Emendji Walɔmbɔla: Omendji Wa Kalasa K’olimu Wa Teokrasi

¹ Omendji wa Kalasa k’Olimu wa Teokrasi ekɔ ekumanyi kɛmɔtshi ka lo nyuma kakamba efula lo kɛnɛ kendana l’ɔtɛkɛta la wetshelo; ndo sunganaka sho kamba kâmɛ la nde ndo mbɔ̂lɛmia. (1 Tim. 5:17) Naa ɛkɛndɛ wele lande na?

² Nde kalama bibliɔtɛkɛ wa Kalasa k’Olimu wa Teokrasi lo Mbalasa ka Diolelo. Nde ekɔ la saki ka keketsha wanɛ tshɛ wakotsha kɛnɛ kalɔmbama dia fundja lokombo lo kalasa kakɔ. Nde namaka dia fishi tshɛ monga l’ɔnɔngɔ dia mbishaka anto asawo mingu shato la ntondo kana ndekana. Nde pombaka mbeya etshumanelo dimɛna, ombeki l’ombeki ndo akoka ande. Oyadi kânga ɔnangɛso okina ekɔ lo mbôkimanyiya dia nde nɔngɔsɔla ekongelo ka kalasa, nde mendaka kana ɔnangɛso ɔsɔ akakahodi asawo lo yoho yakoka.

³ Dia mbeya mbetsha lo kalasa, omendji pombaka ndjalɔngɔsɔlaka efula lomingu tshɛ, lo mbekaka dimɛna awui wayetshama. Dui sɔ mbôkimanyiyaka dia nde têwoyisha etshumanelo la ntondo, shikikɛ kana wakatɛkɛtshi awui tshɛ wahomba mbekama lushi longo ndo sɔtɔla tokanyi t’ohomba tayoyɔtɛkɛtama l’ovuswelo a lofunda.

⁴ L’ɔkɔngɔ wa sawo tshɛ, omendji ayandola ombeki ndo nembetshiya bonde kele dionga di’ɔtɛkɛtshi diakawɔ̂lɔmbi diakakambemi dimɛna kana pombaka nɔngɔsɔla. Naka onto ɔmɔtshi ekɔ l’ohomba w’ekimanyielo dia nɔngɔsɔla asawo wawoshawɔ lo kalasa, kete omendji kana onto layondɔsɛngɔla ayowokimanyiya.

⁵ Dia kondja ɛlɔlɔ tshɛ w’oma l’olimu wa wolo wakamba omendji wa Kalasa k’Olimu wa Teokrasi ndo andaki akina wakamba kâmɛ la nde, pombaka sho mbɔtɔka tena tshɛ lo kalasa kakɔ. Nto, sho la dia salaka asawo tshɛ watoshawɔ ndo kambaka l’alako watoshawɔ kana washawɔ ambeki akina. Lo yoho shɔ mbayototalɔngɔsɔlaka yema yema dikoka diaso dia sambisha lokumu la Diolelo lo sɛkɛ ndo lo luudu la luudu.​—⁠Etsha 20:20; 1 Tim. 4:​13, 15.