Wetshelo wa mbeya tɛkɛta ndo ndakanya la ntondo k’anto

OYADI dikɛnda kana opalanga, pami kana womoto mbeyɛ, kalasa kɛnɛ kokaka kokimanyiya dia wɛ koma ɔtɛkɛtshi ndo ombetsha w’oshika w’Ɔtɛkɛta wa Nzambi.

Omendji wa kalasa mbayoshaka ambeki asawo wa vɔ mbisha lo Kalasa k’Olimu wa Teokrasi. Lo ndjɛkɛ shato yayela, wɛ ayotana fishi kayɛ hita k’alako. Toshifidi tele la ntondo k’alako wotshikitanyi mbɔtɔnɛka la wekelo wele lo ndjɛkɛ yayela. Lo wekelo ɛsɔ, wɛ ayotana elembetshiyelo wendana la woho wa mbeya tɛkɛta ndo mbetsha ndo bonde kele dikambo la dikambo diekɔ ohomba. Wɛ ayotana nto alako w’eshika wayokokimanyiya dimɛna dia wɛ kotsha kɛnɛ kakɔlɔmbawɔ.

Eshidi w’alangi wele lo dikatshi di’alako mɛnyaka akambo wendana l’asawo wele oko (1) wadielo wa lo sɛkɛ, (2) wɛnyɛlɔ wasalema l’ekimanyielo k’anto ahende kana ndekana, kana (3) sawo diasalema la ntondo k’etshumanelo. Omendji wa kalasa ayokosha dako diahomba ndjokamba layɛ. Ayonga dimɛna kamba la dikambo ɔtɔi l’etena ɔtɔi. Wɛ ayokondja wahɔ naka wɛ sala ekambelo wele l’ekomelo ka wekelo wakawakosha. Naka wɛ ambokamba la dako diokoshawɔ lo wekelo ayɛ dimɛna, kete ombetsha ayokosha dako dikina dia wɛ kamba ladiɔ.

Naka sawo diayɛ diayoshama oko wɛnyɛlɔ, kete wɛ ayonga l’ohomba wa nyanga lokongɛ la mbisha sawo diakɔ. Ɔnɔngɔ wa nkongɛ wekɔ lo lɛkɛ 82, koko aha nkongɛ ngo tsho mbahomba kamba layɛ. Ombetsha ayɛ koka kɔlɔmba dia wɛ pemba la lokongɛ lɔmɔtshi dia wɛ kondja diewo, kana nde kotshika dia wɛmɛ sɔna lokongɛ lalangayɛ.

Mbadia dibuku nɛ ndo sala ekambelo wele lɔkɔ, oyadi aha asawo wa lo kalasa mbalɔngɔsɔlayɛ kokaka kokimanyiya efula dia wɛ pama. Ondo lomingu tshɛ, wɛ ayokokaka mbeka wekelo ɔmɔtshi wa lo dibuku nɛ.

Oyadi nshi yakɔna yakayatatɛ mbisha asawo lo kalasa kɛnɛ kana tomba l’esambishelo, wɛ koka tetemala la pama. Lâsɔ, ona dia wɛ kondja wahɔ efula oma lo wetshelo washama lo Kalasa k’Olimu wa Teokrasi.