Tshapita 54

“Mapa wa mɛtɛ w’oma l’olongo”

YESO akasale olimu efula lui. Nde akalesha nunu di’anto lo dihindo ko nde ndjolawɔ ɔnɛ watokoyombidja nkumekanga. L’otsho akɔ, nde akakɛndakɛnda lâdiko di’asuku wa lo Ndjale ka Ngalileya; akashimbɛ Petero, ɔnɛ lakatatɛ ninda lam’akandakɛndakɛnda lâdiko di’ashi wakasutshasutshamaka la lɔpɛpɛ la wolo; nde akɔ̂ladia asuku w’ashi dia shimbɛ ambeki ande di’aha vɔ mumbɔ la wâto.

Kakianɛ, anto wakaleshama lo dihindo oma le Yeso, lo nɔrdɛ-ɛsta ka Ndjale ka Ngalileya, wamboyôtana suke la Kapɛrɛnauma ko wambowombola vate: “Umbetsha, unya [akɔna] akayayi lindu?” Yeso ambâhangwɛ ko ambowatɛ ɔnɛ vɔ wekɔ lo mboyanga paka la kanyi ya ndjɔlɛ mma dikina ɔlɛlɛ. Nde ambowatɛ dia vɔ kamba, aha dia kondja mma dialana, koko dia kondja mma diatshikala edja lo dikambo dia lɔsɛnɔ la pondjo. Diɔ diakɔ diambowombola anto vate: “Katshasu na dia ntsha [e]limu a [Nzambi, NW]?”

Yeso ambowatɛ paka olimu ɔtɔi woleki ohomba. Nde ambolembetshiya ate: “Ulimu a [Nzambi, NW] eko okone: nyetawo one lakandatumi.”

Koko, oyadi ahindo akɔna tshɛ wasala Yeso, anto asɔ kema la mbetawɔ le nde. Dikambo dia diambo ko, kânga l’ɔkɔngɔ w’akambo asɔ tshɛ wa mamba wakandasale, vɔ lande vate: “Na djimbitelu yatshaye, tendi, keli tuketawo? Ulimu akona watshaye? Watshesu wakalekaka mana l’usui, uku ambufundama ati: Ndi akawasha ma dia nde uma l’ulungu.”

Nɛ dia vɔ wambɔ̂lɔmba djembetelo, Yeso ambâhonolɛ Kiɔkɔ ya mma sɔ dia lo dihondo, awatɛ ate: “Aha Mose kakanyusha [mapa, NW] uma l’ulungu, keli Papa katunyushaka [mapa wa mɛtɛ w’oma l’olongo, NW]. Ne dia [mapa wa Nzambi watoyakaka, NW] uma l’ulungu, [w]atushaka wa la kete lumu.”

Ko vɔ lande vate: “Khumadiondjo, kutushaki [mapa ɔsɔ, NW] la lushi la lushi.”

Yeso ambolembetshiya ate: “[Dimi lele mapa wa lɔsɛnɔ, NW]. One laya le mi, huka ndjala, lambetawo, huka pusa pundju. Keli dimi lakanyutela nti: Nyakamenyi, keli hanyumbetawo. Tshe wakambisha Papa, wayuya le mi. Dimi halatshanya one laya le mi. Ne dia dimi lakayi uma l’ulungu, aha dia ndjutsha lulangu lami, keli lulangu la one lakantumi. Lulangu la one lakantumi eli diaha dimi nshisha nduku otoi a wane wakandambisha, keli dia mbaulula lushi l’ekumelu. Lulangu la Papa lone, dia untu tshe lenda Ona, lawetawo, ayali la lumu la pundju.”

Lam’okiwɔ ɛtɛkɛta ɛsɔ, Ase Juda wambotatɛ ngunɛngunɛ Yeso nɛ dia nde ambota ate: “[Dimi lele mapa wakaholɔ oma l’olongo, NW].” Vɔ mbɔsaka paka oko ɔna lakotɔ le ambutshi wele anto, ko wotatɛ mbuta oko wakataka Ase Nazarɛta ɔnɛ: “One aha Jesu, on’a Josefu, leyasu shi la nyangu uka? Ya ukundi atandi ati: Uma l’ulungu kuyemi?”

Yeso mbâkaloyande dui ate: “Tanyungunangunaki l’atei anyu. Nduku untu leya ndja le mi, tshikima Papa lakantumi kûkutudi. Ku dimi layuwulula lushi l’ekumelu. Ambufundama lu afundelu w’amvutshi ati: Tshe wayetshama uma le [Jehowa]. Untu tshe latukaka ndu lateyaka aui uma le Papa, ndi atuyakaka le mi. Keli nduku untu lakenyi Papa, tshikima one luyi uma le [Nzambi, NW], ndi kakenyi Papa. Mete, mete, kanyutelami nti: One letawo, eko la lumu la pundju.”

Oma lâsɔ, Yeso ambonyomoyota kɛnɛ kakandate ntondo ate: “[Dimi lele mapa wa lɔsɛnɔ, NW]. Watshenyu wakaleka mana l’usui, ku wakavu. One eko [mapa woholwe oma l’olongo, dia kele onto tshɛ lawɔlɛ atovɔ̂ke. Dimi lekɔ mapa wasɛna wakaholɔ oma l’olongo; naka onto ndɛ mapa ɔnɛ kete nde ayɔsɛna pondjo pondjo, NW].” Mɛtɛ, naka anto ndjâla la mbetawɔ le Yeso, otomami wa Nzambi, kete vɔ kokaka kondja lɔsɛnɔ la pondjo. Oyadi mana kana woho akɔna tshɛ wa mapa hakoke mbasha lɔsɛnɔ la ngasɔ!

Ondo ɔkɛtshanyelo ɔsɔ w’endana la mapa w’oma l’olongo wakatatɛ yema l’ɔkɔngɔ w’anto wakatayangaka Yeso ndjôtana suke la Kapɛrɛnauma. Koko ɔkɛtshanyelo akɔ wayotetemala, wayotokoma lo kondoko yawɔ lam’ayetsha Yeso lo luudu l’ɔtɛmwɛlɔ la la Kapɛrɛnauma. Joani 6:25-51, 59; Osambu 78:24; Isaya 54:13; Mateu 13:55-57.

▪ Akambo akɔna wakatshama la ntondo ka Yeso tɛkɛta dikambo dia mapa w’oma l’olongo?

▪ Lo menda kɛnɛ tshɛ kosadi Yeso, lande na kotshe anto kɔlɔ lo mbɔlɔmba djembetelo?

▪ Lam’otshi Yeso ɔnɛ dimi lekɔ mapa w’oma l’olongo, lande na kôngunanguna Ase Juda?

▪ Lende akatatɛ ɔkɛtshanyelo wa mapa w’oma l’olongo?