelo. Vɔ mbakakandolaka ekakatanu wa l’atei w’etshumanelo ka la Jerusalɛma. Vɔ mbakatomaka anangɛso amɔtshi wele la diewo la Samariya la l’Atiyɔka dia vɔ tokeketsha ambetawudi w’eyoyo wa lɛkɔ. Vɔ wakahembola wamanu wakatombe lo dikambo dia wahemelo w’ohekele, lam’akawewoya tshumanelo tshɛ yɛdikɔ yawɔ yakawɔshi dia diɔ kitanyiya. Koko, anto asɔ kombahemɛka akina oko ewandji, koko, vɔ waki ekambi ndo wakakambaka kâmɛ l’etshumanelo k’otondo olimu.—Etsha 4:33; 6:1-7; 8:14-25; 11:22-24; 15:1-32; 16:4, 5; 1 Koreto 3:5-9; 4:1, 2; 2 Koreto 1:24.
Ambeki wa ntondo wakeyamaka oko Akristo ndo ɔsɔku mbakawetama oko akalɔngɔsɔla Nzambi. Ndo nto, vɔ waki la wetshelo wakâkitshikitanyaka l’anto akina; wetshelo akɔ waketamaka ɔnɛ olakanyelo w’apɔstɔlɔ kana yɛdikɔ y’awui washa eko. Wetshelo ɔsɔ w’oma l’Afundelo waketamaka nto ɔnɛ: mɛtɛ.—Joani 17:17; Etsha 2:42; 11:26; Romo 6:17; 1 Timote 4:6; 6:1, 3; 2 Timote 1:13; 2 Petero 2:2; 2 Joani 1, 4, 9.
Vɔ waki etshumanelo ka l’andja w’otondo k’anangɛso wosangani lo ngandji. Vɔ wakadjaka asekawɔ wa lo mbetawɔ wa lo wedja ekina yimba. Lam’akawatɛngɔlaka otsha lo wedja ekina, asekawɔ ambetawudi wakâlongolaka la wâkawɔ. Oko wakiwɔ wodja w’osanto, wokakitwani l’andja ɔnɛ, vɔ waki la lɔkɛwɔ la pudipudi la lâdiko. Vɔ wakalame etena ka lushi la wôngelo wa Jehowa lo timba tawɔ, ndo, wakewoyaka wotelo wa lo sɛkɛ wa mbetawɔ kawɔ l’ohetoheto.—Joani 13:34, 35; 15:17- 19; Etsha 5:42; 11:28, 29; Romo 10:9, 10, 13-15; Tito 2:11-14; Heberu 10:23; 13:15; 1 Petero 1:14-16; 2:9-12; 5:9; 2 Petero 3:11-14; 3 Joani 5-8.
Koko, oko akadialakema, wanganelo a woke w’oma l’ɔtɛmwɛlɔ a mɛtɛ kana apɔsitazi, wakatatɛ la pama l’eleko ka hende la ka sato. Dui sɔ diakayelaka totshelo efula ta l’ɔtɛmwɛlɔ taki kondjolama pudipudi k’etshumanelo k’Akristo wa ntondo l’akambo w’endana la wetshelo, la dionga, l’ɔlɔngɔswamelo ndo la dihole diele l’Akristo l’andj’ɔnɛ.—Mateu13:24-30, 37- 43; 2 Tesalonika tshapita 2.
Koko Yeso akatatshi dia ɔtɛmwɛlɔ a mɛtɛ wayoyohikama nto l’ekomelo ka dikongɛ di’akambo nɛ. Ɛmɛnyi wa Jehowa shikikɛka ɔnɛ ohikamelo ɔsɔ kokaka mɛnama lo elimu awɔ wa l’andja w’otondo l’etena kaso kɛnɛ, mbut’ate yɛdikɔ y’ɛnɔnyi 1 900 l’ɔkɔngɔ wa pɔlɔfɛsi ka Yeso. Akatshi wayela wayotolembetshiya ɔkɔkɔ a dikambo diakɔ.
• Woho akɔna wakahikama etshumanelo k’Akristo, ndo woho akɔna wakatɔahame na?
• Woho akɔna wakalɔmbwamaka etshumanelo kakɔ kɛsɔ na?
• Lo yoho yakɛnamaka hwe, oma lo na akatshikitanaka Akristo wa l’eleko ka ntondo l’anto akina na?
[Kartɛ ka lo lɛkɛ 7]
(Dia mbeya awui tshɛ enda l’okanda)
Bɛtshi dia kɛtɛ diakakome lokumu l’ɔlɔlɔ l’eleko ka ntondo
Anto amɔtshi wa lo bɛtshi dia kɛtɛ nyɛ wakayala ambetawudi
[Esato wa lo lɛkɛ 7]
Akristo wa ntondo wakasambishaka Dui dia Nzambi la dihonga
Etena kakakawatɛngɔlaka, Akristo wakalongwamaka laka anyawɔ wa lo mbetawɔ