Tshapita 33

Yeso ambokotsha pɔlɔfɛsi kɛmɔtshi k’Isaya

L’ƆKƆNGƆ wa nde mbeya ɔnɛ Afarisɛ l’aseka Hɛrɔdɛ wambowɔ̂twɛ sheke ya mbodiaka, Yeso ambotshɔ otsha lo Ndjale ka Ngalileya nde l’ambeki ande. Lɛkɔ, nyemba y’anto yamboya le nde oma la Palɛstinɛ k’otondo, ndo kânga oma la wedi w’elelo atɔ. Nde ambɔkɔnɔla anto efula, ko ndo akanga a hemɔ ya wolo tshɛ wôsusanaka dia ndjowonanda.

Lam’ele anto wamboleka efula, Yeso ambotɛ ambeki ande dia vɔ mbolamɛ wâto ɔmɔtshi. Woho wambondangana oma l’ɔkɛngɛ mbakokande mbewɔ anto di’aha vɔ mbodjaka mpika. Nde kokaka mbaetsha oma lo wâto kana têtetaka lo wedi akɔ ehende w’ashi dia takimanyiyaka anto wele lɛkɔ.

Ombeki Mateo ekɔ lo shikikɛ ɔnɛ olimu wa Yeso wambokotsha “diui diakati Isaya.” L’ɔkɔngɔ diko, Mateo ambovusola pɔlɔfɛsi kɛnɛ kambokotsha Yeso:

“Enda ukambi ami lakamasonola; ulangimi ami latongenengenelaka utema ami. Dimi layuwahe [n]yuma kami, ku ndi ayutela asi wedja dia sambu k’ololo. Ndi hutshana la antu, huhangohango. Untu huka diui diandi lu esese. Ndi huhimbula sopo diakawaminula, ndi hudima hyondo ya tala yatumba dinga, edja ndu lam’ayundela sambu k’ololo dia nembia akambu wa kolo. Ku asi wedja wayuyala la elungamelu lu lukumbu landi.”

Mɛtɛ, Yeso mbele okambi wa ngandji walangema le Nzambi. Ndo, Yeso ekɔ lo nkɛnɛmɔla kɛnɛ kelɛwɔ losembwe la mɛtɛ, losembwe ladinyadinyama oma lo mbekelo y’ɛtɛmwɛlɔ wa kashi. Lam’ele vɔ kitanyiyaka ɛlɛmbɛ wa Nzambi lo yoho ya wɛngɛngɛ, Afarisɛ hawokimanyiya kânga ose hemɔ lushi la Sabato! Ɔnkɔnɛ, lam’akɛnɛmɔlande losembwe la Nzambi, Yeso ekɔ lo ntshungola anto oma lo mbekelo y’ashidi ya kɔlɔ, ndo lo dikambo diakɔ mbayanga ewandji w’ɛtɛmwɛlɔ mbodiaka.

Kakɔna kalembetshiya dui di’ɔnɛ ‘nde hohangɔhangɔ ndo anto hawotoka dui diande lo ɛsɛsɛ’ na? Wonya wakɔnɔlande anto, Yeso ‘mbadjangɛka di’aha vɔ mbêyanya le anto.’ Nde halange di’anto pandjola lokumu lande l’ɛsɛsɛ kana dianganya nsango ya kɔlɔ lo lokombo lande.

Ndo nto, Yeso ambela losango l’ekeketshelo le anto wele, lo didjidji, oko sɔpɔ diambominwama, diambɔwɛlama ndo diambɔhɔtshahɔtshama l’ekolo. Vɔ fɔnaka la oshinga wa tala watomba edinga ndo wele shase ya komelo ya lɔsɛnɔ lawɔ yaya suke la nyimala. Yeso hɔkɔla sɔpɔ diambominwama koyanga nyima shase ya badi badi ya lo oshinga wa tala. Koko, la kɛtshi tshɛ ndo la ngandji tshɛ, nde akeyaka woho wa keketsha anto wɔnywama. Mɛtɛ, Yeso mbele onto lakoka wedja monga l’elongamelo le nde! Mateu 12:15-21; Mako 3:7-12; Isaya 42:1-4.

▪ Woho akɔna wambɔkɛnɛmɔla Yeso losembwe le anto, aha la pangɔhangɔ kana mbokiya dui diande l’ɛsɛsɛ?

▪ Wa na wele oko sɔpɔ diambominwama la oko oshinga wa tala, ndo kakɔna kâsalɛ Yeso?