Sanganya Yatotshutshuya lo Ngandji ndo l’Elimu w’Ɔlɔlɔ
Akristo wa ntondo wakasanganaka esangɔ tshɛ lo mvudu ya lânde dia ndjolongola wetshelo ndo dia ndjokeketshanya onto la onyande l’ɔngɛnɔngɛnɔ. Ɛlɔ kɛnɛ, tshumanelo di’Ɛmɛnyi wa Jehowa sanganaka mbala shato lo lomingu. Wɛ ambelamɛ lo losanganya lɔmɔtshi la l’atei a sanganya yakɔ. Sanganya yawɔ kema la nsɛlɛmɔni mɔtshi kana ɔlɛkɔnya w’alengo, koko yɔ kotolaka yâmbalo y’ampokami oya lo wetshelo wa Nzambi. Sanganya y’etshumanelo tatɛka ndo ndjihɛka l’osambu ndo la dɔmbɛlɔ. Ndoko onto lashimbawɔ dia mbɔtɔ lɔkɔ ndo ndoko ɛkɔngɔ wakɔngwama lɛkɔ.— Etsha 4: 23- 31; 14:22; 15:32, 35; Romo 16:5; Kolosai 4:15.
Ondo dako dia lo sɛkɛ dia taahe 45 diayonga losanganya la ntondo layoyɔtɔ, lɔ tɛkɛtaka akambo w’endana la wetshelo wa lo Bible, la pɔlɔfɛsi mɔtshi kana l’alako w’endana la lɔsɛnɔ l’Okristo. Oma lo dako sɔ ko wekelo ɔmɔtshi wa Bible wotumbi oma lo artikɛlɛ ɔmɔtshi wa La Tour de Garde wakalɔngɔswama lo yoho ya lânde dia ndjêkama lo etshumanelo. Ɔnkɔnɛ mbasalema wekelo akɔ: Onto ɔmɔtshi ayala palagalafɛ kɛmɔtshi ka lo La Tour de Garde, ko l’ɔkɔngɔ diko, ɔnɔmbɔdi ayoyôka wembola wotumbi oma lɔkɔ, onto tshɛ lalanga kadimola lo wombola memɛka lonya. Waɔmbwɛlɔ efula mbishamaka esangɔ tshɛ lo palagalafɛ la palagalafɛ. Wekelo ɔsɔ mongaka edja k’oshidi a tango ɔtɔi.
Nshi mɔtshi l’ɔkɔngɔ diko, lo lomingu lakɔ lâmɛ, sanganya mɔtshi hiende ya taahe 45 l’ɔmɔmɔ salemaka. Losanganya la ntondo ele Kalasa k’Olimu wa Teokrasi. Lɔ têtshaka woho wa sho kɔngɔnya sango mɔtshi y’endana l’asawo wa lo Bible ndo dia mbetsha anto lo yoho y’oshika. Oma lasɔ kete wetshelo ɔmɔtshi wa lânde wa taahe 21 wamboya, ambeki wakasɔnwama la ntondo mbishaka asawo wa tomondo mondo. L’ɔkɔngɔ wa sawo la sawo, ombetsha wa lo kalasa mbishaka ombeki alako dia mbɛ̂nya woho wa nde ndjalowanya. Abuku wotshikitanyi wakasalema dikambo dia kalasa kɛsɔ. Wanɛ w’ɔtɔ mbala la mbala lo sanganya kokaka fundja kombo yawɔ lo kalasa kɛsɔ endaka vɔ wekɔ la lɔsɛnɔ l’ɔtɔnɛ l’ɛlɛmbɛ w’Akristo.
Losanganya layela mbelamɛka ɔnɛ: Losanganya l’Olimu. Lɔ lekɔ la tenyi sato kana nɛi di’endana l’esambishelo ka lokumu l’ɔlɔlɔ lo luudu la luudu kana la waɛnamelo akina w’olimu. Tenyi sɔ salemaka oko alako, ɛkɛtshanyelo kana la diɛnyɛlɔ dimɔtshi, ndo la waɔmbwɛlɔ amɔtshi oma le ampokami. Etenyi ka woke k’ekongelo tomba oma l’Olimu Aso wa Diolelo, dikatshi dimɔtshi dia wetshelo diele la ndjɛkɛ nyɛi diatomba ngɔndɔ tshɛ oma le la Société Watch Tower.
Losanganya lokina ele wekelo wa lomingu tshɛ wasalema lo tolui tatshumana esangɔ tshɛ lo mvudu ya lânde yɔsɔnwami lo mbilo k’otondo k’etshumanelo. Wekelo ɔsɔ tomba oma lo Bible ndo oma lo dibuku di’eke ka tomba oma le la Société. Oko wele anto kema efula l’olui, diaaso di’ɔlɔlɔ diekɔ le onto l’onto dia nde mbidja lokolo l’atei w’ɔkɛtshanyelo, ndo dui sɔ diekɔ diaaso dia dimɛna efula le ampokami dia vɔ mbeyana onto la onyande.
Tshumanelo efula mbɔtɔka sanganya yawɔ lo Mbalasa ya Diolelo yakahikama oma le Ɛmɛnyi wa Jehowa. Falanga ya mpika tomba oma lo weshasha wa la lolango waki Ɛmɛnyi vɔamɛmɛ, ndo lo tena efula tumu shɔ salemaka aha la kimɔ falanga oma le akambi wahone difuto. Tɔshɛtɛshɛtɛ ta weshasha kitshamaka lo sanganya tshɛ lo dikambo dia wanɛ walanga kimɔ weshasha ɛmɔtshi.
Sanganya ya l’etshumanelo kimanyiyaka Ɛmɛnyi wa Jehowa dia vɔ ndjela dako nɛ dioshami lo Heberu 10:24, 25: “Tukananeli untu l’untu dia [tshutshuyana, NW] lu ngandji la lu elimu w’ololo. Tatukimoki nsangana kame, uku eli etshelu k’amotshi, keli tukikitshanyaki. Tuleki ntsha okone, ne dia [tambɛna shate, NW]: Lushi lako laya suki.”
• Naa waɛnamelo amɔtshi wakatanemaka paka lo sanganya y’Akristo wa ntondo watanema ɛlɔ kɛnɛ lo sanganya y’Ɛmɛnyi wa Jehowa na?
• Kɔndɔla akambo watɛkɛtama lo sanganya tshanu y’ɔtɔ Ɛmɛnyi esangɔ l’esangɔ.
• Woho akɔna wakondjama mbalasa ya sanganya na?
[Esato wa lo lɛkɛ 14]
Ekumanyi kɛmɔtshi alɔmbɔla wekelo wa La Tour de Garde, lo Etats-Unis
Kɛnyɔ miɔtshi ya lo Kalasa k’Olimu wa Teokrasi, la îles de Féroé
Wekelo wa l’olui lo luudu lɔmɔtshi la lânde, la Yap
Mbalasa ka Diolelo ka la New Braunfels, Texas, U.S.A., kakahikama lo nshi hiende oma le Ɛmɛnyi wa Jehowa
[Esato wa lo lɛkɛ 15]
Mbalasa ya Diolelo lo wedja wotshikitanyi
Japon
Australie
Autriche
Espagne