Tshapita 10

Yeso otsha la Jerusalɛma

ELEKO kamɔnga akatshi kambokoka. Etena kambokoka ka nkumbo ka Yɔsɛfu kâmɛ la wanɛ wôtɔ lawɔ munda lɔkɛndɔ lokowosalaka ɔnɔnyi l’ɔnɔnyi l’eleko kamɔnga akatshi otsha la Jerusalɛma dia tosala difɛstɔ di’Elekanelo. Lam’akawakimɛ lɔkɛndɔ laki la yɛdikɔ ya kilɔmɛtɛlɛ suke la 100, vɔ waki l’ɔngɛnɔngɛnɔ wokongaka lawɔ tena tshɛ diakawatshɔka otsha lɛkɔ. L’etena kɛnɛ, Yeso ekɔ l’ɛnɔnyi dikumi l’ehende, ndo nde ekɔ lo kongɛ difɛstɔ sɔ la saki k’efula.

Le Yeso la nkumbo kande, difɛstɔ di’Elekanelo bu dikambo dia lushi ɔtɔi loto. Vɔ wayotshikala la Jerusalɛma dia sala Difɛstɔ di’Ekate waha l’Edia, difɛstɔ sɔ salemaka l’edja ka nshi esambele ndo vɔ diɔsaka oko etenyi kɛmɔtshi k’etena k’Elekanelo. Diɔ diakɔ diele, otshwelo awɔ oma la Nazarɛta otsha la Jerusalɛma, la okalwelo awɔ, mbidja ndo nshi yayowotshikala la Jerusalɛma, mbɔsaka suke la yɛdikɔ ya mingu hiende. Koko ɔnɔnyi ɔnɛ, vɔ wayotshikala lɛkɔ edja efula l’ɔtɛ wa dikambo dimɔtshi diayosala Yeso.

Dikambo sɔ diambɛnama lam’ayawakalola oma la Jerusalɛma. Yɔsɛfu nde la Mariya wekɔ lo fɔnya ɔnɛ Yeso akɔtwɛ l’ɔnɔngɔ w’ewotɔ ande l’angɛnyi ande wele lo lɔkɛndɔ kâmɛ la wɔ. Koko, wemale l’otsho, ɛnyiwɔ ko Yeso bu, ko vɔ tatɛ mboyanga l’atei w’asekawɔ wa lɔkɛndɔ. Koko hawowɛnyi. Ɔnkɔnɛ, Yɔsɛfu nde la Mariya wambokalola la Jerusalɛma dia ndjôyanga.

Vɔ wambôyanga lushi l’otondo, koko hawowɛnyi. Lushi la hende, hawowɛnyi nto. L’ɔkɔngɔ diko ɔnɛ ambowoyotshɔ lushi la sato otsha lo tɛmpɛlɔ. Lɛkɔ mbambowotɛna Yeso lo luudu lɔmɔtshi odjashi l’atei w’embetsha w’Ase Juda, awahokamɛ ndo awaoka wembola.

Mariya mbawombolande ate: “On’ami, ukundi ambuyututshela okone na? Enda, dimi la sho tambukuyanga la lunyangu.”

Yeso ambamba l’ɔtɛ w’ɔnɛ vɔ haweye dihole diahombawɔ mbotana. Mbawambolande ate: “Katanyanyangi na? Nyu hanyeyi nyati: Dieli la mi dia ndjala lu luudu la Papa?”

Yeso hoke lande na kaheye ambutshi ande dikambo sɔ. Aha la tshimbatshimba, nde akakalola kâmɛ lawɔ ndo akatetemala kitanyiya awui awɔ. Nde akatahamaka lo lomba, lo diema dia demba, ndo lo ngandji le Nzambi la le anto. Eelo, tatɛ oma ko dikɛnda diande, Yeso ekɔ lo tosha ɛnyɛlɔ k’ɔlɔlɔ, aha paka lo mbidja yimba l’akambo wa lo nyuma koko ndo lo nɛmiya ambutshi ande. Luka 2:40-52; 22:7.

▪ Lɔkɛndɔ lakɔna lasala Yeso kâmɛ la nkumbo kande mbala la mbala l’eleko kamɔnga akatshi, ndo nshi ngana yasalema lɔkɛndɔ lakɔ lɔsɔ na?

▪ Dikambo diakɔna diambototomba lo lɔkɛndɔ losadiwɔ lam’ele Yeso l’ɛnɔnyi dikumi l’ehende?

▪ Ɛnyɛlɔ kakɔna kambosha Yeso ɛlɔngɔlɔngɔ l’esekaseka wa nshi nyɛ?