Tshapita 108

Wambohekɔ mamba Yeso djonga koko hawowonde

LAM’ELE Yeso oma la mbetsha anto lo tɛmpɛlɔ ndo oma la mbokɛ atunyi ande, ewandji w’ɛtɛmwɛlɔ, wɛɛla esato dia tondja kɔlɔ kawɔ lo sɛkɛ, Afarisɛ wambomala ko wambokana dia mâmba lo lolemi ɔnɛ kana ahɔsɔka dikambo dimɔtshi diakoka mbakimanyiya dia vɔ mbonda. Vɔ wambɔtɔ sheke ko wambotoma ambeki awɔ, la aseka Hɛrɔdɛ, dia vɔ tohemba mbonda l’ɛkɔmɔ.

Anto asɔ vɔ la Yeso vate: “Umbetsha, shu mbeyaka shati: Kanga mete keye; ndu we atetshaka antu mbuka ka [Nzambi, NW] lu mete. We hakanela nduku untu, ne dia we [hende anto lo dungi]. Okone ututeli uku akanaye. Eko ekila dia nfuta elambu le Kayisa, kana kema?”

Yeso mbeyaka mayɛlɛ awɔ. Nde mbeyaka ɔnɛ naka dimi mbuta nte: ‘Bu, kema ɔlɔlɔ futa elambo ɛsɔ,’ kete wayomunda l’onongo ɔnɛ nde otshutshuya anto dia vɔ tɔmbɔkwɛ Rɔmɔ. Ko naka dimi mbuta ɔnɛ: ‘Eelo, nyu pombaka futa elambo ɛsɔ,’ kete Ase Juda, wanɛ wɔnyɔla lɔhɔmbɔ lawɔ la tshina di’Ase Rɔmɔ, wayompetsha. Diɔ diamondokadimola ate: “Nyu akanga a lukesu, okoko wana wampimbanyu? Uhunyomenya falanga yalambulawo.”

Mbawelawɔ okenga ɔmɔtshi wa falanga ko Yeso nde lawɔ ate: “Efanelu la efundelu kaki na kene?”

Ko vɔ lande vate: “Ka Kayisa.”

“Okone nyusha Kayisa diango dia Kayisa; nyusha [Nzambi, NW] diango dia [Nzambi, NW].” Kam’okiwɔ okadimwelo ɔsɔ wa yimba efula oma le Yeso, ɛlɔngɔ ɛsɔ wambotshikala enyɔ hwe. Ko wambotshɔ, wambôtshika.

Lam’ɛnyiwɔ ɔnɛ Yeso ambodiha Afarisɛ enyɔ, Asadukɛ, wanɛ wata ɔnɛ eolwelo bu, wamboya oya le nde ko wambowombola vate: “Umbetsha, Mose akati ati: Naka pami kemotshi ambuvo, ku ndi kuntutshi ana, onangu kakitani la wadendi, dia ndi mbulwela onangu luhanga. L’atei asu kaki [ana] esambeli [w’otema ɔtɔi]. L’enundu akatshuki wadi, akavu. Ku lam’akindi kumbuta ana, ndi akatshikela onangu wadendi. Ndu la hendi akatatshi osoku, ndu la satu, edja ndu l’esambeli. Ndu umuntu akayuvo l’okongo awo tshe. Okone lu eulwelu k’uma lu nyoi, ndi ayuyala wadi a na l’atei w’antu aso esambeli? ne dia vo waki la ndi vo tshe.”

Yeso nde lawɔ ate: “Aha uma lu dikambu ne mbanganelanyu, ne dia nyu hanyeyi afundelu, kuyanga wulu wa [Nzambi, NW]? Ne dia lam’ulo antu uma lu nyoi, vo hawutshuki, hawutshukama, keli vo watuyalaka uku andjelo l’ulungu. Lu dikambu dia eulwelu ka wavo, nyu nyatali lu buku dia Mose, lu ahuli wufundami dikambu dia dikumbu, uku akawutela [Nzambi, NW] ati: Dimi keli [Nzambi k’Abarahama, Nzambi k’Isaka, Nzambi ka Jakɔbɔ, NW]? Ndi kema [Nzambi ka, NW] wavo, keli ndi eko [Nzambi ka, NW] wasena. Nyu nyambunga heyama!”

Ndo mbala kɛnɛ, elui w’anto wambamba lo mboka okadimwelo wa Yeso. Kânga afundji amɔtshi wambetawɔ vate: “Umbetsha, ololo mbutshiye.”

Lam’ɛnyi Afarisɛ ɔnɛ Yeso ambodiha Asadukɛ enyɔ, vɔ wamboya oya le nde l’olui. Dia nyomô hemba nto, ofundji ɔmɔtshi l’atei awɔ ambowombola ate: “Umbetsha, lu elembe, olembe akona wuleki wuki?”

Yeso nde lande ate: “Olembe a ntundu eko okone ati: Isariyele li, nyuki! [Jehowa Nzambi kayɛ, ndamɛ oto mbele Jehowa, NW]. Ulangi [Jehowa Nzambi kayɛ, NW] l’utema aye tshe, la lumu laye tshe, la yimba yaye tshe, ndu la wulu aye tshe. Olembe a hendi one ati: Ulangi unyaye uku ayalangaye. Nduku olembe uleki elembe ene wuki.” Yeso ambonyomota ate: “Elembe tshe la awui wa amvutshi wambuhanema lu elembe ene ehendi.”

Ko ofundji akɔ ambetawɔ ate: “Umbetsha, kawo. Mete kutshiye wati: Otoi mbendi, nduku ukina, paka ndi. Dia mbulanga l’utema tshe, la yimba tshe, la wulu tshe, ndu nanga unyaye uku ayalangaye, ndeka elambu tshe la elambu tshe wa lutshumba ololo.”

Lam’ɛnyi Yeso ɔnɛ ofundji ɔsɔ ambokadimola oko kanga yimba, nde lande ate: “We kema etali uma lu diulelu dia [Nzambi, NW].”

Ambeta nshi shato—Lushi la Lomingu, l’Ɔtɔi la la Hende—tatɛ oma lam’akamɛ Yeso ndakanya anto lo tɛmpɛlɔ. Anto wakôhokamɛka l’ɔngɛnɔngɛnɔ, koko ewandji w’ɛtɛmwɛlɔ wekɔ lo nanga mbodiaka, ko polo ndo l’etena kɛnɛ, weolo tshɛ wadjawɔ mbɔtɔka l’ashi. Mateu 22:15-40; Mako 12:13-34; Luka 20:20-40.

▪ Ngande wambokana Afarisɛ dia mamba Yeso djonga, ndo kakɔna kotoyala otondokadimola ɔnɛ eelo kana kema?

▪ Woho akɔna wambewɔ Yeso djonga y’Asadukɛ?

▪ Kakɔna kambosala Afarisɛ nto dia pemba Yeso, ndo etombelo akɔna wamboyala?

▪ Nshi ngana yambolakanya Yeso lo tɛmpɛlɔ lam’asalande olimu ande wa komelo la Jerusalɛma, ndo etombelo akɔna wamboyala la wetshelo ande?