Joani ambɔlɔngɔsɔla mboka

Joani, ɔnaki Zɛkariya nde la Elizabɛtɛ, akakome omvutshi etena kakandole. Jehowa akakambe la Joani dia mbetsha anto ɔnɛ Mɛsiya ekɔ lo ndjaye. Koko lo dihole dia nde mbetsha lo waa toshinangɔnga kana l’esomba, Joani akasambishaka l’oswe. Anto wakayaka oma la Jɛrusalɛma ndo oma l’ahole tshɛ wa la Judeya dia ndjetshama oma le Joani. Nde akawaetsha ɔnɛ dia ngɛnyangɛnya Nzambi, vɔ wakahombaka ntshika nsala akambo wa kɔlɔ. L’ɔkɔngɔ wa vɔ mpokamɛ Joani, anto efula wakayatshumoya oma lo pɛkato yawɔ ndo Joani akaabatizaka l’Ɔkɛdi wa Jɔrdana.

Joani akasɛnaka lɔsɛnɔ l’ɔsɛlɛngɛ. Nde akalɔtaka dihɔndɔ diakasalema la wɛɔsa wa kamɛlɔ ndo akalɛka ɛndjɔ ndo osanga. Anto wakayangaka mbeya awui efula wendana la Joani. Kaanga waa Afarisɛ ndo Asadukɛ w’etako wakayaka le nde. Joani akawatɛ ate: ‘Nyu pombaka nsala etshikitanu lo lɔsɛnɔ lanyu ndo ndjatshumoya. Tanyɔsake dia nyu nyekɔ anto wa laande paka l’ɔtɛ watanyu dia nyu nyekɔ ana wa Abrahama. Kɛsɔ hɛnya dia nyu nyekɔ ana wa Nzambi.’

Anto efula wakayaka le Joani ndo wakawombola vate: ‘Kakɔna kahombaso nsala dia ngɛnyangɛnya Nzambi?’ Joani akatɛ ase Juda ate: ‘Naka onto ekɔ la ahɔndɔ ahende, asha ɔnɛ lele lo dihombo dimɔtshi.’ Onde wɛ mbeyaka lande na kakandate ngasɔ? Nde akalange dia ambeki ande mbeya ɔnɛ dia ngɛnyangɛnya Nzambi, vɔ pombaka mboka anto ngandji.

Joani akatɛ afutshanyi w’elambo ɔnɛ: ‘Nyonge la losembwe ndo tanyokesake onto.’ Nde akatɛ asɔlayi ate: ‘Tanyetawɔke etshimba kana mbuta kashi.’

Ɛlɔmbɛdi ndo ase Lɛwi vɔ lawɔ wakaye le Joani ndo wakawombola ɔnɛ: ‘Wɛ eyɛ? Onto tshɛ nangaka mbeya.’ Joani akate ate: ‘Dimi lekɔ dui dimɔtshi diokɛma l’oswe dialɔmbɔla anto otsha le Jehowa oko wakate Isaya.’

Anto wakalangaka kɛnɛ kakawaetshaka Joani. Anto efula wakayambolaka dia kana Joani aki Mɛsiya. Koko nde akawatɛ ate: ‘Onto ɔmɔtshi londeki ekɔ lo ndjaye. Dimi hasungana dia nkelekola kaanga ɛkɔdi wa sabata yande. Dimi lekɔ lo batiza la ashi, koko nde ayobatiza la nyuma k’ekila.’