Mbeya mbɔtshiya avɛsa

WETSHELO washama lo nsanganya ya l’etshumanelo tomba oma l’Afundelo. Wonya weso l’esambishelo, avɛsa tokimanyiyaka nto dia nembetshiya awui. Ekimanyielo kahombaso kondja oma l’avɛsa lo sawo diaso nemanɛka lo yɛdikɔ ya woke la yoho yayotowaɔtshiya.

Akambo efula nɔmbamaka, koko aha tsho shila divɛsa kana nɔmba onto ɔmɔtshi dia nyu diada kamɛ. Etena kɔtshiyayɛ divɛsa, sala la wolo dia kotsha eyango ehende ɛnɛ: (1) Memula nsaki, ndo (2) mɛnya ɔkɔkɔ wokotshutshuyisha dia kamba la divɛsa diakɔ. Wɛ koka kotsha eyango ɛsɔ lo toho totshikitanyi.

Oka wombola. Ɔnɛ ekɔ yoho yoleki dimɛna naka ampokami ayɛ watoke okadimwelo dimɛna. Sala tshɛ dia mboka wombola lo yoho yatshutshuya anto dia kana yimba. Yeso akasalaka ngasɔ. Etena kakaye Afarisɛ le nde lo tɛmpɛlɔ ndo kakawahembe eokelo kande k’Afundelo, Yeso akawambola ate: “Ukundi akananyu dia Kristu na? Kanula ya na yendi?” Vɔ wakakadimola vate: “Kanula ya Davidi.” Yeso akawambola nto ate: “Ukundi akaweti Davidi lakaludiama la [nyuma k’ekila], ati: Khumadiondjo?” Oma lâsɔ, nde akate ɛtɛkɛta wa l’Osambu 110:1. Afarisɛ wakatshikala ki. Koko, lemba l’anto wakahokamɛka Yeso l’ɔngɛnɔgɛnɔ tshɛ.​—Mat. 22:41-46.

L’esambishelo, wɛ koka kamba la wembola ɛnɛ dia mbɔtshiya divɛsa: “Sho akɔ ahende onto l’onto ekɔ la lokombo lande hita. Onde Nzambi ekɔ la lokombo lande hita? Sho koka tana okadimwelo l’Osambu 83:18.” “Onde lushi lɔmɔtshi anto wokonga paka la lowandji ɔtɔi l’andja w’otondo? Tende woho wokadimɔmi wombola ɔsɔ lo Danyele 2:44.” “Onde Bible tɛkɛtaka mɛtɛ di’akambo wɛnaso nshi yaso nyɛ? Ɛdika kɛnɛ kotami lo 2 Timote 3:1-5 l’akambo amɔtshi wɛnayɛ mbala la mbala.” “Onde asui la nyɔi wayokomɛ lushi lɔmɔtshi? Sho koka tana okadimwelo washa Bible lo Enyelo 21:4, 5.”

Lam’ashɛ sawo, naka wɛ kamba dimɛna la wembola dia mbɔtshiya avɛsa, kete ampokami ayɛ koka tshutshuyama dia nyanga avɛsa akɔ, oyadi kânga wanɛ wokoweyaka. Ko onde vɔ wayosala ngasɔ? Dui sɔ nemanɛka ondo l’ohomba wele la wembola ayɛ le wɔ. Oyadi sawo diakɔ diekɔ ohomba le ampokami, yimba yawɔ koka mbekɔ etena kadiayɛ avɛsa wambowokaka mbala efula. Dia mbewɔ dui sɔ, wɛ la dia sala tshɛ dia kana yimba efula woho wa mbɔtwɛlɔ kayɛ monga dimɛna efula.

Onyiya dikambo dimɔtshi. Wɛ koka monyiya dikambo dimɔtshi ko wɛ kotola yambalo y’ampokami oya lo divɛsa diɛnya woho wa kandola dikambo diakɔ. Totshutshuyake ampokami dia vɔ nongamɛ ekandwelo ka tshambandeko. Mbala efula divɛsa mbishaka tsho paka etenyi k’okandwelo keto. Koko, wonya wadiayɛ divɛsa, wɛ koka nɔmba ampokami dia vɔ sɛdingola ɛlɔmbwɛlɔ kasha divɛsa diakɔ dia kandola okakatanu ɔsɔ.

Yoho yakɔ yamɛ, wɛ koka mbisha tɔndɔ dimɔtshi diendana la lɔkɛwɔ l’ɔlɔlɔ, oma lâsɔ ko wɛ kamba l’ɔkɔndɔ ɔmɔtshi wa lo Bible dia mɛnya ohomba wa ndjela tɔndɔ sɔ. Naka divɛsa diekɔ l’awui ahende kana ndekana wendana la kɛnɛ kɔmbwama, atɛkɛtshi amɔtshi nɔmbaka ampokami dia vɔ mbishola awui akɔ. Naka okakatanu ɔmɔtshi mɛnamaka dia wekɔ wolo efula le ampokami amɔtshi, kete wɛ koka mbakeketsha lo mbisha toho efula ta kandola okakatanu akɔ, oma lâsɔ ko wɛ mbisha okadimwelo lo mbadia divɛsa ndo mɛnya woho wa kamba ladiɔ.

Ɛnya di’akambo tshɛ ntomba oma lo Bible. Naka wɛ akashidi memula nsaki oya lo sawo diayɛ ndo ambosha kanyi ɔtɔi kana ndekana l’awui amɔtshi wendana la sawo diakɔ, kete wɛ koka mbɔtshiya divɛsa lo mbuta tsho ɔnɛ: “Tende kɛnɛ kata Ɔtɛkɛta wa Nzambi lo dikambo nɛ.” Dui sɔ mɛnyaka bonde kele awui wayangayɛ mbadia wekɔ ohomba efula.

Jehowa akakambe la Joani, Luka, Paulo ndo Petero dia funda tenyi dimɔtshi dia Bible. Koko vɔ waki paka afundji ato; Jehowa mbele Kiɔkɔ yatɔ. Djekoleko lam’atɛkɛtaso l’anto wele bu ambeki w’Afundelo w’Ekila, naka sho mbɔtshiya divɛsa lo mbuta ɔnɛ “Petero akafunde ate” kana “Paulo akate ate,” kete ondo divɛsa diakɔ hatonga la shɛngiya yamɛ yakoka monga la mbɔtwɛlɔ kɛnya dia awui akɔ tomba oma l’ɔtɛkɛta wa Nzambi. Sho mɛnaka dia lo waaso efula, Jehowa akadjangɛ Jeremiya dia mbɔtshiya waewoyelo lo mbuta ɔnɛ: “Nyuki diui dia [Jehowa].” (Jer. 7:2; 17:20; 19:3; 22:2) Oyadi sho kamba la lokombo la Jehowa dia mbɔtshiya avɛsa kana bu, la ntondo ka sho komiya sawo diaso, sho la dia sala la wolo dia mɛnya ɔnɛ kɛnɛ kele lo Bible ekɔ ɔtɛkɛta ande.

Dja yimba l’awui watama l’etenyi kakɔ. Etena kɔtshiyayɛ divɛsa, wɛ la dia mbidja yimba l’awui watama l’etenyi kakɔ. Tena dimɔtshi, wɛ koka mbuta mbala kakɔ ɔtɔi awui wɔmbwami l’etenyi kakɔ; koko, awui akɔ koka monga la shɛngiya kina lo kɛnɛ katayɛ. Ɛnyɛlɔ, onde wɛ koka mbɔtshiya awui waki Jɔbɔ onto lakokaka Nzambi wɔma l’awui wakate osambi ande ɔmɔtshi wa l’ɛlɔmɔ yoho yamɛ? Dibuku di’Etsha diakafundama oma le Luka, koko nde vusolaka awui waki Jakɔba, Petero, Paulo, Filipi, Stɛfanɔ, andjelo, Ngamaliɛlɛ ndo w’ase Juda akina waki komonga Akristo. Onto akɔna akanga awui wele lo divɛsa diadayɛ? Ɛnyɛlɔ, eya di’aha esambo tshɛ mbakafundama oma le Davidi ndo aha dibuku di’otondo dia Tukedi mbakafundama oma le Sɔlɔmɔna. Ekɔ nto ohomba mbeya ɔnɛ ofundji wa Bible akafundɛ anto kapanda ndo mbeya otondo wa dui diakatamaka.

Kamba l’awui wakete. Dui sɔ diayonga ohomba efula naka wɛ ayɛnya di’awui waketaka l’etena kakafundama ɔkɔndɔ akɔ wa lo Bible fɔnaka la wanɛ watɛkɛtayɛ. Lo tena dimɔtshi, awui wakete wekɔ ohomba dia mboka divɛsa dimɔtshi dia lânde. Ɛnyɛlɔ, naka wɛ nangaka kamba la Heberu 9:12, 24 lo sawo diendana la tshungo, kete la ntondo ka wɛ mbadia avɛsa anɛ wɛ koka mbisha yema y’olembetshiyelo wa lo tshena pe wendana la dihole diaki kɔhɔngɔ wa tabɛrnakɛlɛ, diele avɛsa anɛ mɛnyaka di’ɔnɛ Yeso akɔtɔ lɛkɔ lam’akandadɛ l’olongo. Koko todjake weho w’awui efula di’aha ndjofukutanya kanyi y’avɛsa wɔtshiyayɛ.

Dia wɛ ndowanya yoho yɔtshiyayɛ avɛsa, sɛdingola kɛnɛ katsha atɛkɛtshi wa tomanamana. Sɛdingola toho totshikitanyi takamba lawɔ. Sɛdingola etombelo wele la toho tɔsɔ. Lam’alɔngɔsɔlayɛ asawo ayɛ, sɔtɔla avɛsa woleki ohomba, ndo dja yimba l’oyango wahomba divɛsa tshɛ kotsha. Lɔngɔsɔla mbɔtwɛlɔ ka divɛsa tshɛ dimɛna woho wa diɔ monga l’etombelo woleki amɛna. L’ɔkɔngɔ diko, ko wɛ ndjosala ngasɔ l’avɛsa tshɛ wakamba layɛ. Naka wɛ ndjalowanya lo yoho shɔ yendana la woshelo ayɛ w’asawo, kete wɛ ayonga l’akoka wa keketsha ampokami ayɛ dia mbidjaka yimba efula l’Ɔtɛkɛta wa Nzambi.