Ɔtɔtɔmiyelo w’awui woleki ohomba

NAA awui woleki ohomba lo sawo? Vɔ kema awui amɔtshi w’amɛna wata onto lo tshena pe ko mbeta l’awui akina. Vɔ wekɔ tokanyi t’ohomba tayoyɔmbɔla. Vɔ wekɔ tokanyi t’ohomba efula takokimanyiya dia kotsha oyango ayɛ.

Dia wɛ ndeka tɔtɔmiya awui woleki ohomba, wɛ la dia sɔna ndo kongɛ awui wa lo sawo diayɛ l’ɔlɔlɔ tshɛ. Mbala efula, lam’asalayɛ eyangelo wendana la sawo diayɛ, wɛ ayotana awui efula woleki ndo wanɛ wakokayɛ kamba la wɔ. Ngande wakokɛ shikikɛ awui wa kamba la wɔ na?

Ntondotondo, kana yimba lo dikambo di’ampokami ayɛ. Onde vɔ mbeyaka dui diayoyɔmbɔla dimɛna kana bu? Onde efula kawɔ mbetawɔka kɛnɛ kata Bible lo kɛnɛ kendana la dui diakɔ, kana amɔtshi diɔnyɔlaka? Naa ekakatanu wahomana lawɔ lo lɔsɛnɔ la lushi la lushi lam’asalawɔ la wolo dia kamba la kɛnɛ kata Bible lo dui sɔ na? Dui dia hende, yashikikɛ dia wɛ ekɔ lo mbeya dimɛna oyango watayawese etena kayoyɔtɛkɛta la ntondo k’ampokami asɔ lo dui dialɔngɔsɔlayɛ dia kamba ladiɔ. Lo kamba l’alako ahende anɛ, sɛdingola awui wamboyotana ndo sɔna paka wanɛ wele ohomba.

Naka wakakosha ekongelo kele ndo la lokanyi loleki ohomba ndo l’awui woleki ohomba, kete wɛ la dia kiyela. Koko, anto wayɔsa awui watayɛ la nɛmɔ efula, naka wɛ mbidja yimba l’awui wotami la diko ango etena kɔmbɔlayɛ dui tshɛ dioleki ohomba. Ko naka vɔ kokosha ekongelo, kete wɛmɛ mbahomba sɔna awui woleki ohomba.

Naka wɛ ambɔsɔna awui woleki ohomba ndo ambɔlɔngɔsɔla kɛnɛ kayoyɔmbɔla l’ɛse k’awui akɔ, kete ayonga wɔdu dia wɛ mbisha sawo diayɛ. Ampokami ayɛ vɔ lawɔ wayokondja wahɔ efula oma lɔkɔ.

Toho totshikitanyi ta kongɛ awui ayɛ. Ekɔ toho efula takokayɛ ndjela dia kongɛ akambo wa lo sawo diayɛ. Lam’ayoyekesanɛ la toho tɔsɔ, wɛ ayɛna dia efula ka l’atei atɔ koka mbisha etombelo w’ɔlɔlɔ, lo ndjela oyango watayawese.

Yoho mɔtshi ya wɔdu ele kahanya awui lo tenyi. (Dui tshɛ dioleki ohomba pombaka monga nɛ dia diɔ mbahɛka yema ya eokelo lo timba t’ampokami lo kɛnɛ kendana la dui diɔmbɔlayɛ kana kokimanyiyaka dia kotsha oyango ayɛ.) Yoho kina ele nɔnga awui lo ndjela woho wakawayatshamaka. (Ɛnyɛlɔ, oma l’ɔkɔngɔ wa tɛkɛta dikambo di’awui wakete la ntondo ka Mvula k’Elola, wɛ koka tɛkɛta di’awui wakete la ntondo k’elanyelo ka Jerusalɛma l’ɔnɔnyi 70 T.D., ko oma lâsɔ wɛ tɛkɛta di’awui weta lo nshi yaso nyɛ.) Yoho ya sato ele mɛnya kiɔkɔ la etombelo wa dikambo. (Lanɛ wɛ koka tatɛ woho walangɛ. Ɛnyɛlɔ, wɛ koka tatɛ la dui dimɔtshi dieke katomba, ko mɛnya etombelo adiɔ ndo komiya la mɛnya kiɔkɔ ya dui diakɔ.) Yoho ya nɛi ele mɛnya otshikitanu wele lam’asa awui ahende. (Wɛ koka mɛnya otshikitanu wele lasa ɔlɔlɔ la kɔlɔ.) Mbala mɔtshi, wɛ koka kamba la toho efula lo sawo ɔtɔi.

Lam’akawahindɛ Stɛfano onongo la ntondo ka Tuminadi t’ase Juda, nde akasha sawo dia mamba lo ndjela woho wakayahɔnaka awui. Naka wɛ mbadia Etsha 7:​2-53, kete wɛ ayɛna dia nde akasɔnɛ awui wa tɛkɛta l’oyango ɔmɔtshi. Ntondotondo Stɛfano akɛnya hwe dia nde akakɔndɔlaka ɔkɔndɔ wele ampokami ande kokoka manguna. Oma lâsɔ, nde akate dia kânga mbakatonama Yɔsɛfu oma le anango, Nzambi akakambe la nde dia mbatshungola. Nde akɛnya nto dia ase Juda komonga l’okitanyiya otsha le Mɔsɛ, lele Nzambi akakambaka la nde. Nde akakumiya lo tɔtɔmiya ɔnɛ woho wa dionga diaki l’ase Juda wa lo nɔnga yakete diakɛnama ndo le wanɛ wakadiakisha Yeso Kristo.

Awui woleki ohomba watongake efula kamboleka. Lokanyi loleki ohomba la sawo tshɛ la dia monga paka l’awui angana ato woleki ohomba wa mɔmbɔla. Mbala efula, awui asɔ hawohombe ndekana atanu. Ɔsɔku mbediɔ oyadi kânga sawo diayɛ diekɔ dia minitɛ 5, 10, 30, kana ndekana. Tonake dia monga l’awui efula wa tɔtɔmiya. Lo sawo ɔtɔi, ampokami ayɛ wayonga l’akoka wa shihodia paka tokanyi tongana toto totshikitanyi. Naka sawo diekɔ otale efula, kete awui w’ohomba efula wa lɔkɔ pombaka mbokɛma hwe ndo nembetshiyama dimɛna.

Oyadi lofulo la ngande l’awui woleki ohomba wayokamba layɛ, sala tshɛ dia mɔmbɔla dui tshɛ dimɛna dimɛna. Sha ampokami etena kakoka ka vɔ sɛdingola dui tshɛ di’ohomba dia vɔ kakatshiya awui akɔ lo wɔɔngɔ.

Anto la dia mɛna di’awui wa lo sawo diayɛ wekɔ wɔdu kimɛ. Dui sɔ halemanɛ mbala tshɛ la lofulo l’awui wayoyɔmbɔla. Naka wɛ tshumanya tokanyi tayɛ dimɛna paka lo awui woleki ohomba angana ato ndo mɔmbɔla dui tshɛ l’ɔnɔngɔ, kete sawo diayɛ diayonga wɔdu ndjela ndo wolo mbohamɛ.

Kɛnɛmɔla awui woleki ohomba. Naka wɛ kongɛ awui ayɛ dimɛna, kete wɛ hatonga l’okakatanu dia nembetshiya dimɛna awui woleki ohomba wa lo sawo diayɛ.

Yoho yoleki dimɛna ya kɛnɛmɔla dui dioleki ohomba ele mbisha tolembetelo, avɛsa, ndo awui akina lo yoho yakoka awui akɔ kotola yambalo lo kanyi yoleki ohomba ndo ndeka ndjilembetshiya dimɛna. Awui tshɛ wele bu ohomba efula pombaka mpotola, shikikɛ, kana nembetshiya dui dioleki ohomba. Tokotshake awui wahendana la kɛnɛ katɛkɛtayɛ paka nɛ dia wɛ ambangɛnangɛna. Etena kɔmbɔlayɛ awui wele bu ohomba efula, ɛnya hwe woho wɔtɔnɛwɔ l’awui woleki ohomba wasukɛwɔ. Totake wate ampokami wayoshihodia awui asɔ vamɛ. Wɛ koka mɛnya woho wɔtɔnɛ awui asɔ lo mbohola tɔtɛkɛta t’ohomba takɛnɛmɔla tokanyi toleki ohomba kana lo mboholaka oyango wa dui diakɔ dioleki ohomba mbala la mbala.

Atɛkɛtshi amɔtshi kɛnɛmɔlaka awui woleki ohomba lo mbuta lofulo lawɔ. Kânga mbele ɔsɔ ekɔ yoho mɔtshi ya tɔtɔmiya awui woleki ohomba, dui sɔ hahombe koshimba dia sɔna awui dimɛna ndo mbaɔmbɔla l’ɔnɔngɔ.

Wɛ koka mɛna ɔlɔlɔ mbuta dui dioleki ohomba diayangayɛ mɔmbɔla la ntondo ka wɛ mbisha tokanyi tadisukɛ. Kɛsɔ ayokimanyiya ampokami dia shihodia ohomba wa kɛnɛ kayela ndo dikambo sɔ diayɔtɔtɔmiya nto dui sɔ dioleki ohomba dimɛna. Wɛ koka nyomoleka tɔtɔmiya dui diakɔ lo diohola lo tshena pe naka wɛ amboshidiya la diɔmbɔla.

L’olimu w’esambishelo. Awui wɔtɛkɛtshiso la diko ango hendana tsho l’asawo washayɛ oma lo lɔyɛnga koko ndo l’asawo ayɛ wa l’esambishelo. Lam’ayalɔngɔsɔlayɛ, kanyiya awui w’ohomba wele lo timba t’anto wa l’ɛtshi kayɛ ka nkɛtɛ. Sɔna lokanyi loleki ohomba layokosha diaaso dia mɛnya woho wele elongamelo kasha Bible ayokandola okakatanu ɔsɔ. Wɛ koka sɔna awui ahende woleki ohomba dia mɔmbɔla lokanyi loleki ohomba lɔsɔ. Enda avɛsa wakoka kamba layɛ dia sukɛ awui asɔ. Oma lâsɔ ko wɛ nɔngɔsɔla woho wayoyomɛ sawo diayɛ. Naka wɛ ndjalɔngɔsɔla ngasɔ, kete wɛ ayɛna dia wɛ ayokoka tshikitanya awui wa lo sawo diayɛ etena tshɛ konga dikambo sɔ ohomba. Dui sɔ diayokokimanyiya nto dia mbuta dikambo dimɔtshi diahatohɛ ampokami ayɛ.