Tɛkɛta awui washa ampokami ayɛ wetshelo

DIA sawo diayɛ mbisha wetshelo, ekɔ akambo efula walɔmbama koko aha tsho mɔmbɔla dui dimɔtshi di’ɔlɔlɔ. Yambola wate: ‘Bonde kele ampokami ami anɛ la dia mboka dui nɛ na? Ayomotota di’ampokami ami mboka dia wakakondjisha wahɔ oma lo sawo nɛ?’

Lo kalasa, naka wɛ ayosala wɛnyɛlɔ wɛnya woho wa sambisha onto ɔmɔtshi, kete onto latɛkɛta la yɛ mbayonga ompokami ayɛ. Lo tena dikina, wɛ koka tɛkɛta lo wahɔ w’etshumanelo k’otondo.

Kɛnɛ keya ampokami ayɛ. Yambola wate: ‘Kakɔna keya ampokami ami lo dikambo nɛ?’ Kɛsɔ mbayokokimanyiya dia mbeya oma lɛnɛ ahombayɛ tatɛ. Naka wɛ ekɔ lo tɛkɛta la ntondo k’etshumanelo kele l’Akristo efula wambotshunda, kete tokomɛke tsho lo wetshelo wa wɔdu wele efula ka l’atei awɔ mbeyaka. Wetshelo ɛsɔ wakokimanyiya dia mbisha elembetshiyelo ekina. Koko, naka ndo eyoyo efula mbele l’atei w’ampokami ayɛ, kete wɛ la dia mbidja yimba ndo l’ehomba awɔ koko aha paka l’ehomba w’Akristo wambotshunda ato.

Ɔtɔnganyiya lowango l’ɔtɛkɛta ayɛ la kɛnɛ keya ampokami ayɛ. Naka wɛ ekɔ lo tɛkɛta awui wele efula k’ampokami mbaeyaka, kete wɛ koka tɛkɛta awui akɔ lo esadi esadi. Koko tshɔka ɔkɔkɛ l’awui wokoki monga eyoyo le efula k’ampokami ayɛ woho wa vɔ shihodia awui akɔ dimɛna.

Awui akɔna washa wetshelo? Mɔmbɔla tokanyi tasha wetshelo halembetshiya ɔnɛ paka monga la dui dimɔtshi di’oyoyo dia mbuta. Atɛkɛtshi amɔtshi wekɔ la yoho ya nembetshiya akambo amɔtshi wa mɛtɛ wokeyaka anto lo yoho ya wɔdu yakoka ampokami efula shihodia wetshelo ɛsɔ mbala kawɔ ka ntondo.

L’esambishelo, wɛ hahombe tsho mbuta dui di’oyoyo dia mɛnya ɔnɛ tekɔ lo nsɛna lo nshi y’ekomelo, koko kamba la Bible dia mɛnya kitshimudi ya dui diakɔ. Dui sɔ diayosha onto latɛkɛta la yɛ wetshelo w’ohomba. Woho akɔ wamɛ mbele, etena katɛkɛtayɛ awui amɔtshi wendana l’ɛlɛmbɛ w’etongelo, kana wendana la tombatomba kana la lɔsɛnɔ la waa nyama, oyango ayɛ kema wa mbutɛ onto latɛkɛta la yɛ awui amɔtshi wa diambo wa siansɛ wende atokaka ndoko lushi. Koko, oyango ayɛ wonge wa kakatanya tolembetelo t’oma lo diangɔ diakatongama la kɛnɛ kata Bible dia mbɛnya ɔnɛ Otungi ɔmɔtshi watoka ngandji ekɔ. Kɛsɔ ayokimanyiya onto latɛkɛta la yɛ dia nde kondja eokelo kɛmɔtshi k’oyoyo.

Nembetshiya dui dimɔtshi diele ampokami wambodioka mbala efula koka monga dikambo dia wolo. Koko dia monga ɔtɛkɛtshi w’oshika, ekɔ ohomba wɛ mbeka woho wa sala dikambo sɔ dimɛna. Ngande wakokɛ tondoya dui sɔ na?

Eyangelo wayokokimanyiya. Lo dihole dia mbidja tsho awui wele lo wɔɔngɔ lo sawo diayɛ, kamba la dihomɔ di’eyangelo diɛnyishawɔ lo lɛkɛ 33 polo 38. Sɛdingola alako woshawɔ lo kɛnɛ kendana l’eyango wahombayɛ sala la wolo dia mbakotsha. Lo eyangelo ayɛ, wɛ koka mbishola dikambo dimɔtshi diakete diahaleke mbeyama diɔtɔnɛ la dui diɔmbɔlayɛ. Kana wɛ koka mbishola dikambo di’oyoyo diofundjiwɔ lo tita sango dialembetshiya dui diayoyɔtɛkɛta.

Etena kasɛdingolayɛ awui wayoyotɔmbɔla, kana yimba dimɛna lo ndjaoka wembola ɛnɛ kakɔna? lande na? etena kakɔna? lende? onto akɔna? ndo ngande? Ɛnyɛlɔ: Lande na kele dikambo sɔ mɛtɛ? Ngande wakokami mɛnya mɛtɛ kadiɔ? Naa dui dimɔtshi dietawɔ anto efula diâshimba dia shihodia dikambo dia mɛtɛ dia lo Bible nɛ? Lande na kediɔ ohomba? Ngande wakokadiɔ monga la shɛngiya lo lɔsɛnɔ l’onto? Ɛnyɛlɔ kakɔna kɛnya ɛlɔlɔ waya lo kamba ladiɔ? Kakɔna kɛnya dikambo dia mɛtɛ dia lo Bible nɛ lo kɛnɛ kendana la lonto la Jehowa? Lo ndjela awui wayangayɛ mɔmbɔla, wɛ koka ndjambola ɔnɛ: Etena kakɔna kakatombe dikambo nɛ? Ngande wakokaso mɛnya ohomba adiɔ ɛlɔ kɛnɛ? Wɛ koka salanganya sawo diayɛ lo mboka ndo lo kadimola lo wembola etena kashayɛ sawo diayɛ.

Sawo diayɛ koka kɔlɔmba dia kamba l’avɛsa amɔtshi wokeyaka ampokami ayɛ. Kakɔna kakokayɛ sala di’ampokami kondja wetshelo w’ɔlɔlɔ oma l’avɛsa asɔ? Tadiake tsho avɛsa akɔ; koko lembetshiyawɔ.

Ampokami koka ndjokondja wetshelo w’ohomba oma lo divɛsa dimɔtshi dieyama efula naka wɛ dihembola lo tenyi tenyi, mbut’ate tatɛ nembetshiya etenyi ka ntondo, ko l’ɔkɔngɔ wɛ ndjolembetshiya etenyi kekina, lo sɔtɔla tenyi diɔtɔnɛ la lokanyi loleki ohomba la sawo ko dilembetshiya. Ɔsa ɛnyɛlɔ ka divɛsa diele oko Mika 6:8 lo Traduction du monde nouveau. “Losembwe” kɛdikɛdi na? Ɛlɛmbɛ wa losembwe waki na watɛkɛtama lanɛ? Ngande wayoyɛnya kɛnɛ kalembetshiya “monga la losembwe”? Kana “nanga kɛnɛ kele ɔlɔlɔ”? Ndjakitshakitsha kɛdikɛdi na? Ngande wayoyɛnya ohomba w’awui asɔ naka wɛ ekɔ lo tɛkɛta l’opalanga w’onto? Lo mɛtɛ, lokanyi layɛ loleki ohomba, oyango ayɛ, ampokami ayɛ, ndo wenya wakawakosha mbayoshikikɛ awui wayoyokamba la wɔ.

Mbala efula ekɔ ohomba nembetshiya tɔtɛkɛta tokambi layɛ lo yoho ya wɔdu. Anto amɔtshi ndjokondjaka kanyi mɔtshi y’oyoyo etena kalembetshiyawɔ kitshimudi ya tshɛkɛta “diulelu” yele lo Mateu 6:10. Mbohola olembetshiyelo ɔmɔtshi koka kimanyiya kânga Okristo waya edja lo mɛtɛ dia ndeka shihodia kɛnɛ kata divɛsa dimɔtshi. Dui sɔ mɛnamaka hwe etena kadiaso 2 Petero 1:​5-8 ko oma lâsɔ sho nembetshiya awui wotshikitanyi wele l’avɛsa asɔ: mbetawɔ, ɔlɔlɔ, ewo, ndjakimɛ, etetemalelo, omamemelo wa Nzambi, ngandji k’anto l’ɔnangɔ, ndo ngandji. Etena kakambayɛ la tɔtɛkɛta tele oko l’olembetshiyelo wamɛ lo dihole ɔtɔi, yoho yayotilembetshiya koka kimanyiya ampokami dia titshikitanya. Ɛnyɛlɔ oko tɔtɛkɛta tɔnɛ: lomba, ewo, shɛnɔdi, ndo eokelo tokambi lawɔ lo Tukedi 2:1-6.

Ampokami koka kondja wetshelo w’ohomba naka wɛ kana la wɔ yimba paka lo divɛsa ɔtɔi. Anto efula mambaka etena keyawɔ mbala ka ntondo dia lo dikadimwelo dimɔtshi dia Bible l’Etatelo 2:7 Adama mbelamɛka anima wasɛna ndo ɔnɛ lo ndjela Ezekiyɛlɛ 18:4 (NW), anima mvɔka. Mbala kɛmɔtshi, Yeso akambiya Asaduka lo tɛkɛta awui wa l’Etumbelu 3:6, wakawataka ɔnɛ vɔ mbaetawɔka, ko l’ɔkɔngɔ diko nde mbɔtɔnganyiya awui akɔ la eolwelo ka wanɛ wavɔ.​—Luke 20:37, 38.

Mbala mɔtshi ekɔ nto ohomba nembetshiya awui watama l’etenyi kele divɛsa dimɔtshi, awui wakete nshi yakafundama dikambo diakɔ, ɔnɛ lakaditɛkɛtaka kana lakadihokamɛka. Afarisɛ wakeyaka awui wa l’Osambu 110 dimɛna. Koko, Yeso akakotola yambalo yawɔ oya lo dui dimɔtshi di’ohomba diatanema lo divɛsa dia ntondo. Nde akawambola ate: “Ukundi akananyu dia Kristu na? Kanula ya na yendi? Vo wakawutela vati: Kanula ya Davidi. Ndi akawambula ati: Ukundi akaweti Davidi lakaludiama la nyuma [k’ekila], ati: Khumadiondjo, akandati ati: [Jehowa] akatela [“Nkumadiɔndjɔ,” NW] ati: Udjase lu lunya lami la pami, edja ndu lambukitsha atunyi aye la tshina di’ekulu aye? Naka Davidi akaweti ati: Khumadiondjo, ya ukundi wendi kanula yandi?” (Mat. 22:41-45) Naka wɛ kana l’anto yimba l’Afundelo oko wakasale Yeso, kete wɛ ayowakimanyiya dia mbadia Ɔtɛkɛta wa Nzambi la yambalo tshɛ.

Etena kasha ɔtɛkɛtshi datɛ diakafundama dibuku dimɔtshi dia lo Bible kana etena kakatombe dikambo dimɔtshi, nde la dia mbuta ndo awui wakalekaka monga lo nshi yakɔ. Ngasɔ mbayoleka ampokami shihodia ohomba wa dibuku kana wa dikambo diakɔ.

Okambelo wa la wɛdikelo koka kokimanyiya di’awui watayɛ ndeka mbisha anto wetshelo. Wɛ koka mɛnya otshikitanu wele lasa kanyi mɔtshi yetawɔ anto efula la kɛnɛ kata Bible lo dikambo dia kanyi yakɔ. Kana wɛ koka mbɛdika ɛkɔndɔ ehende wa lo Bible wafɔna. Onde etshikitanu ɛmɔtshi wekɔ? Lande na? Wetshelo akɔna wakondjaso oma l’etshikitanu ɛsɔ? Naka wɛ sala ngasɔ, kete ampokami ayɛ koka kondja kanyi mɔtshi y’oyoyo oma lo dui diɔmbɔdiyɛ.

Naka wambokosha sawo diele l’awui amɔtshi wendana l’olimu w’Okristo, kete wɛ koka mɔtsha sawo diayɛ lo tatɛ mɛnya awui tshɛ wayangayɛ mɔmbɔla lo tshena pe. Lembetshiya kɛnɛ kahombama salema, bonde kahombatɔ salema, ndo ngande wendana dikambo diakɔ l’oyango wa komelo w’olimu aso oko weso Ɛmɛnyi wa Jehowa. Oma lâsɔ, ko wɛ nembetshiya lende, etena kakɔna, ndo woho wa sala dikambo diakɔ.

Ko ayoyosala naka sawo diayɛ mendanaka ‘l’awui waki Nzambi woshami etale’? (1 Kor. 2:10) Naka wɛ ayomɛ la mɛnya ndo la nembetshiya awui amɔtshi w’ohomba efula wa lo sawo diayɛ, kete awui akina wayoleka mbokɛma esadi eto. Ndo naka l’ɛtɛkɛta ayɛ wa ndjihelo wɛ ayɛnya awui wɔmbɔdiyɛ lo tshena pe, kete ondo ampokami ayɛ wayoka dia wakeki mɛtɛ dui dimɔtshi di’ɔlɔlɔ.

Dako diendana la yoho ya lɔsɛnɔ l’Okristo. Ampokami ayɛ wayokondja wahɔ efula naka wɛ mbakimanyiya dia vɔ mɛna woho wendana awui wa lo sawo diayɛ la nsɛnɔ yawɔ. Etena kasɛdingolayɛ avɛsa wa lo sawo diakawakosha, yambola wate: ‘Bonde kakalamema awui anɛ l’Afundelo polo ndo lo nshi yaso nyɛ?’ (Romo 15:4; 1 Kor. 10:11) Kanyiya weho w’ekakatanu wa lo lɔsɛnɔ wele l’ampokami ayɛ. Enda woho wɔtɔnɛ awui wele lawɔ la dako ndo l’atɔndɔ wa l’Afundelo. Lo sawo diayɛ, kana la wɔ yimba l’Afundelo dia mɛnya woho wakokawɔ kimanyiya onto dia ndɔshana l’ekakatanu wa ngasɔ la lomba tshɛ. Tekɔnɛke l’awui tshɛ. Tɛkɛta dikambo dia waonga kana dia ditshelo dimɔtshi dia shikaa.

Dia tatɛ, kamba la dako ɔtɔi kana ahende l’atei w’alako wele la diko ango lo sawo dieyɛ lo nɔngɔsɔla. Naka wɛ ambohotɔ alako akɔ ko wɛ ndjokamba l’efula ka l’atei awɔ. L’edjedja ka wonya, wɛ ayɛna dia ampokami wokongɛka alako ayɛ l’ɔngɛnɔngɛnɔ tshɛ wele l’elongamelo ɔnɛ wayoka dikambo dimɔtshi di’ohomba diayonga la wahɔ le wɔ.