Woho wa sala ekongelo ka sawo

LAM’ALONGOLAWƆ sawo dia mbisha, anto efula salaka la wolo dia difunda, tatɛ oma lo mbɔtwɛlɔ polo ndo l’ɛtɛkɛta wa ndjihelo. La ntondo ka sawo shila la nɔngɔswama, onto koka tanema la lokaka l’akatshi lamondofunda nɔtɛ. Dui sɔ koka mbɔsa wenya efula.

Onde ngasɔ mbatoyɔlɔngɔsɔlaka asawo ayɛ? Onde wɛ nangaka mbeya yoho yoleki wɔdu? Naka wɛ mbeka woho wa sala ekongelo ka sawo, kete wɛ hatɛnaka pâ nto dia fundaka kiambokambo tshɛ. Dikambo sɔ diayokosha etena efula ka mbohola sawo diayɛ. Sawo diayɛ hadiotonga tsho wɔdu dia disha, koko diɔ diayɔngɛnyangɛnya anto ndo diayotshutshuya ampokami ayɛ dia mbɔsa yɛdikɔ mɔtshi.

Lo kɛnɛ kendana l’asawo wa lo sɛkɛ washama l’etshumanelo, vɔ mbishaka onto ekongelo. Koko, asawo akina efula washawɔ anto bu l’ekongelo. Vɔ koka kosha tsho dui kana lokanyi lɔmɔtshi loleki ohomba la mɔmbɔla. Kana vɔ koka kɔlɔmba dia mbisha sawo oma l’awui wa l’etenyi kɛmɔtshi k’okanda kana ka periodikɛ. Mbala mɔtshi, vɔ koka kosha paka alako amɔtshi ato wendana la woho wa mbisha sawo. Lo kɛnɛ kendana la weho w’asawo asɔ tshɛ, wɛ mbahomba sala ekongelo kayɛ hita.

Ɛnyɛlɔ ka lo lɛkɛ 41 la wekelo ɔnɛ kayokosha kanyi mɔtshi lo woho wakokayɛ nɔngɔsɔla ekongelo kɛmɔtshi ka sawo ka mondo. Wɛ ayɛna di’awui tshɛ woleki ohomba tatɛ fundama l’ohembo wa dikatshi wa lo lonya la lɔmɔsɔ ndo vɔ fundama l’alɛta wa weke. L’ɛse ka dui tshɛ dioleki ohomba, vɔ funda tokanyi tasukɛ dui diakɔ. Awui akina wayokamba layɛ dia nembetshiya tokanyi tɔsɔ wekɔ l’ɛse kawɔ ndo vɔ mbakakitola yema tshitshɛ l’ohembo wa lo lonya la lɔmɔsɔ. Sɛdingola ekongelo kakɔ dimɛna. Wɛ ayɛna dia tɔ kekɔ l’awui ahende woleki ohomba wɔtɔnɛ mbala kakɔ ɔtɔi la lokanyi lokeko ohomba la sawo. Wɛ ayɛna nto di’awui wele yema ohomba kema tsho amɛna koko dui la dui sukɛka dui dioleki ohomba diele la diko kadiɔ.

Etena kalɔngɔsɔlayɛ ekongelo ka sawo dimɔtshi, mbeyaka monga ko diɔ hadiɔtɔnɛ tshɛ lo tshɛ l’ɛnyɛlɔ koshaso kɛnɛ. Koko, naka wɛ shihodia atɔndɔ wendana la dikambo nɛ, kete vɔ wayokokimanyiya dia wɛ kongɛ awui ayɛ ndo nɔngɔsɔla sawo dia dimɛna efula lo yɛdikɔ ya wonya yahombama. Ngande wahombayɛ sala dui sɔ na?

Sɛdingola, sɔtɔla, ndo lɔnga awui

Wɛ la dia monga la lokanyi lɔmɔtshi loleki ohomba la mɔmbɔla. Lɔ kema dui dimɔtshi diele bu shikaa ndo diakokayɛ nembetshiya lo tshɛkɛta tshɔi. Lɔ lekɔ kanyi y’ohomba efula yalangayɛ mbewoya anto, ndo lɔ mɛnyaka yoho yakayakongɛ dia mɔmbɔla sawo diayɛ. Naka wakakosha lokanyi lɔmɔtshi l’ohomba la mɔmbɔla, kete sɛdingola dimɛna tshɛkɛta tshɛ y’ohomba yele lɔkɔ. Naka wambotakɔsɔnɛki lokanyi loleki ohomba (thème) lo ndjela awui w’oma lɛnɛ ɔsamilɔ, kete eka awui akɔ dimɛna dimɛna aha la mbohɛ lokanyi loleki ohomba layoyohomba mɔmbɔla. Ko naka wakakosha tsho paka awui wa mɔmbɔla aha la kɔsɔnɛ lokanyi loleki ohomba, kete wɛmɛ mbayohomba sɔna lokanyi loleki ohomba. Koko, la ntondo ka wɛ lisɔna, ekɔ ohomba dia wɛ sala yema y’eyangelo. Wɛ ayotana tokanyi t’eyoyo lo sala awui asɔ.

Wonya watayayele wanya asɔ, tetemala la ndjambola wate: ‘Bonde kele awui anɛ wekɔ ohomba le ampokami ami? Oyango akɔna wele lami?’ Oyango ayɛ hawohombe monga paka wa shidiya awui wele lo sawo diayɛ kana wa mbisha sawo di’ɔnɛ kawotake, koko ampokami ayɛ la dia kondja wetshelo ɔmɔtshi w’ohomba. Naka wɛ amboyashikikɛ oyango watayawese lo yimba, kete fundawɔ lofunda. Ohɔkawɔ wonya weyɛ lo nɔngɔsɔla sawo diayɛ.

L’ɔkɔngɔ wa wɛ shikikɛ oyango ayɛ ndo wa sɔna lokanyi loleki ohomba lɔtɔnɛ l’oyango akɔ (kana wasɛdingola woho wɔtɔnɛ lokanyi loleki ohomba lakawakosha l’oyango akɔ), wɛ koka tatɛ sala eyangelo wendana paka la dui diakɔ. Yanga awui wayonga ohomba efula le ampokami ayɛ. Tolalɔlalɔke l’awui efula, koko yanga paka awui amɔtshi wa shikaa washa wetshelo ndo ekimanyielo ka mɛtɛ. Tosalake eyangelo wambotamba olelo. Mbala efula, wɛ ayoyotanema esadi eto l’awui efula wakoka kamba layɛ, ɔnkɔnɛ, lasɔ ayonga ohomba wɛ sɔtɔla wanɛ wele ohomba.

Teyi awui woleki ohomba wayoyolembetshiya dia wɛ mbeya mɔmbɔla lokanyi loleki ohomba la sawo ndo kotsha oyango ayɛ. Awui woleki ohomba asɔ mbayosukɛ sawo diayɛ. Awui angana woleki ohomba wahomba monga lo sawo na? Mbeyaka monga tsho ohomba w’awui ahende naka sawo diekɔ mondo, ndo mbala efula naka amonga awui atanu kete ambokoka oyadi sawo diayɔsa wonya a tango. Naka awui woleki ohomba wekɔ yema tshitshɛ, kete ampokami ayɛ hawotonga l’okakatanu dia mbakimɛ.

Naka wɛ ambokimɛ lokanyi loleki ohomba ndo awui woleki ohomba wayoyɔmbɔla, kete lâsɔ wɛ koka nɔnga awui ayɛ. Enda awui akɔna wɔtɔnɛ mbala kakɔ ɔtɔi l’awui woleki ohomba wakayasɔnyi. Sɔtɔla awui wayela tokanyi t’eyoyo lo sawo diayɛ. Etena kasɔnayɛ avɛsa amɔtshi dia sukɛ awui woleki ohomba, yanga tokanyi tayokokimanyiya dia kana yimba l’avɛsa akɔ woho wa mbalembetshiya lo yoho ya dimɛna. Dja dui tshɛ l’ɛse ka dui dioleki ohomba diasukɛdiɔ. Naka awui amɔtshi hawɔtɔnɛ l’awui tshɛ woleki ohomba wayoyɔmbɔla, kete nyawɔ, oyadi wekɔ amɛna efula, kana ombawɔ dia ndjokamba la wɔ mbala kekina. Kamba paka l’awui woleki ohomba. Naka wɛ pemba kamba l’awui wamboleka efula, kete dui sɔ diayokɔlɔmba dia tɛkɛta esadi esadi ko awui wa lo sawo diayɛ ndjonga paka lahahɛ. Ekɔ dimɛna efula mɔmbɔla awui angana ato wele mɛtɛ ohomba efula le ampokami ndo mɔmbɔla awui akɔ dimɛna dimɛna. Tɔlɛke wenya.

Naka wɛ hatasadi dui sɔ la ntondo, kete aya wɛ nɔngaka awui ayɛ dimɛna lo woho wahɔnyiwɔ. Kɛsɔ mbakasale Luka, ofundji ɔmɔtshi w’Evanjiliɔ. L’ɔkɔngɔ wa nde tshumanya awui efula wendana la dui diande, nde akâlɔngɛ “l’onondji w’ololo.” (Luka 1:3) Wɛ koka nɔnga awui ayɛ lo ndjela adatɛ wakawayatshamaka kana lo ndjela ohomba wa dui la dui, ondo lo ndjela awui waki lo kiɔkɔ ndo etombelo waki l’awui akɔ, kana lo ndjela okakatanu waki l’awui akɔ ndo woho wakakandɔma okakatanu akɔ. Ɔlɔngɛlɔ w’awui nemanɛka la kɛnɛ koleki ohomba dia wɛ kotsha oyango ayɛ. Tomɔke oma lo kanyi mɔtshi otsha lo kanyi kina aha la momuya yema. Ampokami ayɛ la dia teyaka esadi eto dia wony’ɔsɔ wɛ ambomɔ oma lo dui kapanda otsha lo dui dikina. Tolembetelo toshayɛ la dia konya ampokami lo kitshimudi yokɛma dimɛna. Lam’alɔngayɛ awui ayɛ, kanyiya woho wayɔtɔ awui akɔ l’atui w’ampokami. Onde vɔ wayotayelaka woho watayɔmbɔla tokanyi tayɛ aha l’okakatanu? Onde vɔ wayotshutshuyama dia kamba la kɛnɛ kokawɔ, lo ndjela oyango wele layɛ lo yimba?

Oma lâsɔ, ko wɛ nɔngɔsɔla mbɔtwɛlɔ kayemula nsaki k’anto oya lo sawo diayɛ ndo tɔ kayɛnya ampokami ayɛ di’awui wayangayɛ mɔmbɔla wekɔ ohomba efula le wɔ. Mbeyaka monga ohomba dia wɛ funda tɔtɛkɛta ta mbɔtwɛlɔ lofunda. L’ekomelo, lɔngɔsɔla ɛtɛkɛta wa ndjihelo wayotshutshuya anto dia mbɔsa yɛdikɔ mɔtshi ndo wɔtɔnɛ l’oyango ayɛ.

Naka wɛ nɔngɔsɔla sawo diayɛ kɔlɔmɔ, kete wɛ ayonga l’etena ka dilɔngɔsɔla dimɛna la ntondo ka wɛ todisha. Ondo wɛ koka mɛna ohomba wa kamba la toshifidi dia mɛnya wɛdikelo ɔmɔtshi, kana l’ɛnyɛlɔ, kana la dui dimɔtshi diakete dia sukɛ tokanyi tɔmɔtshi. Lo kamba la dui dimɔtshi dieke katomba kana la dui dimɔtshi diayasha anto wa lo ngelo kanyu, wɛ koka kimanyiya ampokami dia vɔ mɛna ohomba w’awui wɔmbɔlayɛ. Naka wɛ vusola sawo diayɛ, kete wɛ ayonga l’akoka wa nyomoleka mbɔtɔnganyiya awui akɔ l’ampokami ayɛ. Sɛdingola ndo sɔtɔla awui ekɔ ohomba efula dia mbeya nɔnga awui wayonga l’etombelo w’ɔlɔlɔ lo sawo.

Atɛkɛtshi amɔtshi koka monga l’ohomba wa nɔtɛ efula, koko akina bu. Ɔnkɔnɛ, naka wɛ nɔnga awui ayɛ lo sɔtɔla paka awui angana ato woleki ohomba, ndo minya awui wahaleke sukɛ awui woleki ohomba wakayasɔnyi, ndo naka wɛ nɔnga tokanyi dimɛna, kete wɛ ayɛna dia wɛ hatonga l’ohomba wa fundaka oseka vwiwui tshɛ. Dikambo sɔ mɛtɛ hatokɔsɛ wenya efula. Ndo wɛ ayolowanya yoho yayɛ ya mbisha asawo. Ayɛnama hwe dia wɛ mɛtɛ ekɔ lo kondja wahɔ oma lo Kalasa k’Olimu wa Teokrasi.