Tshapita ya Hende
Tombola Jehowa Nzambi Ɔtɔi ka Mɛtɛ
1. Ele Nzambi ɔtɔi ka mɛtɛ?
BIBLE mbutaka dia kânga mbele tozambizambi tekɔ efula, ‘le so tekɔ mɛtɛ paka la Nzambi ɔtɔi, Shɛso.’ (1 Koreto 8:5, 6) ‘Nzambi ɔtɔi’ kɛsɔ ka mɛtɛ ele Jehowa Otungi wa diangɔ tshɛ. (Euhwelu k’Elembe 6:4; Enyelo 4:11) Yeso akawete ate ‘Nzambi kami ndo Nzambi kanyu,’ oko wakadisuya Mɔsɛ l’edjedja ate: “[Jehowa] keli [Nzambi], nduku ukina ladiku dia ndi.” (Joani 20:17; Euhwelu k’Elembe 4:35) Jehowa ndeka oseka ɛngɔ kana onto tshɛ latɛmɔma, ɛnyɛlɔ oko dikishi, anto wɔsawɔ oko tozambizambi, kana otunyi ande, Satana Diabolo lele ‘jambizambi ya dikongɛ nɛ di’akambo.’ (2 Koreto 4:3, 4) Otshikitanyi la tozambizambi tɔsɔ tshɛ, Jehowa ekɔ ‘Nzambi ɔtɔi ka mɛtɛ’ oko wakawelɛ Yeso.—Joani 17:3.
2. Lam’atateke awui wendana la Nzambi, shɛngiya yakɔna yahomba monga la dui sɔ lo nsɛnɔ yaso?
2 Apami ndo wamato wele la lowando oma lo woho wambowoyoshola waonga waki Nzambi wasalanganya otema ndo kɛnɛ kakandatosalɛ ndo kayondotosalɛ nto kotwamaka oya le nde. Etena katahame ngandji kokawɔ Jehowa, vɔ tshutshuyamaka dia mbotombola. Woho akɔna na? Yoho mɔtshi ele lo mbewoya anto akina akambo wendana la nde. Romo 10:10 mbutaka ɔnɛ: ‘Oma l’onyɔ mbatotondjaka onto etelo ka lo sɛkɛ dikambo dia panda.’ Yoho kina ele lo mbôkoya l’ɛtɛkɛta ndo l’etsha aso. Efeso 5:1 mbutaka ɔnɛ: “Okone nyukuya Nzambi uku an’andi wa ngandji.” Dia sho sala dikambo sɔ dimɛna, ekɔ ohomba sho mbeya ele mɛtɛ Jehowa.
3. Naa waonga waki Nzambi woleki weke?
3 Bible ndola l’ɛtɛkɛta wakɛnɛmɔla waonga waki Nzambi wa diambo. Waonga ande anɛi woleki weke ko: lomba, losembwe, nkudu ndo ngandji. ‘Lênde mbele lomba.’ (Jobo 12:13) ‘Mboka yande tshɛ yele losembwe.’ (Euhwelu k’Elembe 32:4) Nde ekɔ la “khudu k’utamanya.” (Isaya 40:26, sho mbɛnganyisha alɛta ango.) ‘Nzambi ele ngandji.’ (1 Joani 4:8) Ko l’atei wa waonga anɛi waki Nzambi woleki weke asɔ, diakɔna dioleki akina woke, mbut’ate nɛ dialeka mɛnya woho w’onto wele Nzambi oleki waonga akina tshɛ na?
‘Nzambi Ele Ngandji’
4. Naa dionga diaki Nzambi diakotshutshuya dia tonga andja ɔnɛ la diangɔ tshɛ diasɛna?
4 Tende kɛnɛ kakatshutshuya Jehowa dia nde tonga andja ɔnɛ ndo ditongami dia lo nyuma diele la lomba ndo anto. Onde lomba kana nkudu kande mbakotshutshuya? Kema, nɛ dia kânga mbakakambe Nzambi la waonga asɔ, aha vɔ mbakotshutshuya dia sala dikambo sɔ. Ndo aha losembwe lande mbakotshutshuya dia nde kahana l’anto akina woshasha wa lɔsɛnɔ. Koko, ngandji k’efula kaki Nzambi mbakotshutshuya dia tonga ditongami dikina diele la yimba l’efanelo kande. Ngandji mbakotshutshuya dia monga la sangwelo dia mbisha akanga w’okitanyiya lɔsɛnɔ la pondjo lo Paradiso. (Etatelu 1:28; 2:15) Ngandji mbakotshutshuya dia minya onongo waki lâdiko di’ahɛka w’anto l’ɔtɛ wa pɛkato kaki Adama.
5. Lo ndjela Bible, Jehowa ekɔ tshondotondo ya dionga diakɔna, ndo lande na?
5 Ɔnkɔnɛ, l’atei wa waonga waki Nzambi tshɛ, nɛ dioleki woke ko ngandji. Ngandji mbele eongelo kana lonto lande. Kânga mbele lomba, losembwe ndo nkudu kande ekɔ waonga w’ohomba efula, ndoko dihole diata Bible ɔnɛ Jehowa ekɔ la eongelo ka dionga dimɔtshi dia l’atei wa waonga asato asɔ. Koko tɔ mbutaka ɔnɛ nde ekɔ ngandji. Eelo, Jehowa ekɔ tshondotondo ya ngandji. Ɔsɔ ekɔ ngandji kɛnyama lo ndjela atɔndɔ koko aha l’ekombakomba. Ngandji kaki Nzambi nɔmbɔmaka l’atɔndɔ w’akambo wa mɛtɛ ndo wa losembwe. Tɔ kekɔ yoho ya ngandji yoleki tshɛ, oko washa Jehowa Nzambi ndamɛ ɛnyɛlɔ. Woho wa ngandji ɔsɔ tshutshuyaka onto dia ndjasha le akina efula ndo mɛnyamaka nshi tshɛ oma l’etsha wɛnama hwe.
6. Kakɔna katokimanyiya dia mbokoya Nzambi, kânga mbahatɛdimi la nde?
6 Dionga dia diambo dielɛwɔ ngandji sɔ mbatotshutshuya dia mbokoya Nzambi. Oko weso anto k’anto, wele kema kokele ndo atshi w’akambo wa kɔlɔ, sho mbeyaka fɔnya dia hatokokaki pondjo mbokoya Nzambi. Koko ɛnyɛlɔ kekina kɛnya ngandji k’efula kaki Jehowa tɔ kɛnɛ: Nde mbeyaka elelo aso ndo hatɔlɔmbɛ dia sho monga kokele. Nde mbeyaka dia aha ɛlɔ la loyi mbayotokoma kokele. (Osambu 51:5) Diɔ diakɔ diata Osambu 130:3, 4 ɔnɛ: “[Jehowa], utunduyala we ali efula ka kolo, we Khumadiondjo, akona ututshikala? Keli edimanyelu keko le ye.” Eelo, Jehowa ekɔ “[Nzambi ka] ketshi ndu ngandji ka mamba, lahuki kele esadi, luludi too la ngandji ka shikaa la kolamelu.” (Etumbelu 34:6) “Ne dia we [Jehowa] keli ololo, katetawoka nyimanyia antu kolo.” (Osambu 86:5) Ɔsɔ ekɔ dikambo diasha ekeketshelo mɛtɛ! Ekɔ mɛtɛ ɔngɛnɔngɛnɔ efula kambɛ Nzambi ka diambo kɛsɔ ndo mbokama ngandji la kɛtshi oma le nde!
7. Ngande wɛnama ngandji ka Jehowa oma l’elimu ande w’etongelo?
7 Ngandji ka Jehowa koka mɛnama nto oma lo diangɔ diakandatonge. Ohokanyiya efula ka diangɔ di’ɔlɔlɔ diakatosha Jehowa dia sho ngɛnangɛnaka ladiɔ, ɛnyɛlɔ oko akona w’elangala, ekonda, ndo ɛkɛdi la ndjale ya weke. Nde akatosha weho wa mbo ya ndɛ yotshikitanyi lo yoho ya diambo dia ngɛnyangɛnya nemi yaso ndo dia keketsha alemba aso. Ndo nto, Jehowa akatotongɛ weho w’alɛmbɔlɛmbɔ efula w’elangala ndo wele la nsolo y’amɛna ndo nyama yele ndjâka nd’ɔlɔ menda. Nde akatonge diangɔ diakoka ngɛnyangɛnya anto kânga mbele ndoko lakôfundɛ dia sala dikambo sɔ. Lo mɛtɛ, oko wasɛnaso l’andja ɔnɛ l’etena kɛnɛ keso tatakome kokele, hatokoke ngɛnangɛna la diangɔ tshɛ diakandatonge. (Romo 8:22) Ko ohokanyiya yema kɛnɛ kayotosalɛ Jehowa lo Paradiso! Omembi w’esambo toshikikɛka ɔnɛ: “[Nde] atukhukulaka lunya la[nd]e, atulutshaka engo tshe keli la lumu.”—Osambu 145:16.
8. Naa ɛnyɛlɔ koleki woke ka ngandji kele la Jehowa oya le so?
8 Naa ɛnyɛlɔ koleki woke kendana la ngandji kaki Jehowa otsha le anto? Bible nembetshiyaka ɔnɛ: “[Nzambi] akalangi wa la kete utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” (Joani 3:16) Onde Jehowa akasale dikambo sɔ nɛ di’anto wekɔ ɔlɔlɔ? Romo 5:8 kadimolaka ɔnɛ: “Keli [Nzambi] akatenya ngandji kandi ne dia Kristu akatuvwela lam’akisu antu wa kolo.” Eelo, Nzambi akatome Ɔnande la kokele lanɛ la nkɛtɛ dia ndjokimɔ lɔsɛnɔ lande oko olambo wa tshungo dia totshungola oma lo pɛkato la nyɔi. (Mateu 20:28) Dikambo sɔ mbishaka anto woka Nzambi ngandji diaaso dia vɔ kondja lɔsɛnɔ la pondjo. Diɛsɛ ko Nzambi mbokaka anto tshɛ walanga sala lolango lande ngandji, nɛ dia Bible totɛka ɔnɛ: “[Nzambi] kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.”—Etsha 10:34, 35.
9. Woho wakakimɔ Jehowa Ɔnande oko tshungo dikambo diaso pombaka monga la shɛngiya yakɔna le so?
9 Woho wele Jehowa akakimɔ Ɔnande oko tshungo dikambo diaso ndo todihwɛ mboka k’otsha lo lɔsɛnɔ la pondjo pombaka monga la shɛngiya yakɔna lo woho wakambaso la nsɛnɔ yaso ɛlɔ kɛnɛ? Dui sɔ pombaka fudia ngandji kele laso otsha le Jehowa, Nzambi ka mɛtɛ. L’etena kakɔ kamɛ, diɔ pombaka totshutshuya dia pokamɛ Yeso, ɔnɛ lele onyipala waki Nzambi. “[Yeso] akavwela [anto] tshe, ne dia waku weli la lumu, tawuyalaki la lumu dia dikambu diawo vame, keli dia one lakâvwela, lakulwama dikambu diawo.” (2 Koreto 5:15) Ndjela wanya waki Yeso ekɔ mɛtɛ dui di’ɔngɛnɔngɛnɔ, nɛ dia nde akasha ɛnyɛlɔ ka dimɛna efula lo mbokoya ngandji ndo kɛtshi kaki Jehowa! Dikambo sɔ mɛnamaka oma lo kɛnɛ kakatɛ Yeso akanga wa memakana ɔnɛ: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya. Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema, ku nyu nyayutana mumuya l’etema anyu, ne dia lokoho lami leko ololo, la ushiko ami weko usadi.”—Mateu 11:28-30.
Toke Anto Akina Ngandji
10. Naa toho tɔmɔtshi takokaso mɛnya ngandji otsha le asekaso Akristo?
10 Ngande wakokaso mɛnya dia tekɔ la woho wa ngandji watoka Jehowa nde la Yeso otsha le asekaso ambetawudi na? Tende toho totshikitanyi takokaso sala dikambo sɔ: “Ngandji keli kanga memakana la ketshi. Ngandji kaha la kandjema, hayaseme, hayambiya, hatshi akambu wa fumbosonyi, hayangi paka lulangu landi, hadia akambu wa kolo. [Tɔ] hangenangena lu yenyi, keli atongenangenaka lu mete. Ngandji atukhukhumeka akambu tshe, atukitshiyaka akambu tshe, atulungamelaka akambu tshe, atukikeka akambu tshe. Ngandji haheko pundju.”—1 Koreto 13:4-8; 1 Joani 3:14-18; 4:7-12.
11. Naa anto akina wahombaso mboka ngandji, ndo woho akɔna?
11 Otsha le waa na wahombaso mɛnya ngandji kakɔ nto ndo woho akɔna na? Yeso akate ate: “Okone nyutshu, nyete wedja tshe ambeki, nyâbatiza lu lukumbu la Papa ndu l’Ona ndu la nyuma k’[ekila]. Nyuwaetshaki dia ntsha akambu tshe wamumunyutela.” (Mateu 28:19, 20) Dikambo sɔ nɔmbaka dia mbewoya anto lokumu l’ɔlɔlɔ lendana l’andja w’oyoyo wa paradiso wayaye le anto wahatakome Akristo oko sho. Yeso akɛnya hwe di’aha paka wanɛ wele laso mbetawɔ ɔtɔi ato mbahombaso mboka ngandji, nɛ dia nde akate ate: “Naka nyu nyatulangaka [paka] wane watunyulangaka, nyayuyala la difutu diakona? Ndu elungudi w’elambu hawututshaka osoku uka? Naka nyu nyatemulaka anyanyu atu, dikambu diakona diatunyutshaka diulekinyu antu akina? Ndu asi wedja hawututshaka osoku uka?”—Mateu 5:46, 47; 24:14; Ngalatiya 6:10.
‘Kɛndakɛnda lo Lokombo la Jehowa’
12. Lande na kele lokombo la Nzambi sunganaka paka la nde ndamɛ oto?
12 Yoho kina y’ohomba efula ya tombola Nzambi ka mɛtɛ ele mbêya, kamba ndo mbetsha anto akina lokombo lande hita, mbut’ate Jehowa. Omembi w’esambo akakɛnɛmɔla kɛnɛ kakandakombolaka oma k’ɛse otema lo mbuta ate: “Kaweyi vati: We latuwetaka vati; [Jehowa], weme keli Khum’Ulungu, umbuledi wa kete tshe.” (Osambu 83:18) Lokombo Jehowa nembetshiyaka “Ɔnɛ Lasala dia Ndjala.” Nde ekɔ Nzambi ka Woke kele l’asangwelo, ndo katokotshaka nshi tshɛ asangwelo akɔ. Ndo paka Nzambi ɔtɔi ka mɛtɛ oto mbakoka monga la lokombo lɔsɔ nɛ di’anto hawokoke pondjo monga l’eshikikelo dia wayotondoya lo welo wadjawɔ. (Jakoba 4:13, 14) Paka Jehowa ndamɛ oto mbakoka mbuta di’ɔtɛkɛta ande ‘wayokotsha’ dikambo diakandatɛkɛta. (Isaya 55:11) Anto efula ngɛnangɛnaka heyama etena kɛnawɔ lokombo laki Nzambi mbala ka ntondo lo Bible yawɔ ndo kekawɔ kitshimudi ya lokombo lɔsɔ. (Etumbelu 6:3) Koko dia vɔ kondja wahɔ oma l’ewo kɛsɔ paka vɔ ‘kɛndakɛnda lo lokombo la Jehowa pondjo pondjo.’—Mika 4:5.
13. Kakɔna kalembetshiya mbeya lokombo la Jehowa ndo kɛndakɛnda lo lokombo lakɔ?
13 Lo kɛnɛ kendana la lokombo la Nzambi, Osambu 9:10 mbutaka ɔnɛ: “Wane wateyaka lukumbu laye, watukekamaka.” Dui sɔ nɔmbaka akambo akina efula koko aha tsho mbeya lokombo Jehowa ko pe nɛ dia mbeya tsho lokombo lande hɛnya dia wɛ ndjaɛkɛka le nde. Mbeya lokombo la Nzambi kɛdikɛdi shihodia dimɛna woho wa Nzambi wele Jehowa ndo monga la lowando lo dikambo sɔ, nɛmiya lowandji lande, kitanyiya ɛlɛmbɛ ande ndo ndjaɛkɛ le nde l’akambo tshɛ. (Tukedi 3:5, 6) Woho akɔ wamɛ mbele, kɛndakɛnda lo lokombo la Jehowa kɛdikɛdi ndjakimɔ le nde ndo ndjaɛnya la ntondo k’anto oko ɔtɛmɔdi ande ndo kamba la lɔsɛnɔ laso lo yoho yɔtɔnɛ la lolango laki Nzambi. (Luka 10:27) Onde wɛ ekɔ lo sala dikambo sɔ?
14. Naka sho nangaka kambɛ Jehowa pondjo pondjo, kakɔna kahombaso sala aha l’onto totshutshuya?
14 Naka Jehowa mbalangaso kambɛ pondjo pondjo, kete tosale dui sɔ aha oko wanɛ watshutshuyawɔ la wolo. Ɔpɔstɔlɔ Paulo akasha Timɔtɛ lakashile la tatɛ kambɛ Jehowa dako nɛ ate: ‘Yadjɛ oyango wa ndjaetsha dia mamema Nzambi.’ (1 Timote 4:7) Omamemelo ndja oma l’otema woludi la lowando wele laso otsha le onto lamamemaso. ‘Mamema Nzambi’ nembetshiyaka mbotombola ndo monga la wɔma wɔsɔhanyi la dilɛmiyɛlɔ otsha le nde. Dikambo sɔ mɛnyaka woho wômamemaso la ngandji tshɛ nɛ dia sho mbɔsaka otondo ande kamɛ ndo mboka yande la nɛmɔ di’efula. Mamema Nzambi totshutshuyaka dia nyanga woho w’onto tshɛ mbɔsa lokombo lande la nɛmɔ efula. Naka sho nangaka kɛndakɛnda pondjo pondjo lo lokombo la Jehowa, Nzambi ɔtɔi ka mɛtɛ, kete sho pombaka mbomamema lo nsɛnɔ yaso.—Osambu 37:4; 2 Petero 3:11.
15. Ngande wakokaso mamema Nzambi paka ndamɛ oto?
15 Dia kambɛ Nzambi lo yoho yetawɔnde, sho pombaka mbɔtɛmɔla paka nde ndamɛ, nɛ dia nde ekɔ ‘Nzambi kahika dia sho mbomamema paka ndamɛ oto.’ (Etumbelu 20:5) Sho hatokoke l’etena kakɔ kamɛ mboka Nzambi ngandji ko nanga andja ɔnɛ wa kɔlɔ, wele Satana mbele jambizambi yawɔ. (Jakoba 4:4; 1 Joani 2:15-17) Jehowa mbeyaka shikaa woho w’onto wayatshutshuya ɔmɔmɔ la l’atei aso dia ndjâla. (Jeremiya 17:10) Naka mɛtɛ sho nangaka akambo wa losembwe, kete nde mɛtɛ mɛnaka dikambo sɔ ndo ayotokimanyiya dia mbikikɛ ehemba aso wa lushi la lushi. Nde ayotokimanyiya la nyuma kande k’ekila ndo ayotosha akoka wa sho mbidja akambo wa kɔlɔ wambokokanɛ l’andja ɔnɛ otshumba. (2 Koreto 4:7) Nde ayotokimanyiya nto dia kokutɛ elongamelo kaso ka lɔsɛnɔ la pondjo lo paradiso ka lanɛ la nkɛtɛ. Ɔsɔ ekɔ mɛtɛ elongamelo ka diambo efula! Sho pombaka ngɛnangɛna dikambo sɔ efula ndo kombola dia kambɛ Jehowa, Nzambi ka mɛtɛ kayosha anto lɔsɛnɔ la pondjo.
16. Kakɔna kahombayɛ kombola sala, kamɛ la miliyɔ kina y’anto?
16 Miliyɔ y’anto wa l’andja w’otondo wekɔ lo mbetawɔ leeta lɔnɛ laki omembi w’esambo l’ɔngɛnɔngɛnɔ tshɛ, lɔ mbutaka ɔnɛ: “[“Nyotombole Jehowa,” NW] kame la mi, shu tshe tediaki lukumbu landi kame.” (Osambu 34:3) Jehowa kɔlɔmbaka dia wɛ ndjâla l’atei wa lemba l’anto l’oma lo wedja tshɛ latatetemala fula dia sala dikambo sɔ.
Ovuswelo
• Woho akɔna w’onto wele Jehowa? Woho akɔna wakondjaso wahɔ lo shihodia waonga ande dimɛna?
• Ngande wakokaso kimanyiya anto akina dia mbeka akambo wa mɛtɛ wendana la Nzambi?
• Kakɔna kalembetshiya mbeya lokombo la Jehowa ndo kɛndakɛnda lo lokombo lande?
[Esato wa lo lɛkɛ 14]
Oma lo ngandji kande ka woke, Jehowa ‘ayokukola lonya lande ko kotsha nsaki k’ɛngɔ tshɛ kasɛna’