Ndjihelo ka dimɛna

MBEYAKA monga ko wɛ akasale eyangelo dimɛna ndo akakongɛ dimɛna awui wa l’etenyi kahɔnyi la mbɔtwɛlɔ ka lo sawo diayɛ. Ndo nto, ondo wɛ akalɔngɔsɔla mbɔtwɛlɔ kɛmɔtshi kemula nsaki. Koko ekɔ dui dikina diakahombama, dui diakɔ ko: ndjihelo ka dimɛna. Tɔnyɔlake ohomba wele l’ɛtɛkɛta wa ndjihelo. Mbala efula, kɛnɛ katayɛ l’ekomelo kimamɛka edja koleki. Naka ɛtɛkɛta wa ndjihelo bu amɛna, kete ndo awui wakatami ntondo hawotonga l’etombelo w’ɔlɔlɔ.

Tende awui wayela anɛ: Otsha l’ekomelo ka lɔsɛnɔ lande, Jashua akasha sawo dimɔtshi diahohamɛki la ntondo ka dikumanyi dia wodja w’Isariyɛlɛ. L’ɔkɔngɔ wa nde nyomɔkɔndɔla akambo wakasalɛ Jehowa Isariyɛlɛ tatɛ oma ko nshi y’Abarahama, onde Jashua akavusola tsho awui woleki ohomba oko onto lasha ɛɔmbwɛlɔ kɛmɔtshi ka lo tshena pe? Kema. Koko la wangasanu tshɛ nde akatɛ anto ate: “Nyukaki [Jehowa] woma. Nyûkambelaki ulimu lu mete ndu la kolamelu.” Adia wɛmamɛ ɛtɛkɛta wa ndjihelo waki Jashua wɔkɔndwami lo Jashua 24:14, 15.

Dako dikina dia dimɛna efula diatanaso lo Etsha 2:14-36, diakashama oma le ɔpɔstɔlɔ Petero la ntondo ka lemba l’anto la Jerusalɛma lo Difɛstɔ dia Pɛntɛkɔsta ka l’ɔnɔnyi 33 T.D. Ntondotondo nde akalembetshiya dia vɔ waki lo mɛna okotshamelo wa prɔfɛsiya ka Jɔɛlɛ kendana l’otshulwelo wa nyuma ka Nzambi. Oma lâsɔ, nde akɛnya nganɛ wakɔtɔnɛka dikambo sɔ la prɔfɛsiya yendana la Mɛsiya yatɛkɛtawɔ l’Esambu yakatatshi dia eolwelo ka Yeso Kristo ndo dia edjaselo kande lo dihole dia lotombo lo lonya l’omi la Nzambi. Oma lâsɔ, l’ɛtɛkɛta ande wa ndjihelo, Petero akate hwe dikambo diakahombe mendana l’ampokami ande tshɛ. Nde akate ate: “Okone khumbu tshe ka Isariyele weyi mete vati: [Nzambi] aketi Jesu ako, lakanyadiaki lu utamba [w’asui] ati: Khumadiondjo la Kristu.” Wanɛ waki lawɔ wakambola ɔnɛ: “Anengesu, kayututsha na?” Petero akakadimola ate: “Nyukadimuli etema, nyubatizami nyu tshe untu l’untu lu lukumbu la Jesu Kristu.” (Etsha 2:37, 38) Lushi lɔsɔ, yɛdikɔ y’anto 3 000 l’atei w’ampokami ande wakanandema la kɛnɛ kakawoke, ndo waketawɔ akambo wa mɛtɛ wendana la Yeso Kristo.

Awui wahombayɛ mbohɔka. Kɛnɛ katayɛ l’ɛtɛkɛta ayɛ wa ndjihelo pombaka mbɔtɔnɛ la lokanyi loleki ohomba la lo sawo diayɛ. Ɛtɛkɛta ayɛ wa ndjihelo la dia mbɔtɔnɛ dimɛna l’awui woleki ohomba wakayɔmbɔdi. Oyadi wate mbidje tɔtɛkɛta tɔmɔtshi t’ohomba t’oma l’ɔtɛ ayɛ wa sawo kana nyomovusola ɔtɛ akɔ wa dui lo ndjihelo kayɛ, dikambo sɔ mendanaka la lolango layɛ.

Esangɔ efula, oyango ayɛ ele wa keketsha anto akina dia mbɔsa yɛdikɔ mɔtshi lo ndjela awui watayɛ. Oyango ɔmɔtshi wa ndjihelo ele mbaɛnya kɛnɛ kahombawɔ sala. Lam’akayasɔnɛ lokanyi loleki ohomba ndo awui woleki ohomba wa lo sawo diayɛ, onde wɛ akasɛdingola dimɛna bonde kayonga awui akɔ ohomba le ampokami ayɛ ndo oyango watayawese lo sawo diakɔ? Naka eelo, kete wɛ mbeyaka yɛdikɔ yayoyolanga vɔ mbɔsa. Oma lâsɔ, wɛ ayohomba nembetshiya yɛdikɔ yakɔ yahombawɔ mbɔsa ndo ondo woho wakokawɔ ndjiɔsa.

Lâdiko wa mɛnya ampokami ayɛ kɛnɛ kahombawɔ sala, ɛtɛkɛta ayɛ wa ndjihelo la dia mbatshutshuya dia sala dikambo sɔ. Vɔ la dia mɛnya ɛkɔkɔ ɛmɔtshi wâtshutshuya dia sala dikambo sɔ ndo ɛlɔlɔ wayowokondja lo disala. Naka wɛ kana yimba dimɛna lo kɛnɛ kendana l’ɛnɔngɔ wa komelo wayodihiya sawo diayɛ ndo kongɛ ɛnɔngɔ akɔ dimɛna, kete vɔ wayosala dia sawo diayɛ di’otondo monga l’etombelo w’ɔlɔlɔ.

Eya dia sawo diotakomɛ. Kɛnɛ katayɛ la dia mɛnya dikambo sɔ. Aha wɛ tɛkɛta ɔkɔkɛ kana lowango lamboleka. Tɔtɛkɛtake esadi esadi naka wɛ ayanga komiya, ndo tokumiyake la shashimoya. Lo wedi okina, tokitshakitshake dui diayɛ lo yoho yamboleka. Wendjo ayɛ wa dui pombaka monga lo yɛdikɔ yakoka koko aha ya tshambandeko. Ɛnɔngɔ ayɛ engana wa komelo pombaka mbokiya dia wɛ ayanga shidiya sawo diayɛ. Lâsɔ, wɛ la dia tɛkɛta ɛnɔngɔ akɔ l’otema ɔtɔi ndo la dietawɔ tshɛ. Lam’avusolayɛ sawo diayɛ, tohɛke dia mbohola ɛtɛkɛta ayɛ wa ndjihelo.

Ndjihelo kayɛ la dia monga l’otale wa ngande? Ɔsɔ kema dui dia mbuta ɔnɛ diɔ pombaka salema lo lofulo la minitɛ kapanda aha mbahɛ kana mbahola. Ɛtɛkɛta wa ndjihelo hawohombe monga etale wamboleka. Naka ɛtɛkɛta wa ndjihelo wekɔ l’otale wasungana, kete dikambo sɔ diayokoka mɛnama oma lo shɛngiya yele l’ɛtɛkɛta akɔ le ampokami. Nshi tshɛ anto ngɛnangɛnaka ndjihelo ka wɔdu, kosembwe tɔɔ lo dikambo, ndo kakeketsha. Ndjihelo kele yema otale kele l’ɛnyɛlɔ kɛmɔtshi ka mondo koka monga nto l’etombelo w’ɔlɔlɔ naka tɔ kakalɔngɔswama dimɛna. Ɛdika ndjihelo ka mondo ka dibuku di’otondo di’Undaki, katanaso l’Undaki 12:​13, 14, la ndjihelo kendana la Dako dia lo Dikona ka mondo efula katanaso lo Mateu 7:24-27.

L’olimu w’esambishelo. Mbala efula, l’olimu w’esambishelo mbalekaso kondja waaso wa sala ndjihelo l’asawo aso. Naka wɛ ndjalɔngɔsɔla dimɛna ndo ndjasha la ngandji tshɛ le anto, kete wɛ ayokondja etombelo efula w’amɛna. Wɛ koka kondja wahɔ oma l’alako woshami lo ndjɛkɛ y’oma la ntondo, oyadi kânga wɛ l’onto ɔtɔi mbasawola.

Sawo koka monga mondo efula naka onto ekɔ la wesanu. Lâsɔ wɛ koka sawola l’onto paka minitɛ ɔtɔi keto. Naka kokaka, wɛ koka mbuta tsho wate: “Lambɛna dia wɛ ekɔ la lotumu. Koko dimi nangaka kotshika la kanyi mɔtshi yasha ekeketshelo. Bible mɛnyaka di’Otungi aso ekɔ la sangwelo dia diambo efula dia mbetɛ nkɛtɛ kɛnɛ dihole diakoka anto nsɛna pondjo pondjo l’ɔngɛnɔngɛnɔ. Sho koka monga lo Paradiso kɛsɔ, koko sho la dia mbeka kɛnɛ kalɔmba Nzambi.” Kana wɛ koka tsho mbɔlɔmba dia wɛ kawola ndjowenda wonya okina wakoka.

Naka nyambotokemɛ sawo nɛ dia ɔtɛkɛtshi ayɛ ekɔ prɛse, kana bu la loshilambo, kete eya dia wɛ akakoke nyomosala akambo efula. Ohɔ dako diele lo Mateu 10:​12, 13 ndo lo Romo 12:​17, 18. Okadimwelo ayɛ wa la memakana koka tshikitanya kanyi yande lo woho wɔsande Ɛmɛnyi wa Jehowa. Ɔsɔ ekɔ etombelo w’ɔlɔlɔ wakokayɛ kondja.

Lo wedi okina, koka monga ko wɛ mala sawola l’ɔtɛkɛtshi ayɛ dimɛna efula. Bonde kahayakawola lo dui dimɔtshi di’ohomba dialangayɛ nde kimɛ? Keketshande dia sala dui dimɔtshi diendana la dikambo sɔ.

Naka wɛ ambɛna dia nyu koka ndjosawola nto etena kekina, kete lembetshiyande bonde kahombande kokongɛ l’ɔlɔlɔ tshɛ. Tshikande la wombola ɔmɔtshi, ɛnyɛlɔ wombola ɔmɔtshi wombwami lo dibuku Comment raisonner à partir des Écritures kana lo dibuku dimɔtshi diekaso l’anto Bible. Tohɛke oyango ayɛ, oko wakadite Yeso ndo wakawafundama lo Mateu 28:19, 20.

Onde wekelo wa Bible mbalangayɛ komiya? Naka wɛ vusola lokanyi loleki ohomba, kete wɛ ayokimanyiya ombeki dia nde mbohɔ awui wekinyu. Naka wɛ kamba la wembola w’ovuswelo, kete wɛ ayokimanyiya ombeki dia kimɛ awui w’ohomba, djekoleko naka wɛ hasadi ovuswelo ɔsɔ lowango lowango. Naka wɛ kamba la wombola wendana la woho wakoka ombeki kondja wahɔ oma l’awui wekinde kana woho wakokande mbewoya anto akina awui akɔ, kete dikambo sɔ diayôwotshutshuya dia nde kanyiya nganɛ wakokande kamba l’awui akɔ.​—Tuk. 4:7.

Ohɔ dia ndjihelo kayɛ kekɔ la shɛngiya l’etombelo wayoyokondja oma lo sawo diayɛ di’otondo.