Wekelo 14

Woho Wɔlɔngɔswami Ɛmɛnyi wa Jehowa

Etena kakɔna kakatatɛ tshunda di’Ɛmɛnyi wa Jehowa dia nshi nyɛ na? (1)

Woho akɔna walɔmbwama nsanganya y’Ɛmɛnyi wa Jehowa? (2)

Oma lende atomba falanga yasalawɔ elimu? (3)

Akɔna alɔmbɔla etshumanelo l’etshumanelo? (4)

Nsanganya yakɔna ya weke yasalema ɔnɔnyi tshɛ? (5)

Olimu akɔna wakambema lo mbalasa kawɔ ka woke ka l’andja w’otondo ndo lo wa filialɛ? (6)

1. Tshunda di’Ɛmɛnyi wa Jehowa dia nshi nyɛ diakatatɛ l’ɛnɔnyi 1870. Ntondotondo, vɔ wakelamɛka ɔnɛ Ambeki wa Bible. Koko lo 1931 mbakawayoyaɔlɛka lokombo la l’Afundelo la Ɛmɛnyi wa Jehowa. (Isaya 43:10) Ɔlɔngɔswamelo wakatatɛ l’anto yema tshitshɛ oma k’etatelo wambohama lo wa miliyɔ y’Ɛmɛnyi wasambisha lo wedja ndekana 230.

2. Tshumanelo efula di’Ɛmɛnyi wa Jehowa mbɔtɔka nsanganya mbala shato oseka lomingu tshɛ. Wambokelɛ dia wɛ mbɔtɔ lo nsanganya yakɔ shɔ. (Heberu 10:24, 25) Akambo tshɛ wetshama lɛkɔ tombaka oma lo Bible. Nsanganya tatɛka ndo komɛka la dɔmbɛlɔ. Lo nsanganya efula, ‘esambu wa lo nyuma’ w’oma ka tshina di’otema membamaka. (Efeso 5:18, 19) Hawɔlɔmbɛ onto falanga dia nde mbɔtɔ ndo hawɔkɔngɔla ɛkɔngɔ.​—Mateu 10:8.

3. Tshumanelo efula salaka nsanganya yawɔ lo Mbalasa ka Diolelo. Mvudu shɔ yaha kânga l’ekakatanu mbikamaka oma le Ɛmɛnyi wakayakimɔ la lolango lawɔ vamɛ. Wɛ hɛnaki mpingu kana alɛdi, kurusɛ kana weoho ekina wa diangɔ diɔfɔnyi ladiɔ lo Mbalasa ka Diolelo pondjo. Weshasha wakimɔ anto la lolango lawɔ mbakimanyiya di’elimu ɛsɔ salema. Le wanɛ walanga kimɔ weshasha akɔ, shɛtɛshɛtɛ ya weshasha tanemaka lɛkɔ.​—2 Koreto 9:7.

4. Lo etshumanelo l’etshumanelo, dikumanyi, kana emendji, wekɔ. Vɔ mbele l’ɔkɛndɛ wa nɔmbɔla wetshelo lo tshumanelo. (1 Timote 3:1-7; 5:17) Ekambi w’elimu mbakimanyiyaka. (1 Timote 3:8-10, 12, 13) Anto asɔ hawahemɛ anto akina wa l’etshumanelo. (2 Koreto 1:24) Vɔ kema la mpɛtɛ mɔtshi ya lânde. (Mateu 23:8-10) Vɔ hawɔlɔtɛ ahɔndɔ wotshikitanyi l’anto akina. Vɔ kema la difuto lo dikambo di’olimu wakambawɔ. La lolango tshɛ, dikumanyi salaka dia kotsha ehomba wa lo nyuma w’etshumanelo. Vɔ kokaka mbisha ekeketshelo ndo ɛlɔmbwɛlɔ l’etena k’ofukutanu.​—Jakoba 5:14-16; 1 Petero 5:2, 3.

5. Ɛmɛnyi wa Jehowa salaka ndo nsanganya ya weke ɔnɔnyi tshɛ. Tshumanelo efula tosanganaka lo tena sɔ dia ndjela ekongelo ka lânde ka wetshelo w’oma lo Bible. Batismu k’ambeki w’eyoyo tanemaka l’atei w’ekongelo ka losanganya lakɔ mbala tshɛ.​—Mateu 3:13-17; 28:19, 20.

6. Mbalasa ka woke kalɔmbɔla elimu w’Ɛmɛnyi wa Jehowa wa l’andja w’otondo kekɔ la New York. Lɛkɔ mbatanema ndo Olui Walɔmbɔla, djui ya dikumanyi diambohokɔ olimu dienda etshumanelo k’andja w’otondo. Ndo nto, filialɛ ndekana 100 yekɔ l’andja w’otondo. L’ahole asɔ, wanɛ wayakimɔ la lolango mbishaka lonya dia funda kana toma ekanda w’endana la Bible lo bɛkɛ la bɛkɛ. Alako mbishamaka nto lo woho wa nɔngɔsɔla olimu w’esambishelo. Lande na kahayɔsɛ tɛdikɔ dia ntshɔ la tenda filialɛ kosukanyi layɛ na?