Tshapita 89

Ambotshɔ la Judeya atokimanyiya onto ɔmɔtshi

LAM’AKIWƆ la Jerusalɛma lo Difɛstɔ di’Ekidielo, ambeta mingu mɔtshi, Ase Juda wakayange ndjaka Yeso. Diɔ diakɔ diakandatshu lo lɛkɛ la ngɛl’a nkushi, ondo lo lɛtshi la nkɛtɛ losukanyi la Ndjale ka Ngalileya.

Atete ndoko edja, nde akatshwe nto la diko dia nkushi, otsha la Jerusalɛma, atasambisha lo ngelo ya la Pereya, lo lɛtshi la nkɛtɛ lele lo lɛkɛ l’ehotwelo ka wonya k’Ɔkɛdi wa Jɔrɔdana. L’ɔkɔngɔ wa nde mboka wɛɛla wa kanga ɔngɔnyi la Lazaro, nde ambotetemala mbetsha ambeki ande akambo wakandawaetsha ntondo lam’akiwɔ la Ngalileya.

Oko ɛnyɛlɔ, nde ambota ɔnɛ ndeka ɔlɔlɔ le onto dia “ndi nkelekama dive di’ohelo lu kingu, la ntambiyama l’uduwa,” oleki nde “ntakanya kiendakenda motshi” yaki Nzambi. Ndo nto, nde ambɛnya ohomba wa nyimanyiyanaka, ata ate: ‘Kânga naka [ɔnanyɔ] ambokotshela kɔlɔ mbala esambele lo lushi, ko mbala yakɔ esambele nde kalolaka le yɛ dia ndjokotɛ ate: Lamboyatshumuya, wɛ pombaka mbokimwɛ.’

Ambeki wambɔlɔmba Yeso vate: “Ufudia mbetawo kasu,” ko nde ambâkadimola ate: “Utunduyala nyu la mbetawo uku lotongo la lohodia, tshiki nyu mbeyaka mvutela utamba one wa lukhumu nyati: Ukhundwami, unemi l’uduwa, ku vo mbeyaka nyukitanyia.” Ɔnkɔnɛ, kânga yema ya mbetawɔ tshitshɛ kokaka ntsha akambo a weke.

Oma lâsɔ, Yeso ambɔkɔndɔla dikambo dimɔtshi dieyama le anto tshɛ diɛnya dionga diahomba okambi wa Nzambi kanga wolo tshɛ monga ladiɔ. Yeso ate: “Untu akona l’atei anyu, leli la ukambi lakamba kana lalama ekoko, lam’ayuya ukambi uma l’ekambo, ku ndi ayuwutela ati: Utadjashi, utali ma? Ndi hawutela ati: Onongoswele diango dia dimi nde, olote uya, unkambeli ulimu, edja ndu lam’ayumushila nde la no, ku l’okongo diku we ayole, ayono? Undi ndi ayuka ukambi uku lusaka ne dia ndi akatshi akambu wakandôsengola? Okone ndu nyu, lam’ayunyushidiya ntsha paka akambu tshe wakawanyosengola, kanyuti nyati: Ekambi w’anyanya mbesu. Shu tambutsha akambu waki la su dia ntsha.” Ɔnkɔnɛ, ekambi wa Nzambi hawokoke kanyiya ɔnɛ: tekɔ lo kimanyiya Nzambi lam’awokambɛso. Koko vɔ pombaka mbohɔka vate: tekɔ la diɛsɛ dia woke dia mbɔtɛmɔla ndo dia ndjâla anto w’eshika l’atei a wa lo luudu lande.

Ondo yema l’ɔkɔngɔ wa Yeso mboka wɛɛla ɔsɔ mbamboya ɔkɛndji ɔmɔtshi. Nde akatomami oma le Mariya la Mata, akadiyɛnde la Lazaro, wanɛ wodjashi la Bɛtaniya ka la Judeya. Ɔkɛndji akɔ ate: “Khumadiondjo, ulungi, one latuyulangaka, eko la hemo.”

Yeso mbakandimolande ate: “Hemo keso aha ka nyoi, keli ne dia lutumbu la [Nzambi, NW], ne dia On’a [Nzambi, NW] atumbwami lu dikambu diako.” L’ɔkɔngɔ wa nde mbidjasɛ nshi hiende lo dihole diende, Yeso ambotɛ ambeki ande ate: “Tutshu la Judiya ntu.” Koko vɔ wambowohola vate: “Umbetsha, asi Juda waki lu nyanga nkuka ave nshi nye, ku we utatshu utsha leko ntu?”

Ko Yeso ambâkadimola ate: “Aha eshidi dikumi la ehendi mbeli lu lushi otoi? Naka untu ayokendakenda la yanyi, ndi hatakana ne dia ndi menaka yanyi ya andja ane. Keli naka untu ambokendakenda l’utshu, ndi ayutakana, ne dia yanyi kema l’utema andi.”

Ondo Yeso ekɔ lo nanga mbuta ɔnɛ ‘eshidi a tango wa la yanyi,’ kana etena kakashikikɛ Nzambi dia nde sala olimu ande lanɛ la nkɛtɛ, atete, ndo edja tshɛ kele etena kakɔ katete, ndoko onto lakoka mbosalɛ kɔlɔ. Ɔnkɔnɛ, nde pombaka kamba la etena ka tshitshɛ kambôtshikalɛ la “yanyi,” nɛ dia l’ɔkɔngɔ diko, wonya ‘ayoyodja’ lam’ayoyôdiaka atunyi ande.

Yeso ambota nto ate: “Ongenyi asu Lazaro ambetama lu djo. Dimi lambutsho keli ntuwemuli uma lu djo.”

Oko afɔnyawɔ mɛtɛ ɔnɛ Lazaro ekɔ lo mumuya lo djɔ, ndo ɔnɛ ɔsɔ ekɔ djembetelo y’ɔlɔlɔ yɛnya ɔnɛ nde ayɔkɔlɔngana, ambeki wambotɛ Yeso vate: “Khumadiondjo, naka ndi oso ambetama lu djo, keti ndi ayokono.”

Ko Yeso ambâhonwɛ ate: “Lazaro akavwi. Dimi lambongenangena dia dikambu dianyu, ne dia dimi taki leko, dia nyu mbetawomi. Tutshu le ndi.”

Tɔmasɛ ekɔ lo fɔnya ɔnɛ Yeso mbeyaka todiakema la Judeya, koko oko walangande mbosukɛ, nde ambokeketsha anyande ambeki ate: “Nyeso tutshu, katutuvu la ndi.” Ɔnkɔnɛ, ambeki wambodja nsɛnɔ yawɔ lo wâle ko wambotshindɛ Yeso lam’atandatshu la Judeya dia tokimanyiya onto ɔmɔtshi. Luka 13:22; 17:1-10; Joani 10:22, 31, 40-42; 11:1-16.

▪ Lende ambosambishaka Yeso atete ndoko edja?

▪ Wetshelo akɔna wambovusola Yeso, ndo dikambo diakɔna dieyama le anto tshɛ diamondota ndo dia mbisha kanyi yakɔna?

▪ Losango lakɔna lambolongola Yeso, ndo kakɔna kalangande mbuta lo tshɛkɛta “yanyi” la “utshu”?

▪ Kakɔna kolangi Tɔmasɛ nembetshiya lam’otshinde ate: ‘Nyɛsɔ totshu kele totovu lande’?