Yeso aya Mɛsiya

Joani akasambishaka ɔnɛ: ‘Onto ɔmɔtshi londeki ekɔ lo ndjaye.’ Lam’aki Yeso l’ɛnɔnyi oko 30, nde akaye oma la Ngalileya l’Ɔkɛdi wa Jɔrdana lɛnɛ akabatizaka Joani anto. Yeso akalange dia Joani mbobatiza, koko Joani akate ate: ‘Dimi halakoke kobatiza. Wɛ mbahomba batizami.’ Yeso akatɛ Joani ate: ‘Jehowa nangaka dia wɛ batizami.’ Ɔnkɔnɛ vɔ wakatshu l’Ɔkɛdi wa Jɔrdana ndo Joani akadindja Yeso la tshondo tshɛ l’ashi.

L’ɔkɔngɔ wa Yeso ntomba oma l’ashi, nde akalɔmbɛ. L’etena kɛsɔ, olongo wakadihɔ ndo nyuma ka Nzambi kakaye le nde oko fudu k’enga. Ko Jehowa akatɛkɛta oma l’olongo ɔnɛ: “Wɛ ekɔ Ɔnami, ɔnɛ lokami ngandji; dimi lamboketawɔ.”

Lam’akaye nyuma ka Jehowa le Yeso, nde akakome Kristo kana Mɛsiya. Kakianɛ nde akahombe ntatɛ olimu wakotome Jehowa dia ndjosala la nkɛtɛ.

Mbala kakɔ ɔtɔi l’ɔkɔngɔ wa batisimu kande, Yeso akatshu l’oswe ndo akatetsha nshi 40 lɛkɔ. Etena kakandakalola, nde akatshu dia tenda Joani. Lam’akayayaka Yeso oya le nde, Joani akate ate: ‘Ɔnɛ ekɔ Ɔna Ɔkɔkɔ wa Nzambi layonya pɛkato y’andja.’ Lo mbuta ngasɔ, Joani akewoya anto dia Yeso mbaki Mɛsiya. Onde wɛ mbeyaka kɛnɛ kakakomɛ Yeso etena kakinde l’oswe? Ɛsɔ tende.