Tshapita ya Dikumi La Divwa
Tetemala Sambisha Ɔtɛkɛta wa Nzambi la Dihonga
1. (a) Naa lokumu l’ɔlɔlɔ lakewoyaka ambeki waki Yeso, ko ngande wakasale ase Juda amɔtshi? (b) Wembola akɔna wakokaso ndjambola?
AMBETA suke l’ɛnɔnyi 2 000 wele Yeso Kristo, Ɔna Nzambi akakitama esɔ oko Nkumekanga kayolɛ nkɛtɛ k’otondo. Yeso akadiakema oma lo shɛngiya y’atunyi ande w’ase ɛtɛmwɛlɔ, koko Jehowa akawolola oma lo nyɔi. Oma lo tshimbo ya Yeso, anto wambokoka kakianɛ kondja lɔsɛnɔ la pondjo. Koko, lam’akasambisha ambeki wa Yeso lokumu l’ɔlɔlɔ lo sɛkɛ, vɔ wakasoyama. Amɔtshi l’atei awɔ wakadjama lo nkanu, wakakɔmama emambo ndo wakâsekɛ di’aha tɛkɛta lo dikambo dia Yeso. (Etsha 4:1-3, 17; 5:17, 18, 40) Kakɔna kakawahombe sala na? Otoyosala na? Onde wɛ ototetemala sambisha la dihonga?
2. (a) Naa lokumu la diambo lahomba mbewoyama lo nshi yaso nyɛ? (b) Waa na wele l’ɔkɛndɛ wa sambisha lokumu l’ɔlɔlɔ?
2 L’ɔnɔnyi 1914 T.D., Yeso Kristo, Nkumekanga ka Diolelo akahenyama l’okudi l’olongo dia mbolɛ ‘l’atei w’atunyi ande.’ (Osambu 110:2) Oma lâsɔ, Satana nde l’ɛdiɛngɛ ande wakakadjema lanɛ la nkɛtɛ. (Enyelo 12:1-5, 7-12) Nshi y’ekomelo ya dikongɛ nɛ dia kɔlɔ yakatatɛ. Lam’ayokomɛ etena kɛsɔ, Nzambi ayolanya dikongɛ nɛ di’akambo di’otondo diaki Satana. (Danyele 2:44; Mateu 24:21) Wanɛ wayohandɔ wayonga l’elongamelo ka nsɛna pondjo pondjo lo nkɛtɛ kayokadimɔ paradiso. Naka wɛ amboshilaka mbetawɔ lokumu l’ɔlɔlɔ lɔsɔ, kete wɛ ayohomba liewoya anto akina. (Mateu 24:14) Ko akambo akɔna wakokayɛ nongamɛ?
3. (a) Ngande wasala anto lam’okawɔ losango la Diolelo? (b) Dimbola diakɔna diahombaso ndjambola?
3 Lam’asambishayɛ lokumu l’ɔlɔlɔ la Diolelo, anto amɔtshi koka lietawɔ, koko efula wayonga la wendjudi. (Mateu 24:37-39) Amɔtshi koka kɔ̂nyɔla kana kɔlɔsha. Yeso akate ɔnɛ ɔlɔshamelo kokaka ndja oma le ewotɔ ayɛ hita. (Luka 21:16-19) Vɔ mbeyaka ndja nto oma le anyayɛ wa l’olimu kana wa la kalasa. L’ahole amɔtshi, lɛɛta ambosekɛka olimu w’Ɛmɛnyi wa Jehowa. Lam’ayoyohomana l’awui wa ngasɔ, onde wɛ ayotetemala sambisha Ɔtɛkɛta wa Nzambi la dihonga ndo ‘tshikala nge lo mbetawɔ’?
Toyaɛkɛke lo Wolo Ayɛ Hita
4. (a) Dia mɛnya ɔnɛ tekɔ ekambi wa kɔlamelo waki Nzambi, naa dikambo di’ohomba diatɔlɔmbawɔ? (b) Lande na kele nsanganya y’Akristo ohomba efula?
4 Dia ndjala okambi wa kɔlamelo waki Jehowa, wɛ la dia ndjaɛkɛ lo tɛdikɔ tɔsande dikambo di’ɔlɔlɔ aso wa lo nyuma. Yɛdikɔ mɔtshi l’atei wa tɛdikɔ tɔsɔ ele nsanganya ya l’etshumanelo. Afundelo tokeketshaka di’aha sho minya nsanganya yakɔ yimba. (Heberu 10:23-25) Wanɛ watetemala ndjala Ɛmɛnyi wa kɔlamelo waki Jehowa salaka la wolo dia mbɔtɔka nshi tshɛ lo nsanganya kâmɛ l’atɛmɔdi wa anyawɔ. Lo nsanganya shɔ mbafudiaso ewo kaso k’Afundelo. Ndo nto, eokelo kaso k’akambo wa mɛtɛ wokoteyaka dimɛna pamaka ndo sho ndekaka shihodia toho ta kamba l’akambo akɔ. Yɔ ndeka tosukanya suke suke l’anangɛso w’Akristo wele l’ɔtɛmwɛlɔ aso ndo tokeketshaka dia sala lolango laki Nzambi. Nyuma kaki Jehowa nɔmbɔlaka etshumanelo, ndo oma l’ekimanyielo ka nyuma kakɔ mbele Yeso ekɔ l’atei aso.—Enyelo 3:6; Mateu 18:20.
5. Lam’asekɛwɔ Ɛmɛnyi wa Jehowa, kakɔna kasalema lo kɛnɛ kendana la nsanganya?
5 Onde wɛ mbɔtɔka mbala la mbala lo nsanganya tshɛ ndo kambaka la kɛnɛ kokayɛ lo nsanganya yakɔ? Mbala mɔtshi, etena kasekɛma olimu w’Ɛmɛnyi wa Jehowa, tôngaka ohomba sala nsanganya lo tolui ta totshitshɛ lo mvudu y’anto amɔtshi. Lâsɔ, ahole la wenya wa nsanganya kokaka tshikitanyema ndo ondo dui sɔ hatongaka nshi tshɛ dimɛna le so nɛ dia nsanganya mɔtshi salemaka la kati k’otsho. Koko, kânga mbakokayɔ mbaela disanya kana mbadja lo wâle, anangɛso l’akadiyɛso wa kɔlamelo salaka la wolo awɔ tshɛ dia tanema l’oseka losanganya tshɛ.
6. Ngande wɛnyaso dia sho ndjaɛkɛka le Jehowa, ndo ngande wakoka dikambo sɔ tokimanyiya dia tetemala sambisha la dihonga?
6 Tayonga nto l’akoka wa ndjaɛkɛ le Jehowa lo mbɔlɔmbaka mbala la mbala l’otema ɔtɔi, teya dia tekɔ l’ohomba w’ekimanyielo kande. Onde wɛ salaka dikambo sɔ? Yeso akalɔmbaka mbala la mbala l’etena kakandakambaka olimu ande wa lanɛ la nkɛtɛ. (Luka 3:21; 6:12, 13; 22:39-44) Ndo l’otsho wa la ntondo ka nde panema l’otamba, nde akakeketsha ambeki ande ate: “Nyosenaki, nyolombaki, nyutukoko l’ehimba.” (Mako 14:38) Naka tambohomana l’anto wahadje yimba lo losango la Diolelo, kete dui sɔ kokaka ndjotokonya lo mpekɔ olimu aso w’esambishelo. Naka anto wotɔnyɔla kana wotɔhɛnyahɛnya, kete sho koka ndjohembama dia tshika sambisha l’oyango wa mbewɔ ekakatanu ɛsɔ. Koko, naka sho nɔmba l’otema ɔtɔi dia kondja nyuma ka Nzambi dia tɔ tokimanyiya dia tetemala sambisha la dihonga, kete hatototshika olimu aso l’ɔtɛ w’ehemba ɛsɔ.—Luka 11:13; Efeso 6:18-20.
Ɔkɔndɔ w’Esambishelo ka la Dihonga
7. (a) Lande na kele ɔkɔndɔ wa l’Etsha wekɔ la wahɔ wa lânde le so? (b) Kadimola wembola wele l’ekomelo k’odingɔ ɔnɛ ndo leka menda woho wakokaso kondja wahɔ oma l’awui akɔ.
7 Ɔkɔndɔ wa lo dibuku di’Etsha wekɔ la wahɔ wa lânde le so sho tshɛ. Vɔ kɔndɔlaka woho wakatondoya apɔstɔlɔ l’ambeki akina wa lo ntambe ka ntondo wekamu ndo woho wakawɛnya dia waki ɛmɛnyi wa Jehowa wele la dihonga ndo la kɔlamelo kânga mbakiwɔ anto waki la nsaki yele oko sho. Tɔsɛdingole etenyi kɛmɔtshi k’ɔkɔndɔ ɔsɔ l’ekimanyielo ka wembola wayela ɛnɛ ndo k’avɛsa woshilami. Etena kasalaso dikambo sɔ, enda nganɛ wakokayɛ wɛmɛ kondja wahɔ oma lo kɛnɛ kadiayɛ.
Onde apɔstɔlɔ waki ambewi wa mukanda wa tomanamana? Dihonga diaki lawɔ dia ntokomɛ oseka dikambo tshɛ, onde vɔ wakotɔ ladiɔ lotɔ? (Etsha 4:13; Joani 18:17, 25-27; 20:19)
Kakɔna kakakimanyiya Petero dia nde tɛkɛta la dihonga la ntondo ka tuminadi t’ase Juda takânya Ɔna Nzambi hita na? (Mateu 10:19, 20; Etsha 4:8)
Kakɔna kakasalaka apɔstɔlɔ lo mingu yakete la ntondo ka vɔ tɔlama la ntondo k’ase Sheke na? (Etsha 1:14; 2:1, 42)
Etena kakadjangɛ ewandji apɔstɔlɔ di’aha vɔ tetemala la sambisha lo lokombo la Yeso, ngande wakakadimola Petero nde la Joani na? (Etsha 4:19, 20)
L’ɔkɔngɔ w’otshungwelo awɔ, le onto akɔna akalɔmbɛ apɔstɔlɔ ekimanyielo nto na? Onde vɔ wakɔlɔmbɛ di’ɛhɛnyɔhɛnyɔ awɔ komɛ, kana wakalɔmbɛ dikambo dikina? (Etsha 4:24-31)
Lo tshimbo yakɔna yakâkimanyiya Jehowa lam’akahembe atunyi komiya olimu w’esambishelo na? (Etsha 5:17-20)
Ngande wakɛnya apɔstɔlɔ dia vɔ wakashihodia ɔkɔkɔ wakawatshungɔ oma lo lokanu na? (Etsha 5:21, 41, 42)
Kânga lam’akadiangana ambeki efula l’ɔtɛ w’ɔhɛnyɔhɛnyɔ, kakɔna kakawatetemala la sala? (Etsha 8:3, 4; 11:19-21)
8. Naa etombelo w’ɔngɛnɔngɛnɔ efula wakonge l’olimu wakakambe ambeki wa ntondo, ndo ngande wambotoyokoma lo mbisha lonya l’olimu ɔsɔ?
8 Olimu wa sambisha lokumu l’ɔlɔlɔ komonga olimu w’anyanya. Yɛdikɔ y’ambeki oko 3 000 wakabatizama lo Pɛntɛkɔsta ka l’ɔnɔnyi 33 T.D. “Embetawudi, elui w’apami la w’amantu, wakatafulanelaka le Khumadiondjo.” (Etsha 2:41; 4:4; 5:14) L’ɔkɔngɔ diko, ndo osoyanyi wa mamba w’ekambi waki Nzambi, mbut’ate Saulo ka la Taraso akayokomaka Okristo ndo akatatɛ sambisha akambo wa mɛtɛ la dihonga tshɛ. Nde akayeyamaka l’ɔkɔngɔ lo lokombo l’ɔpɔstɔlɔ Paulo. (Ngalatiya 1:22-24) Olimu wakatatɛ lo ntambe ka ntondo komemala. Vɔ wamboleka pama lo nshi y’ekomelo nyɛ ndo wambokoma polo ndo lo tokoma ta nkɛtɛ. Sho tekɔ la diɛsɛ dia mbisha lonya l’olimu ɔsɔ, ndo lam’asalaso dikambo sɔ, sho kokaka kondja wetshelo oma l’ɛnyɛlɔ kakatotshikɛ ɛmɛnyi wa kɔlamelo wakakambaka olimu ɔsɔ la ntondo kaso.
9. (a) Waaso akɔna wakakambe la Paulo dia sambisha? (b) Lo toho takɔna tadianganyayɛ losango la Diolelo le anto akina?
9 Kakɔna kakasale Paulo etena kakandeke akambo wa mɛtɛ wendana la Yeso Kristo? “Kem’edja ndi akasambisha dikambu dia Jesu . . . ati: On’a [Nzambi] kendi.” (Etsha 9:20) Nde aki la lowando lo ngandji ka mamba kakawɛnya Nzambi, ndo nde akɛnyi dia onto tshɛ aki l’ohomba wa lokumu l’ɔlɔlɔ lakandalongola. Paulo aki ose Juda, ndo lo ndjela mbekelo ka lo nshi shɔ, nde akatshu lo wa shinangɔnga dia tosambisha. Nde akatasambishaka nto ndo lo luudu la luudu ndo akakanaka l’anto yimba l’ahole wa lobingu. Ndo nde aketawɔka dia ntshɔ otsha lo bɛtshi dikina dia nkɛtɛ di’eyoyo dia tosambisha lokumu l’ɔlɔlɔ.—Etsha 17:17; 20:20; Romo 15:23, 24.
10. (a) Ngande wakɛnya Paulo dia nde komonga tsho la dihonga koko ndo la shɛnɔdi lo yoho yakandasambishaka? (b) Ngande wakokaso kɛnɛmɔla waonga waki Paulo etena kasambishaso ewotɔ, anyaso wa l’olimu kana wa la kalasa na?
10 Paulo aki la dihonga koko ndo la shɛnɔdi, ndo sho lawɔ la dia monga la waonga asɔ. Lam’akinde la ntondo k’ase Juda, nde akasawolaka la wɔ lo kɛnɛ kendana l’alaka wakalake Nzambi watshɛwɔ. Lam’akinde la ntondo k’ase Ngirika, nde akatɛkɛtaka la wɔ di’akambo wakaweyaka dimɛna. Mbala mɔtshi, nde akakambaka l’ɛnyɛlɔ kande hita kendana la woho wakandeke akambo wa mɛtɛ dia nde sambisha anto akina. Nde akate ate: “Dimi latutshaka akambu tshe dia lukumu l’ololo, dia dimi kundja [anto akina].”—1 Koreto 9:20-23; Etsha 22:3-21.
11. (a) Kakɔna kakasale Paulo dia mbewɔ ewanu waha pe lam’asande l’atunyi? (b) Etena kakɔna kakokaso sala la yimba tshɛ dia mbokoya ɛnyɛlɔ kaki Paulo ndo woho akɔna? (c) Oma lende aya wolo watokimanyiya dia tetemala sambisha la dihonga?
11 Lam’akɛnaka Paulo di’ɛlɔshamelo wamboleka ndo ekɔ ɔlɔlɔ ntshɔ lo tshanda mɔtshi dia tosambisha lo dihole dikina, nde akasalaka ngasɔ lo dihole dia nde tetemala nyanga atunyi ande l’ewanu. (Etsha 14:5-7; 18:5-7; Romo 12:18) Koko ndoko lushi lakandoke sɔnyi dia sambisha lokumu l’ɔlɔlɔ. (Romo 1:16) Kânga mbakɔnyɔma ndo mbakahɛnyahɛnyama Paulo oma le atunyi ande, ‘Nzambi akawosha dihonga’ dia nde tetemala la sambisha. Nde akate ate: “Keli Khumadiondjo akemala la mi, akankikitsha, dia dimi mvutela antu diui ololo.” (1 Tesalonika 2:2; 2 Timote 4:17) Yeso lele Owandji w’etshumanelo k’Akristo, ekɔ lo tetemala la tosha wolo wele laso ohomba dia sala olimu wakandalake ɔnɛ wayokambema lo nshi yaso nyɛ.—Mako 13:10.
12. Kakɔna kɛnya dihonga diele l’Akristo, ndo oma lende aya dihonga diakɔ?
12 Ndoko kɛnɛ kakoka toshimba dia sho tetemala la sambisha Ɔtɛkɛta wa Nzambi la dihonga, oko wakasale Yeso nde l’ekambi ekina wa kɔlamelo wa lo ntambe ka ntondo. Dui sɔ halembetshiya dia sho la dia salaka akambo otshatsha kana tshutshuya anto wahalange losango laso dia vɔ lietawɔ la wolo. Koko hatohombe mpekɔ l’ɔtɛ wa wendjudi kana tshika dia sambisha l’ɔtɛ w’ɔlɔshamelo. L’ɛnyɛlɔ ka Yeso, sho mɛnyaka dia Diolelo diaki Nzambi mbele lowandji lele la lotshungɔ la mbolɛ nkɛtɛ k’otondo. Sho tɛkɛtaka l’eshikikelo tshɛ, nɛ dia lo lokombo la Jehowa, Owandji w’Andja w’Otondo mbatɛkɛtaso ndo nɛ dia losango latatewoya kema laso koko lɔ ndja oma le nde. Ndo ngandji kokaso Jehowa mbahomba monga dikambo dialeka totshutshuya dia mbôtombola—Filipi 1:27, 28; 1 Tesalonika 2:13.
Ovuswelo
• Lande na ekɔ ohomba mbewoya onto tshɛ losango la Diolelo, ko kakɔna kakokaso nongamɛ na?
• Ngande wakokaso mɛnya dia hatoyaɛkɛ lo wolo aso hita dia kambɛ Jehowa?
• Wetshelo akɔna w’ohomba wakondjaso oma lo dibuku di’Etsha?
[Esato wa lo lɛkɛ 173]
Oko wakidiɔ lo nshi yakete, ekambi wa Jehowa wa nshi nyɛ sambishaka Ɔtɛkɛta wa Nzambi la dihonga