Tshumanelo dia Keketshanya lo Ngandji ndo lo Kâmɛ
Ondo wɛ ambɔtɔka lo sanganya mɔtshi yaki Ɛmɛnyi wa Jehowa lo etshumanelo kosukanyi la lâma wodjashiyɛ. Lɛkɔ, anto wa l’ɛnɔngɔ tshɛ wa lo tshunda—nkumbo, enyemba, epalanga, ndo ɛlɔngɔlɔngɔ—wekɔ lɛkɔ. Vɔ tshɛ wekɔ kâmɛ l’ɔtɛmwɛlɔ awɔ ndo wekɔ lo ndjasha dia kimanyiya anto akina.
Etena tshɛ kalanga lofulo lɔmɔtshi la woke l’anto kamba kâmɛ, ɛlɔmbwɛlɔ kɛmɔtshi kekɔ ohomba monga lawɔ. Nzambi ekɔ Nzambi k’ekongelo; omalɔkɔ, ekongelo kɛsɔ pombaka mɛnama l’etshumanelo k’anto ande. Oko wâki l’eleko ka ntondo, ɛlɔ kɛnɛ nto, Akristo wambotshunda wɛɔngɔ, wele l’akoka ndo wambohokɔ awui efula, wakasɔnwama oko dikumanyi kana emendji. Anto asɔ wekɔ lo nɔmbɔla etshumanelo ndo wekɔ lo kotsha ehomba atɔ wa lo nyuma. Apami akina wa kɔlamelo w’elamɛ ekambi w’olimu wekɔ lo mbakimanyiya. Anto asɔ hawolongola difuto koyanga matambishi, koko vɔ wekɔ lo kamba la lolango lawɔ, vɔ tanaka falanga ya kotsha ehomba awɔ paka oma l’elimu awɔ wa l’emunyi.—1 Koreto 14: 33, 40; Filipi 1:1; 1 Timote 3:8, 9.
Woho akɔna wasɔnama anto asɔ na? Vɔ pombaka ndjâla ekambi wa Nzambi wa kɔlamelo wakotsha akoka amɔtshi walɔmbama oma l’Afundelo. L’atei w’akoka akɔ, amɔtshi anɛ: vɔ pombaka monga la ‘mbekelo y’ɔlɔlɔ, la ekanelo k’efula, la kongamu, nongolaka anto, la akoka wa mbetsha, la ekanelo ka lomba, aha ndjâla angɛnyi wa falanga; pombaka vɔ nɔmbɔla wa lo luudu lawɔ yoho y’ɔlɔlɔ; vɔ hawohombe ndjâla ambetawudi w’eyoyo; vɔ pombaka nto ndjâla la lokumu l’ɔlɔlɔ le anto wa l’andja w’etshumanelo; l’ekomelo, vɔ pombaka ‘matema mâ lo dui dia kɔlamelo lo kɛnɛ k’endana l’olakanyelo.’—1 Timo- te 3:1-15; Tito 1:7-9.
Aha etshumanelo kasɔnɔla anto asɔ l’olimu awɔ, nɛ dia mbala mɔtshi, tɔ mbeyaka kengama l’Akristo w’eyoyo. Kema, vɔ sɔnwamaka oma le apami wambotshunda wɛɔngɔ ndo wambohokɔ awui efula, wele dikumanyi ndo wele la ɛsɛdingwelo kahombama dia mɛna lo yɛdikɔ yakɔna yakotsha anto asɔ akoka walɔmbama oma l’Afundelo. L’ɔkɔngɔ diko, ɛsɔnwɛlɔ wa dikumanyi la w’ekambi w’olimu ndjosalemaka oma l’ɛlɔmbwɛlɔ k’Olui Walɔmbɔla w’Ɛmɛnyi wa Jehowa, lo ndjela ɛnyɛlɔ kakatshike etshumanelo k’Akristo wa l’eleko ka ntondo.
Dikumanyi kana emendji ɛsɔ kema ɔnɔngɔ ɔmɔtshi w’ewandji w’ɔtɛmwɛlɔ; vɔ kema ewandji lâdiko di’akina. Oko akadite Yeso, onto tshɛ lele ɔnɔmbɔdi pombaka ndjâla ɔhɔmbɔ w’anto tshɛ. Lo tshumanelo di’Ɛmɛnyi wa Jehowa, mɛtɛ, dikumanyi diekɔ lo kamba kâmɛ dikambo dia Diolelo dia Nzambi.—Mateu 20:26, 27; 23:8-11; Romo 12:8; 1 Koreto 3:5; 4:1, 2; Kolosai 4:11; 1 Tesalonika 5:12-14.
Oko wewɔ emendji, vɔ wekɔ lo nɔmbɔla wetshelo washama lo sanganya ndo wekɔ lo mbisha ɛnyɛlɔ l’olimu w’esambishelo. Sambisha lokumu l’ɔlɔlɔ la Diolelo lo mbilo k’otondo kakawawosha mbele oweso wa ntondo w’etshumanelo. Emendji kambaka nto oko alami w’ɛkɔkɔ, lâma wembolawɔ anto wa l’etshumanelo dia mbakeketsha lo ndjela ehomba awɔ.—Mateu 24:14; Etsha 1:8; 1 Tesalonika 2:11, 12; 5:14, 15; 2 Timote 2:24-26; Heberu 13:17; Jakoba 5:13-16; 1 Petero 5:1-4.
Dikumanyi diekɔ nto l’ɔkɛndɛ wa pangwɛ ndo mpokola onto tshɛ layadja lo mboka ka kɔlɔ ndo lele lo wâle wa mbisanya pudipudi ka lo nyuma la ka lɔkɛwɔ ndo kâmɛ k’etshumanelo.—1 Ko- reto 5:4, 5, 7, 11-13; Tito 1:9; 2:15; 3:10, 11.
Mbɔtɔnganɛ l’etshumanelo mbala la mbala ayokosha ɛlɔlɔ efula wa lo nyuma, ndo wɛ ayonga l’atei a lɔngɛnyi l’ɔlɔlɔ efula layoyototana lɛkɔ.—Osambu 35:18; 84:10.
• Wâ na akɔna wênda akambo wa l’etshumanelo tshɛ na?
• Lo ndjela akambo akɔna wasɔnwama emendji ɛsɔ na?
• Naa ɛkɛndɛ awɔ na?
[Esato wa lo lɛkɛ 13]
Emendji mbetshaka etshumanelo, mbishaka ɛnyɛlɔ l’olimu w’esambishelo ka luudu la luudu, keketshaka Akristo akina oma lo waembwelo awɔ w’alami w’ɛkɔkɔ, ndakaka ndo pangwɛka naka ohomba wekɔ