Tambokelɛ la wangasanu tshɛ

ONDO wɛ ambetaka la Mbalasa kɛmɔtshi ka Diolelo k’Ɛmɛnyi wa Jehowa ndo amboyambolaka kɛnɛ kasalawɔ lɔkɔ. Onde wɛ mbeyaka dia nsanganya yawɔ ya lomingu la lomingu yekɔ dikambo di’anto tshɛ? Angɛndangɛnda ndjayolamaka la wangasanu tshɛ.

Koko wɛ mbeyaka monga la ambola amɔtshi. Lande na kasangana Ɛmɛnyi wa Jehowa kâmɛ? Kakɔna keta lo nsanganya shɔ? Ndo kakɔna kata angɛndangɛnda wele kema Ɛmɛnyi wa Jehowa lo kɛnɛ kendana la nsanganya shɔ na?

“Kanyusanganya antu”

Oma ko nshi y’edjedja, anto wakasanganaka dia tɛmɔlaka ndo mbekaka akambo wendana la Nzambi. Ambeta ɛnɔnyi suke la 3 500, wakatɛ ase Isariyɛlɛ ɔnɛ: “Kanyusanganya antu, apami, amantu, ana wa tshitshe, la angendangenda wudjashi l’atei w’esumba anyu, dia vo mbuka la mbeka lama mbuka [Jehowa, Nzambi k]anyu, woma, la dia nama ololo dia ntsha aui tshe w’elembe ene.” (Euhwelu k’Elembe 31:12) Ɔnkɔnɛ, lo Isariyɛlɛ ndo epalanga ndo akɛnda waketshamaka woho wa tɛmɔla ndo kitanyiya Jehowa Nzambi.

Ntambe efula l’ɔkɔngɔ etena kakakengama etshumanelo k’Akristo, nsanganya yakatetemala monga dikambo di’ohomba l’ɔtɛmwɛlɔ wa mɛtɛ. Ɔpɔstɔlɔ Paulo akafunde ate: “Tukananeli untu l’untu dia ntomboshanya lu ngandji la lu elimu w’ololo. Tatukimoki nsangana kame, uku eli etshelu k’amotshi, keli tukikitshanyaki.” (Heberu 10:24, 25) Oko watokeketshamaka dimama dia lo nkumbo etena ketsha ase nkumbo wenya kâmɛ, mbakeketshama ndo dimama dia ngandji dia lam’asa anto walanga kambɛ Nzambi etena kasanganawɔ kâmɛ dia mbɔtɛmɔla.

Lo yoho yɔtɔnɛ la avɛsa wa la diko ango, Ɛmɛnyi wa Jehowa sanganaka kâmɛ lo Mbalasa yawɔ ya Diolelo mbala hiende lo lomingu. Nsanganya kimanyiyaka wanɛ wayɔtɔ dia shihodia atɔndɔ wa lo Bible ndo kamba la wɔ. Lɛnɛ akoka salema dikambo sɔ, ekongelo kâmɛ salemaka l’andja w’otondo ndo losanganya tshɛ lekɔ la oyango alɔ wa shikaa. La ntondo ndo l’ɔkɔngɔ wa nsanganya, wanɛ wɔtɔ lo nsanganya yakɔ ‘keketshanyaka’ oma lo asawo awɔ wakeketsha. (Romo 1:12) Kakɔna keta l’oseka losanganya tshɛ?

Sawo di’oma lo Bible

Losanganya la ntondo laleka mbɔtɔ anto efula ele sawo di’oma lo Bible diendana l’anto tshɛ diasalema mbala efula Lushi la samalo la la lomingu. Yeso Kristo akashaka asawo wa lo sɛkɛ mbala efula. L’atei awɔ mbele ndo Dako dia diambo efula dia lo dikona. (Mateu 5:1; 7:28, 29) Ɔpɔstɔlɔ Paulo akasha sawo la ntondo k’ase Atɛna. (Esha 17:22-34) Lo ndjela kɛnɛ kakasale Yeso la Paulo, nsanganya y’Ɛmɛnyi wa Jehowa yekɔ ndo la sawo dia lo sɛkɛ dialeka mendana l’anto tshɛ. Ndo le anto amɔtshi, ɔsɔ mbele losanganya la ntondo lɔtɔwɔ lɔkɔ.

Losanganya tatɛka la osambo ɔmɔtshi w’oma lo dibuku Totombole Jehowa l’esambo aso.a Wanɛ tshɛ wakombola memala dia memba kâmɛ l’anto akina nɔmbamaka dia sala ngasɔ. L’ɔkɔngɔ wa dɔmbɛlɔ dia lo tshena pe, ɔtɛkɛtshi ɔmɔtshi wa manamana mbishaka sawo dimɔtshi dia minitɛ 30. (Enda kiombo yele l’ɔtɛ a dui ɔnɛ “Asawo w’ohomba wendana l’anto tshɛ.”) Sawo diande mbɔsamaka tshɛ oma lo Bible. Ɔtɛkɛtshi nɔmbaka ampokami mbala la mbala dia vɔ nyanga avɛsa wa lo Bible ndo mboyela etena kadiande avɛsa akɔ. Omalɔkɔ, wɛ kokaka ndja la Bible kayɛ kana nɔmba Ɔmɛnyi wa Jehowa ɔmɔtshi dia nde kosha Bible kande la ntondo ka losanganya.

Wekelo wa Tshoto y’Etangelo

Lo tshumanelo efula di’Ɛmɛnyi wa Jehowa, sawo dia lo sɛkɛ ndjelanaka la wekelo wa Tshoto y’Etangelo wasalema l’edja k’oshidi a tango ɔtɔi l’ekimanyielo k’ɔkɛtshanyelo wa ambola l’ekadimwelo wa dikambo dimɔtshi diɔsami oma lo Bible. Losanganya lɔsɔ keketshaka anto tshɛ wɔtɔ lɔkɔ dia vɔ ndjela ɛnyɛlɔ k’ase Bɛrɔya wa lo nshi ya Paulo, wanɛ “waketawo diui l’uhetu: wakayangiayangia la lushi la lushi lu afundelu.”​—Etsha 17:11.

Wekelo wa Tshoto y’Etangelo tatɛka la osambo. Akambo wekawɔ ndo ambola wambola ɔnɔmbɔdi tanemaka lo numɛlɔ ka wekelo. Wɛ kokaka kondja Tshoto y’Etangelo mɔtshi ya wekelo oma le Ɛmɛnyi wa Jehowa. L’atei w’ɛtɛ w’asawo wakasɛdingɔma atete edja mbele ndo wɛnɛ: “Ambutshi, nyetshake ananyu la ngandji,” “Tanyukaluyake untu kolo lo kolo,” ndo “Kem’edja asui tshɛ wayanga shila.” Kânga mbele losanganya lɔsɔ nɔmbwamaka lo ambola la ekadimwelo, ampokami tshɛ mbishaka ekadimwelo la lolango lawɔ ndo mbala efula kɔmatɛrɛ mbishamaka oma le wanɛ wakatadisha ndo wakatakanyi yimba lo kɛnɛ kendana la sawo diakɔ ndo l’avɛsa wadisukɛ. Losanganya lɔsɔ komɛka la osambo ndo la dɔmbɛlɔ.​—Mateu 26:30; Efeso 5:19.

Wekelo wa Bible wa l’etshumanelo

Dikɔlɔ ɔtɔi oseka lomingu tshɛ, Ɛmɛnyi wa Jehowa sanganaka lo Mbalasa ka Diolelo lo losanganya lele la tenyi sato laviya wonya a tango ɔtɔi la minitɛ 45. Etenyi ka ntondo ko Wekelo wa Bible wa l’etshumanelo wɔsa minitɛ 25. Vɔ kimanyiyaka wanɛ wɔtɔ lɔkɔ dia vɔ ndjaekesanyiya la Bible yawɔ, tshikitanya tokanyi ndo waonga awɔ ndo ndjalowanya oko ambeki wa Kristo. (2 Timote 3:16, 17) L’ɛnyɛlɔ ka wekelo wa Tshoto y’Etangelo, losanganya lɔsɔ nɔmbwamaka lo ambola la ekadimwelo wa dikambo dimɔtshi diɔsami oma lo Bible. Wanɛ walanga mbishaka kɔmatɛrɛ. Wekelo wa Bible wa l’etshumanelo salemaka l’ekimanyielo ka dibuku kana biukubuku mɔtshi yakatondjama oma le Ɛmɛnyi wa Jehowa.

Lande na kakambawɔ la ekanda walembetshiya Bible lo losanganya lɔsɔ? Tatɛ oma lo nshi yakafundamaka Bible, anto kokomɛka tsho lo mbadia Ɔtɛkɛta waki Nzambi. ‘Vɔ wakalembetshiyamaka, wakashaka kitshimudi yawɔ ndo anto wakashihodiaka wadielo.’ (Nehemiya 8:8) L’ɛnɔnyi weke kambeta ɛnɛ, ekanda walembetshiya dibuku dia Isaya, dia Danyele ndo dia Enyelo wakakimanyiya wanɛ wakɔtɔka lo losanganya lɔsɔ dia shihodia tenyi dia Bible sɔ.

Kalasa k’olimu wa teokrasi

L’ɔkɔngɔ wa Wekelo wa Bible wa l’etshumanelo, Kalasa k’olimu wa teokrasi salemaka. Losanganya la minitɛ 30 lɔsɔ lekɔ la oyango wa kimanyiya Akristo dia vɔ monga la ‘diewo dia mbetsha.’ (2 Timote 4:2) Ɛnyɛlɔ, onde ɔnayɛ kana ɔngɛnyi ayɛ ɔmɔtshi atakokaka dimbola dimɔtshi diendana la Nzambi kana la Bible diakayɛnyi wolo kadimola? Kalasa k’olimu wa teokrasi kokaka ketsha dia wɛ mbisha okadimwelo wakeketsha ndo wotombi oma l’atei wa Bible lo ambola wa wolo efula. Ɔnkɔnɛ, sho kokaka mbuta oko wakate ɔprɔfɛta Isaya ate: “Khumadiondjo, [Jehowa] lambumbisha lulimi l’uluwanyi la dimi mbeya ndakanya one lambokomo.”​—Isaya 50:4.

Kalasa k’olimu wa teokrasi tatɛka la sawo dimɔtshi diɔsami oma lo etenyi kɛmɔtshi ka lo Bible kakawakeketsha ampokami tshɛ dia vɔ mbadia lomingu letshi. L’ɔkɔngɔ wa sawo sɔ, ɔtɛkɛtshi nɔmbaka ampokami dia mbisha kɔmatɛrɛ ya lo tshena pe yendana la awui wakawɛnyi ohomba lo etenyi kakawalongola ɔkɛndɛ wa tadia. L’ɔkɔngɔ w’ɔkɛtshanyelo, ambeki wakasɔnama dia mbisha asawo mbishaka asawo awɔ.

Ambeki nɔmbamaka dia mbadia etenyi kɛmɔtshi ka Bible oma lo lɔyɛnga kana mɛnya woho wa mbetsha onto okina dui dimɔtshi di’oma l’Afundelo. L’ɔkɔngɔ wa sawo tshɛ, ondaki ɔmɔtshi wa manamana mandolaka ombeki lo dikambo dimɔtshi dia dimɛna diakandasadi ndo alako ande tomba oma lo dibuku Kondja wahɔ oma lo Kalasa k’olimu wa teokrasi. L’ɔkɔngɔ diko, nde mbeyaka mbisha ombeki alako amɔtshi lo woho wakokande ndjalowanya lo shɔpɔ.

Etenyi ka losanganya keta esadi esadi kɛnɛ kekɔ la oyango wa kimanyiya aha tsho ombeki, koko ndo ampokami tshɛ wakombola ndowanya akoka awɔ wa mbadia, wa tɛkɛta ndo wa mbetsha. L’ɔkɔngɔ wa Kalasa k’olimu wa teokrasi komɛ, osambo wɔsami oma lo divɛsa dimɔtshi dia lo Bible mbɔtshiyaka Losanganya l’olimu.

Losanganya l’olimu

Etenyi k’ekomelo k’ekongelo ka nsanganya shɔ ko Losanganya l’olimu. L’ekimanyielo ka asawo, wɛnyɛlɔ, ɛkɔnya ndo ka kɔmatɛrɛ y’ampokami, wanɛ wɔtɔ lɔkɔ mbekaka woho wa mbetsha akambo wa mɛtɛ dimɛna. La ntondo ka nde toma ambeki ande dia vɔ tosambisha, Yeso akâtshumanya ndo akawasha alako. (Luka 10:1-16) Oko wakawalɔngɔswama dimɛna dia vɔ kamba olimu w’esambishelo, vɔ wakakondja etombelo efula w’amɛna. L’ɔkɔngɔ diko, ambeki waki Yeso wakakalola ndo wakayowotɛ awui wakatohomana la wɔ. (Luka 10:17) Mbala efula, ambeki wakatanɛka awui wakahomana la wɔ.​—Etsha 4:23; 15:4.

Ekongelo ka minitɛ 35 ka Losanganya l’olimu tombaka ngɔndɔ tshɛ lo Olimu aso wa Diolelo. Atete edja, sho mala mbeka awui anɛ: “Woho wa tɛmɔla Jehowa kâmɛ lo nkumbo,” “Ɔkɔkɔ wakalolaso mbala la mbala tenda anto” ndo “Tokoya Kristo l’olimu aso w’esambishelo.” Ekongelo komɛka l’osambo ndo vɔ nɔmbaka onto ɔmɔtshi la l’etshumanelo dia nde sala dɔmbɛlɔ dia ndjihelo.

Kɛnɛ kakate angɛndangɛnda amɔtshi

Tshumanelo salaka la wolo dia nongola onto tshɛ dimɛna. Ɛnyɛlɔ, Andrew akoke anto efula watɛkɛta kɔlɔ lo dikambo di’Ɛmɛnyi wa Jehowa. Koko etena kakandaye mbala kande ka ntondo lo losanganya, nde akâmbe efula lo woho wakawolongola. Nde akate ate: “Ɔsɔ aki mɛtɛ dihole dia dimɛna efula dia monga lɔkɔ. Ndo lakâmbe efula lo menda woho waki anto la loshilambo ndo wakawayashaka le mi.” Ashel lele l’ɛnɔnyi dikumi l’ɛmɔtshi lo wodja wa Canada mbutaka ate: “Losanganya laki dimɛna woho w’anyanya ndo wɔdu ndjela.”

José ɔnɛ lodjashi lo wodja wa Brésil aki la lokumu la kɔlɔ ndo akasalaka awui w’epetenge lo ngelo kawɔ. Kânga mbakinde la dionga dia ngasɔ, nde akelamɛ dia tɔtɔ lo losanganya lɔmɔtshi lo Mbalasa ka Diolelo ka lo ngelo kawɔ. Nde mbutaka ate: “Kânga mbakaweyaka lɔkɛwɔ laki la mi ntondo, wanɛ waki lo Mbalasa ka Diolelo wakanongola la wangasanu tshɛ.” Atsushi ladjasɛ lo wodja wa Japon mbutaka ate: “Dimi pombaka mbetawɔ dia mbala ka ntondo kakamɔtɔ lo losanganya l’Ɛmɛnyi wa Jehowa, dimi kondeka ndjaoka dimɛna. Kânga mbakidiɔ ɔsɔku, lamboyokoma lo shihodia dia vɔ wekɔ anto wa shikaa. Vɔ mɛtɛ wakasale la wolo dia dimi ndjaoka dimɛna.”

Tambokelɛ ndo wɛ lawɔ

Oko wadiɛnya ɛtɛkɛta wa la diko engo, mbɔtɔ lo nsanganya lo Mbalasa ka Diolelo kokaka monga dui dia dimɛna efula. Wɛ ayeka akambo wendana la Nzambi ndo lo tshimbo ya wetshelo wotombi oma lo Bible wayoyolongola lɛkɔ, Jehowa Nzambi ayoketsha woho wa wɛ ‘ndjakondjɛ wahɔ.’​—Isaya 48:17.

Nsanganya y’Ɛmɛnyi wa Jehowa yekɔ ofele ndo hawɔkɔngɔla ɛkɔngɔ. Onde wɛ nangaka mbɔtɔ lo losanganya lɔmɔtshi lo Mbalasa ka Diolelo ka lo ngelo kanyu? Tambokelɛ l’ɔngɛnɔngɛnɔ tshɛ lɔkɔ.

[Nɔte ka l’ɛse ka dikatshi]

[Kiombo ya lo lɛkɛ 30]

Asawo w’ohomba wendana l’anto tshɛ

Asawo w’oma lo Bible mbɔsamaka oma l’ɛtɛ w’awui ndekana 170 w’oma lo Afundelo, mbidja ndo wayela anɛ:

◼ Bonde kahombayɛ mbeya woho wakatɔngɔ onto?

◼ Lokanyi la Nzambi lo dikambo dia diwala la lɔkɛwɔ lendana l’akambo wa dieyanelo

◼ Wanɛ walanya nkɛtɛ wayolongola dilanya oma le Nzambi

◼ Ngande wakokaso ndɔshana l’ekiyanu wa lo lɔsɛnɔ?

◼ Tshɛ ayokomɛ paka la lɔsɛnɔ lɔnɛ?

[Osato wa lo lɛkɛ 30]

Sawo di’oma lo Bible

[Osato wa lo lɛkɛ 30]

Wekelo wa “Tshoto y’Etangelo”

[Osato wa lo lɛkɛ 31]

Wekelo wa Bible wa l’etshumanelo

[Osato wa lo lɛkɛ 31]

Kalasa k’olimu wa teokrasi

[Osato wa lo lɛkɛ 32]

Losanganya l’olimu