Tshapita 11

Joani ambɔlɔngɔsɔla mboka

ƐNƆNYI dikumi l’esambele wambeta tatɛ oma lo lushi lakokaka Yeso embetsha wembola lo tɛmpɛlɔ, lâso ko nde ele l’ɛnɔnyi 12. Kakianɛ, taya l’eleko kamɔnga akatshi ka l’ɔnɔnyi 29 T.D., ndo ondo anto tshɛ wekɔ lo tɛkɛta dikambo dia Joani, ɔn’aki enondo wa nyango Yeso, ɔnɛ lasambisha lo bɛtshi dia nkɛtɛ tshɛ diele l’emamu w’Ɔkɛdi wa Jɔrɔdana.

Mɛtɛ, Joani ekɔ pami ka diambo, oyadi lo diema diande kana l’awui watande. Nde ndɔtaka dihɔndɔ dia diɔsa dia kamɛlɔ, ndo oya w’ekoho ka nyama lo lokende. Nde ndɛ̂ka ɛndjɔ la osanga. Losango lakɔna lasambishande na? Losango lakɔ lɔ lɔnɛ: “Nyukadimuli etema, ne dia diulelu dia l’ulungu diaya suki.”

Losango lɔsɔ nkotolaka yambalo y’ampokami ande. Efula wamboshihodia dia vɔ pombaka ndjâtshumuya, mbuta ate kadimola nkɛwɔ yawɔ ndo tshika ditshelo diawɔ di’edjedja lo diɔsa oko akambo wa wɔnɔnyi. Diɔ diakɔ diamboya anto efula oya le Joani, vɔ ndja oma lo bɛtshi dia nkɛtɛ diele l’emamu wa Jɔrɔdana, ndo oma la Jerusalɛma, ko nde ekɔ lo mbabatiza lo mbatambiya l’ashi wa Jɔrɔdana. Lande na?

Batismu ka Joani kekɔ didjidji kana mɛnyaka ɔnɛ wanɛ wakilongola wamboyatshumuya l’otema ɔtɔi lo pɛkato yakawasale lam’akawɔnyɔla Ɛlɛmbɛ wa Nzambi. Ɔnkɔnɛ, lam’akaye Afarisɛ amɔtshi kâmɛ l’Asadukɛ oya lo Jɔrɔdana, Joani kombaenda la sso di’ɔlɔlɔ. Nde akawatɛ ate: “Nyu ana w’akhuha!  . . . Nyoto elua uku ukadimudinyu etema. Tanyukanaki l’etema anyu nyati: Shu teko la tshesu Abarahama. Dimi lambunyutela nti: [Nzambi, NW] mbeyaka mbulwela Abarahama tukanula uma lu ave ane. Kakiane kenge yambukitshama la tshina di’etamba. Okone utamba tshe wahato elua w’ololo ayokotama, ayukadjema lu dja.”

Joani ekɔ lo nkotola yambalo y’anto efula, diɔ diakɔ diambotoma Ase Juda ɛlɔmbɛdi l’Ase Lɛwi otsha le nde. Wambowombola vate: “We na?”

Joani ambosuya ate: “Dimi kema Kristu.”

Vɔ wambowombola nto vate: “Ya we na? Elidja keye?”

Nde ambâkadimola ate: “Dimi laha ndi.”

“Umvutshi mbeye?”

Ko nde ate: “Kema.”

Vɔ wambotetemala mombola vate: “Akona eye na? dia shu nkaluya diui le wane wakatutumi. Kayataye eye na?”

Joani mbâlembetshiyande ate: “Dimi leko diui dia untu lahangohango l’usui ati: Nyusimbuli mbuka ka [Jehowa]! uku akati umvutshi Isaya.”

Vɔ wambowombola nto vate: “Naka we oso aha Kristu, aha Elidja, aha umvutshi, ku ya ukundi atuyubatizaka?”

Nde ambâkadimola ate: “Dimi latubatizaka l’ashi. L’atei anyu kemadi one lahanyeyi. Ndi kayayi l’okongo ami.”

Joani ekɔ lo nɔngɔsɔla mboka lo yoho yalɔngɔsɔlande etema w’anto dia vɔ ndjetawɔ Mɛsiya, ɔnɛ layoyoyala Nkumekanga. Ɔnkɔnɛ mbata Joani lo dikambo dia Mɛsiya akɔ: “One layayi [ndekami, NW] wulu. Dimi kema ololo wukukimi nkelekula okodi a sabata yandi.” Mɛtɛ, Joani ekɔ lo mbuta nto ate: “One layayi l’okongo ami, keli la ntundu kami, ne dia ndi aki la ntundu kami.”

Ɔnkɔnɛ, losango la Joani l’ɔnɛ “diulelu dia l’ulungu diaya suki,” lekɔ diewoyelo diewoyama le anto tshɛ ɔnɛ: kem’edja nto, Yeso Kristo, Nkumekanga kɔsɔnwami oma le Jehowa, aya suke la tatɛ olimu ande. Joani 1:6-8, 15-28; Mateu 3:1-12; Luka 3:1-18; Etsha 19:4.

▪ Woho akɔna w’onto wele Joani?

▪ Lande na kabatiza Joani anto?

▪ Lande na kakoka Joani mbuta ɔnɛ Diolelo diaya suke?