Kamba l’awui wakawakosha

BIBLE mbɛdikaka etshumanelo k’Akristo la demba di’onto. Etenyi tshɛ kekɔ ohomba, koko ‘diɔ tshɛ kema l’olimu wamɛ.’ Lo ndjela dui sɔ, sho la dia kamba dimɛna l’ɔkɛndɛ tshɛ wakawatosha. Kɛsɔ nɔmbaka dia sho shihodia ndo nɔngɔsɔla sawo tshɛ diatoshawɔ dimɛna lo dihole dia mɔnyɔla ohomba adiɔ nɛ dia sho fɔnyaka ɔnɛ asawo akina ndeka amɛna. (Romo 12:4-8) Ɔhɔmbɔ wa kɔlamelo ndo wa kɛsɔ mbele l’ɔkɛndɛ wa tosha mbo ya ndɛ ya lo nyuma lo “tena diayo.” (Mat. 24:45) Etena kakambaso l’akoka aso hita dia mbisha asawo lo ndjela alako wakawatosha, sho mɛnyaka woho walɛmiyaso ndo wangɛnangɛnaso ɛlɔngɔswɛlɔ kɛsɔ. Kɛsɔ kimanyiyaka di’etshumanelo k’otondo kɛndakɛnda dimɛna.

Awui wa mbidja lo sawo. Naka wambokosha sawo dimɔtshi lo kalasa, kete yashikikɛ dia diɔ mɔmbɔlayɛ koko aha dikambo dikina. Mbala efula, wayokɛnya shikaa oma lɛnɛ ahombayɛ mbɔsa awui ayɛ. Naka hawokote oma l’abuku akɔna wɔsami sawo diayɛ, kete wɛ koka mbɔsa awui oma l’ekanda wayoyolanga. Koko lam’alɔngɔsɔlayɛ sawo diayɛ, yashikikɛ dia kɛnɛ tshɛ kayoyɔtɛkɛta mendanaka la dui diakawakosha. Lam’asɔnayɛ awui akina wa mbidja, wɛ la dia kanyiya dikambo di’ampokami ayɛ.

Eka awui wakawakosha dimɛna ndo sɛdingola avɛsa wele l’etenyi kakɔ. Oma lâsɔ ko wɛ menda woho wa kamba la tokanyi takɔ dimɛna lo wahɔ w’ampokami ayɛ. Sɔna tokanyi tohende kana tosato oma l’ekanda wɔsami sawo diayɛ woho wa kamba la wɔ oko awui woleki ohomba wa lo sawo diayɛ. Sɔna nto avɛsa wayoyadia ndo wayoyolembetshiya oma l’ekanda wɔsami sawo diayɛ.

Awui angana wahombayɛ mɔmbɔla? Hembetɛ paka awui wakokayɛ nembetshiya dimɛna. Tonake dia mɔmbɔla awui efula amboleka polo ndo wetshelo ndjonga bu dimɛna. Naka awui amɔtshi hawɔtɔnɛ l’oyango wa sawo diayɛ, kete yasha paka l’awui wayokokimanyiya dia kotsha oyango akɔ. Oma l’awui wakawakosha, kamba la wanɛ wayoleka mbisha wetshelo ndo wele ampokami wayokondja wahɔ oma lɔkɔ. Oyango ayɛ lo kɛnɛ kendana la dako di’ɔtɛkɛtshi nɛ kema wa mɛna awui angana wakokayɛ mɔmbɔla, koko wa mbeya kamba dimɛna la kɛnɛ kakawakosha dia mɔmbɔla lo sawo diayɛ.

Sawo diayɛ hadiohombe mɔmbɔla tsho awui wakawakosha lo tshena pe. Koko pombaka wɛ ndjalɔngɔsɔla dia nembetshiya awui amɔtshi, mbisha elembetshiyelo wa lâdiko wendana l’awui akɔ, mbisha bɛnyɛlɔ diendana la wɔ, ndo mbala mɔtshi mbisha ɛnyɛlɔ kɛmɔtshi kakɛnɛmɔla ohomba w’awui akɔ. Wɛ la dia kamba la tokanyi ta lâdiko dia mɔmbɔla awui w’ohomba wa lo sawo diakawakosha lo dihole dia kamba l’awui akina.

Tena dimɔtshi vɔ nɔmbaka anangɛso wele l’akoka wahombama w’embetsha dia mbisha wetshelo lo Losanganya l’Olimu. Vɔ mbeyaka ohomba wa kamba dimɛna l’awui wakawawasha lo dihole dia kamba l’awui akina wakiwɔ kombasha. Woho akɔ wamɛ mbele anangɛso washawɔ asawo wa lo sɛkɛ nongolaka dikongelo dia ndjela. Dikongelo sɔ mbashaka yema ya lotshungɔ ya mbidja towui tɔmɔtshi, koko diɔ mɛnyaka hwe awui woleki ohomba wahomba mɔmbɔma, tokanyi ta kamba latɔ, ndo avɛsa wasukɛ sawo diakɔ. Mbeka woho wa mbetsha lo kamba paka l’awui wakawatosha ekɔ dui dimɔtshi di’ohomba lo kɛnɛ kendana l’ɔlɔngɔswɛlɔ w’asawo akina watoshawɔ.

Wekelo ɔsɔ kokaka kokimanyiya nto dia nɔmbɔla wekelo wa Bible wakimanyiya onto dia tahamaka. Wɛ ayeka woho wa mbeya kotola yambalo y’ambeki paka l’awui wele lo dibuku diekanyu lo dihole dia mimɔ oma lo kɛnɛ kekanyu ko mɔmbɔla awui akina wele ondo wekɔ ɔlɔlɔ koko bu ohomba dia sawo diayɛ mbokɛ dimɛna. Ɔnkɔnɛ, naka wɛ amboshihodia oyango wa sawo dimɛna, kete wɛ koka mbisha ombeki elembetshiyelo ekina wakoka monga lande ohomba, lo dihole dia pembetɛ paka l’awui wele lo kɛnɛ kekanyu.