Etini 4
Nzambi tewoyaka wedjango wakinde
1, 2. Woho akona w’eyaso one Nzambi kadimolaka wane wayambola l’otema otoyi lo wembola awo na?
NZAMBI ka gandji efula mbewoyaka wedjango ande le wane w’oyanga l’otema otoyi. Nde kadimolaka anto ane wayambola lateyi w’akambo efula oko lande na kakandetawo fonu.
2 Onkone mbata Bible ate: “Naka we ayûyanga [Nzambi], ndi ayuyakimo dia we mbutana.” “Unyashungu leli l’ulungu, atushulaka akambu wushami.” “Khumadiondjo Latuyalaka hatutshaka nduku dikambu, Tshikima ndi ambutashudi dikambu diandi Dia lu usheshe le ekambi andi amvutshi.”—1 Ekondo 28:9; Danyele 2:28; Amose 3:7.
Lende atanema ekadimwelo na?
3. Lende atanaso okoko wa dikambo di’enya bonde k’etawo Nzambi paa na?
3 Ekadimwelo a wembola w’endana la woho w’etawo Nzambi paa ndo woho wayondoyishidiya tanemaka lo oshimu one wakandatosambiye dia ololo wakiso. Oshimu ako ele Dui diande, Bible k’Osanto. “Efundelo tshe wakasambiyama oma le Nzambi ndo weko ohomba dia ndakanya, dia mingola, dia sembola akambo, dia pokola lo akambo w’ololo, dia onto a Nzambi alowanyi, ayakotsha dia ntsha elimu w’ololo.”—2 Timote 3:16, 17, NW.
4, 5. Akambo akona wenya one Bible tshikitana l’ekanda ekina tshe na?
4 Bible eko mete okanda woleki ekanda ekina tshe. Loko tanemaka akambo wa mete w’endana l’okondo w’anto tate oma lo etongelo kawo kana la ntondo ka vo tongama. Wêko lo sedingoma nshi nye, ne dia awui wa loko wele ataye mendanaka l’akambo w’eta lo etena kaso kene ndo wane w’endana la nshi yayaye.
5 Ndoko okanda okina wokuki kondola awui wakete la losembwe. Enyelo, eko paka lofulo la tshitshe l’ekanda wakafundama l’anya, oma le afundi wa nshi ya ntondo eto mbeko. Koko, teko la ekanda efula wa Bible wakafundama l’anya, emotshi weko tini, ekina etondo: suke la ekanda 6 000 wa Efundelo wa lo Heberu wakafundama l’anya (ekanda 39 wa lo “Daka di’Edjedja”) ndo suke la ekanda 13 000 wa Efundelo wa lo Greke wa akristo wakafundama l’anya (ekanda 27 wa lo “Daka di’Oyoyo”).
6. Lande na kahombaso mbetawo l’otema otoyi one Bible ya nshi nye mbotoneka l’ololo tshe la ekanda engo wakafundama l’anya wakasambiyama oma le Nzambi na?
6 Nzambi Kanga-Wolo-Tshe, one lakasambiya Bible, akalami diaha losembwe la kɔpi tshe y’ekanda engo wakafundama l’anya shisho. Bible yele laso nshi nye mbotoneka l’ololo tshe la ekanda engo w’etatelo wakasambiyama ndo wakafundama l’anya. Dikambo dikina dia toshikike ko kɔpi motshi y’ekanda wakafundama l’anya wa Efundelo wa lo Greke wa akristo wakafundama la ntondo ka enonyi lokama shila l’okongo wa efundelo awo w’etatelo. Lofulo la tshitshe l’ekanda wene wakafundama l’anya waki afundi w’edjedja wakatakondja mangana kama la kama y’enonyi la afundi awo w’etatelo.
Woshasha w’oma le Nzambi
7. Bible ngana yamboshila la kahanyema na?
7 Bible eko okanda one wambokahanyema efula lo eongelo k’okondo w’anto. Miliyare motshi shato ya kɔpi yakafundama. Ndoko okanda okina wosukani lawo lo menda lofulo loso. Nto, Bible akakadimoma l’otondo tshe kana etini lo eteketa 2 000. Fonyamaka dia, 98 % y’anto wa l’andja w’otondo weko la dibuku diako.
8-10. Naa akambo amotshi akona w’enya okoko wahombaso sedingola Bible na?
8 Dibuku ne di’etawo one dio ndja oma le Nzambi ndo diasha tolembetelo t’akambo wa leteyi kadio ndo wa l’andja dia mete kadio kokaka dia sho mbodisedingola.a Bible mbukiyaka oyango wa loseno, olimbitshiyelo w’akambo ane wasalema l’andja w’otondo ndo kene katokonge lo nshi yayaye. Ndoko okanda okina wakoka mbuta awui wa ngaso.
9 Eelo, Bible eko dikendji ne diakatome Nzambi nkumbo y’anto. Nde mbakalombola ofundelo awo oma lo wolo ande wakamba olimu, nyuma kande, ndo anto amotshi akumi aneyi mbakafunde. Nzambi sawolaka laso l’ekimanyelo ka Dui diande, Bible k’Osanto. Otomami Paulo akafunde onkone ate: “Lam’akanyalongola dui diaki Nzambi ne diakanyoke oma leso, nyakadietawo aha oko dui di’anto, koko, oko wedio mete dui diaki Nzambi.”—1 Tesalonika 2:13, NW.
10 Lo kene kendana la Bible, Abraham Lincoln, presida ka dikumi la asamalo ka lo Etats-Unis akate ate: “Eko mete woshasha woleki woke wakasha Nzambi anto . . . Aha okanda ako, tôhoteya tshikitanya ololo la kolo.” Omaloko, lo ndjela woshasha ako w’oshinga a wolo, tɔtɔsha washo aso ololo dia menda woho akona wakatate asui, lande na kak’etawo Nzambi paa yako ndo woho akona wayondosala dia yo shila.
[Nɔte ka l’ɛse ka dikatshi]
a Dia kondja olimbitshiyelo w’efula w’enya mete ka Bible, enda lo dibuku La Bible : Parole de Dieu ou des hommes ?, diakafundama lo 1989 oma le la Société Watchtower.
[Osato wa lo lɛkɛ 10]
Bible, dibuku diakasambiyama oma le Nzambi, eko dikendji ne diakandatome nkumbo y’anto