Tokoya Yeso lo sambishaka la dihonga
‘Sho taki la dihonga dia nyewoya lokumu l’ɔlɔlɔ.’—1 TES. 2:2.
1. Lande na kangɛnangɛnaso efula lokumu l’ɔlɔlɔ lendana la Diolelo?
EKƆ mɛtɛ dui di’ɔngɛnɔngɛnɔ dia mpokamɛ lokumu l’ɔlɔlɔ! Ndo lokumu loleki tshɛ ɔlɔlɔ ele lɔnɛ lendana la Diolelo diaki Nzambi. Lokumu l’ɔlɔlɔ lɔsɔ toshikikɛka dia Nzambi ayokomiya asui, hemɔ, pâ, kandji ndo nyɔi. Lɔ toshaka elongamelo ka lɔsɛnɔ la pondjo, tewoyaka sangwelo diaki Nzambi ndo woho wakokaso monga la diɔtɔnganelo dioludi la ngandji la nde. Ondo wɛ kokaka mbɔsa di’onto tshɛ ayɔngɛnangɛna mboka losango lakewoya Yeso lɔsɔ. Koko lonyangu ko, aha anto tshɛ mbangɛnangɛna lioka.
2. Lembetshiya etelo kaki Yeso k’ɔnɛ: “Dimi lakayi dia ndjatanya.”
2 Yeso akatɛ ambeki ande ɔnɛ: “Tanyukanaki nyati: Dimi lakayi dia nyela ki la kete. Dimi kundja dia nyela ki, keli lakayi dia nyela yombo. Dimi lakayi dia ndjatanya untu la shi, ona umuntu la nyangu, ndu olokayi la nyangu umendi. Wane weli lu luudu wayuyala atunyi wa kanga luudu.” (Mat. 10:34-36) Lo dihole dia vɔ mbetawɔ lokumu l’ɔlɔlɔ, anto efula litonaka. Amɔtshi ndjaetɛka atunyi wa wanɛ walisambisha oyadi kânga wekɔ ewotɔ awɔ.
3. Kakɔna keso l’ohomba dia sambisha lokumu l’ɔlɔlɔ?
3 Tekɔ lo sambisha akambo wa mɛtɛ wakasambisha Yeso ndo etena kâhokamɛwɔ, vɔ salaka woho wakasale anto efula wa lo nshi shɔ. Kɛsɔ mbalongamɛso. Yeso akatɛ ambeki ande ate: “Ukambi haleki uwandji andi. Naka vo wakansuya, wayunyusuya ndu nyu.” (Joa. 15:20) Lo wedja efula, hatɔlɔshama lo yoho ya wolo, koko sho pomanaka la wendjodi ndo anto tɔtɛngaka. Diakɔ diele sho pombaka monga la mbetawɔ ndo la dihonga dia sho tetemala sambisha lokumu l’ɔlɔlɔ la dihonga.—Adia 2 Petero 1:5-8.
4. Lande na kele Paulo aki l’ohomba wa ‘dihonga’ dia sambisha?
4 Ondo mbala mɔtshi wɛ mongaka l’okakatanu dia sambisha kana yoho mɔtshi y’esambishelo kataka asolo. Naka ɔsɔku mbediɔ, kete eya diaha wɛmɛ oto mbayaoka ngasɔ. Ɔpɔstɔlɔ Paulo aki osambisha waki la dihonga, waki kombokaka wɔma ndo lakashihodiaka dimɛna akambo wa mɛtɛ koko kânga nde aki tena dimɔtshi l’okakatanu dia sambisha. Nde akafundɛ Akristo wa la Tɛsalɔnika ɔnɛ: ‘L’ɔkɔngɔ wa sho soyama ndo w’anto tosalɛ akambo lo yoho y’esehe la Filipi (oko weyanyu), Nzambi kaso akatosha dihonga dia sho nyewoya lokumu l’ɔlɔlɔ laki Nzambi l’atei w’ɔlɔshamelo wa wolo.’ (1 Tes. 2:2) La Filipi, ewandji wa lɛɛta wakakɔmamisha Paulo nde la Silasi eshingɔ, wakawadje lo lokanu ndo wakawadje lo lowete. (Etsha 16:16-24) Kânga mbakawahomana l’akambo asɔ, Paulo nde la Silasi wakatetemala sambisha la ‘dihonga.’ Ngande wakokaso sala oko vɔ? Dia kadimola lo dimbola sɔ, nyɛsɔ tende kɛnɛ kakakimanyiya ekambi waki Nzambi wa lo nshi yakafundamaka Bible dia vɔ sambisha akambo wa mɛtɛ wendana la Jehowa la dihonga ndo woho wakokaso mbokoya ɛnyɛlɔ kawɔ.
Vɔ waki l’ohomba wa monga la dihonga dia ndɔshana la lohetsho
5. Lande na kele ekambi waki Jehowa wa kɔlamelo wokongaka l’ohomba wa dihonga?
5 Yeso Kristo mbele ɛnyɛlɔ koleki tshɛ k’onto laki la dihonga. Koko, ekambi wa kɔlamelo waki Jehowa wokongaka l’ohomba wa dihonga tatɛ l’etatelo k’ɔkɔndɔ w’anto. Lande na? L’ɔkɔngɔ w’ɔtɔmbɔkwɛlɔ wa lo Ɛdɛna, Jehowa akate dia lohetsho lakahombe monga lam’asa wanɛ wakambɛ Nzambi la wanɛ wakambɛ Satana. (Etat. 3:15) Lohetsho lɔsɔ lakɛnama esadi eto etena kakadiakema Abɛlɛ pami k’ɔlɔlɔ oma le ɔnango. L’ɔkɔngɔ diko, Ɛnɔka, pami kekina ka kɔlamelo kakasɛnɛ la ntondo ka Mvula k’elola akayohetshamaka nde lawɔ. Nde akate dia Nzambi ayoya la andjelo Ande w’ekila dia ndjolanya anto wa kɔlɔ. (Jude 14, 15) Aha la tâmu, anto kɔngɛnangɛna mboka losango lɔsɔ. Anto wakahetsha Ɛnɔka ndo mɛnamaka dia wakayange mbodiaka diakɔ diele Jehowa akawonya. Ɛnɔka aki mɛtɛ la dihonga di’efula!—Etat. 5:21-24.
6. Lande na kele Mɔsɛ aki l’ohomba wa dihonga dia tɛkɛta la Farawɔ?
6 Tokanyiya nto dihonga diakakɛnɛmɔla Mɔsɛ etena kakandatɛkɛtaka la Farawɔ, nkumekanga kakɔsamaka aha oko onyimpala wa tozambizambi koko oko jambizambi mɔtshi, mbuta ate ɔnaki Ra, jambizambi ya wonya. Ondo nde ndo Farawɔ nkina wakayatɛmɔlaka vɔamɛ. Awui wakataka Farawɔ aki tshondo y’ɛlɛmbɛ ndo nde akalɔmbɔlaka lo mbidja wadjango. Oko wakinde kanga nkudu, kanga lotamanya ndo ɔtɛ wolo, anto kombidjangɛka Farawɔ kɛnɛ kakandahombaka sala. Mɔsɛ laki olami w’ɛkɔkɔ akahombe tɛnana la pami kɛsɔ mbala la mbala aha la nde mbêlɛ ndo mbolongola dimɛna. Ndo kakɔna kakawotɛka Mɔsɛ? Mɔsɛ akawewoya dia mpokoso ya wolo efula yakahombe ndja. Ndo kakɔna kakalɔmbɛ Mɔsɛ? Lotshungɔ la miliyɔ y’ɛhɔmbɔ waki Farawɔ mimɔ oma l’Edjibito! Onde Mɔsɛ aki l’ohomba wa dihonga? Eelo!—Wal. 12:3; Heb. 11:27.
7, 8. a) Ekakatanu akɔna wakahomana l’ekambi waki Nzambi wa kɔlamelo wa lo nshi y’edjedja? b) Kakɔna kakakimanyiya ekambi waki Nzambi wa lo nshi y’edjedja dia vɔ monga la dihonga dia mamɛ ndo sukɛ ɔtɛmwɛlɔ wa mɛtɛ?
7 Ntambe efula l’ɔkɔngɔ wa lâsɔ, aprɔfɛta ndo ekambi ekina wa Nzambi wakatetemala mamɛ ɔtɛmwɛlɔ wa mɛtɛ la dihonga tshɛ. Andja waki Satana kombangɛnangɛnaka. Paulo akate ate: “Vo wakukama ave, wakadiakema la tombo. Vo wakakendakenda wolotshi kuhu di’ekoko la dia mbudi; wakahumbi, wakasuyama, wakatshamela kolo.” (Heb. 11:37) Kakɔna kakakimanyiya ekambi waki Nzambi ɛsɔ dia vɔ tshikala nge? Lo avɛsa angana wa la ntondo ka divɛsa sɔ, ɔpɔstɔlɔ Paulo akɛnya kɛnɛ kakasha Abɛlɛ, Abarahama, Sara ndo anto akina wolo wa mbikikɛ. Nde akate ate: ‘Vɔ kɔmɛna ekotshamelo k’alaka, koko oma lo mbetawɔ vɔ wakɛnyi ekotshamelo k’alaka akɔ la ntondo ndo wakawaetawɔ.’ (Heb. 11:13) Aha la tâmu, aprɔfɛta wele oko Elidja, Jeremiya ndo ekambi ekina wa kɔlamelo w’edjedja wakâmɛ ɔtɛmwɛlɔ wa mɛtɛ la dihonga tshɛ, wakakimanyiyama dia mbikikɛ lo ndjaɛkɛ l’ekotshamelo k’alaka waki Jehowa.—Tito 1:2.
8 Ekambi wa kɔlamelo ɛsɔ wakakongɛka nshi yayaye y’amɛna. Etena kayowolɔ, vɔ wayoyonga anto wa kokele ‘wayotshungɔma oma lo lɔhɔmbɔ l’ɛhɔndɛlɔ’ lo tshimbo y’olimu w’ɔlɔmbɛdi wayokamba Kristo Yeso nde l’ɛlɔmbɛdi wahɔnyi 144000. (Romo 8:21) Ndo nto, Jeremiya ndo ekambi ekina waki Nzambi wa lo nshi y’edjedja waki la dihonga nɛ dia wakayaɛkɛ l’eshikikelo kakawasha Jehowa ka mbasukɛ oko wɛnyamidiɔ lo daka diakandasha Jeremiya di’ɔnɛ: “Vo wayukolosha, keli vo hawukolembia, ne dia dimi leko kame la ye dia nkutshungula, mbatami, dimi [Jehowa].” (Jer. 1:19) Ɛlɔ kɛnɛ, woho wakanaso yimba l’alaka waki Nzambi wendana la nshi yayaye ndo eshikikelo k’ɔnɛ nde ayotokokɛ oma lo tɔsɛngiya takoka ndanya diɔtɔnganelo diasaso la nde toshaka ndo sho lawɔ dihonga.—Tuk. 2:7; adia 2 Koreto 4:17, 18.
Ngandji mbakatshutshuya Yeso dia sambisha la dihonga
9, 10. Lo toho takɔna takɛnya Yeso dia nde aki la dihonga la ntondo ka a) ewandji w’ɛtɛmwɛlɔ, b) olui w’asɔlayi, c) ɔlɔmbɛdi wa lâdiko, d) Pilato?
9 Yeso, lele Ɛnyɛlɔ kaso akɛnya dihonga lo toho totshikitanyi. Ɛnyɛlɔ, kânga mbakahetshama Yeso oma le wanɛ waki la lowandji ndo anto wa weke, la dihonga tshɛ, nde akatɛ anto kɛnɛ tshɛ kakalangaka Nzambi di’anto mbeya. Aha la mboka wɔma, nde akɛnya lo sɛkɛ wetshelo wa kashi ndo woho wakayaɔsaka ewandji w’ɛtɛmwɛlɔ dia vɔ waki anto wosembwe. La dihonga tshɛ, Yeso akawanya ndo akawatɛ awui hwe hwe. Lo diaaso dimɔtshi, nde akate ate: “Fono kayayi le nyu, afundji la Afarise, akanga a lukesu! Ne dia nyu nyeko uku waumbu wediawo ladiku, weli amena l’andja, keli l’etei [k]awo, vo wambulula la weka wa edu w’antu la mindu tshe. Okone ndu nyu menamaka antu w’ololo lu ashu w’antu, keli l’etei etema anyu, nyu yambulula too la lukesu la akambu wa kolo.”—Mat. 23:27, 28.
10 Etena kakaye olui w’asɔlayi l’ekambɔ ka Ngɛtɛsɛmanɛ dia ndjowonda, la dihonga tshɛ Yeso akayaɛnya le wɔ. (Joa. 18:3-8) L’ɔkɔngɔ, vɔ wakayotshɔka la nde la ntondo k’ase Sheke ndo ɔlɔmbɛdi wa lâdiko akatosandja. Kânga mbakandeyaka di’ɔlɔmbɛdi wa lâdiko akayangaka yɛkɛ nɛndɛ dia mbodiaka, aha la mboka wɔma, Yeso aketawɔ dia nde mbele Kristo ndo Ɔna Nzambi. Nde akakotsha dia vɔ wayowɛna “udjashi lu lunya la pami la wulu, ayayi lu wangi wa l’ulungu.” (Mako 14:53, 57-65) Yema tshitshɛ l’ɔkɔngɔ, Yeso akatɔlama la ntondo ka Pilato lakakoke mbotshungola. Koko Yeso kɔtɛkɛta ndoko dui lo kɛnɛ kendana la awui wakawofunde le nde. (Mako 15:1-5) Akahombe mɛtɛ monga la dihonga dia sala ngasɔ.
11. Ngande wokakatanyi dihonga la ngandji?
11 Yeso akatɛ Pilato ate: “Dimi lakuto dia dikambu ne. Dia dikambu ne mbakamayi la kete, dia mvuta akambu wa mete.” (Joa. 18:37) Jehowa akasha Yeso ɔkɛndɛ wa sambisha lokumu l’ɔlɔlɔ ndo Yeso akangɛnangɛnaka sala dikambo sɔ nɛ dia nde akalangaka She lele l’olongo. (Luka 4:18, 19) Yeso akalangaka nto anto. Nde akeyaka dia vɔ wakasowaka. Woho akɔ wâmɛ mbele ngandji kokaso Nzambi ndo wonyaso onto mbatotshutshuya dia sho sambisha la dihonga ndo aha la mboka wɔma.—Mat. 22:36-40.
Nyuma k’ekila toshaka wolo wa sambisha la dihonga
12. Kakɔna kakasha ambeki wa Yeso wa ntondo ɔngɛnɔngɛnɔ?
12 Mingu mɔtshi l’ɔkɔngɔ wa nyɔi ka Yeso, ambeki waki l’ɔkɔkɔ wa ngɛnangɛna nɛ dia Jehowa akâkotshɛka anto wakahombe shimbamɛ. Lushi ɔtɔi, anto 3000, mbuta ate ase Juda ndo anto akina w’oma lo wedja efula wakaye la Jerusalɛma lo difɛstɔ dia Pɛntɛkɔsta wakabatizama. Anto tshɛ waki la Jerusalɛma wakatɛkɛtaka dia kɛnɛ kakasalema kɛsɔ. Bible mbutaka ɔnɛ: “Woma akawandi vo tshe. Atumami wakatshi akambu wa mamba efula ndu tulimbitelu.”—Etsha 2:41, 43.
13. Lande na kakalɔmbɛ anangɛso dia monga la dihonga, ndo kakɔna kakatombe?
13 Oko wakiwɔ la kɛlɛ, ewandji w’ɛtɛmwɛlɔ wakande Petero nde la Joani, wakawadje lo lokanu otsho w’otondo ndo wakawadjangɛ diaha vɔ tɛkɛta nto akambo wendana la Yeso. Kam’akawatshungɔ, vɔ akɔ ahende wakatotɛ anangɛso l’akadiyɛso kɛnɛ kakatombe ndo vɔ tshɛ wakalɔmbɛ lo kɛnɛ kendana l’ɔlɔshamelo wakahomanaka la wɔ ndo wakalɔmbɛ ɔnɛ: “Khumadiondjo, . . . usha ekambi aye dia vo mvuta diui la dihunga tshe.” Naa etombelo waki la dui sɔ? “Vo tshe wakaludiama la nyuma k’[ekila], wakati diui dia [Nzambi] la dihunga.”—Etsha 4:24-31.
14. Ngande watokimanyiya nyuma k’ekila l’olimu aso w’esambishelo?
14 Tolembete dia nyuma k’ekila kaki Jehowa mbakakimanyiya ambeki dia vɔ sambisha ɔtɛkɛta wa Nzambi la dihonga. Dihonga dia mbutɛ anto akina akambo wa mɛtɛ oyadi kânga wanɛ watona losango laso hadioye oma le so shoamɛ. Jehowa kokaka ndo ayotosha nyuma kande k’ekila naka sho mbɔlɔmbatɔ. Oma l’ekimanyielo ka Jehowa, sho lawɔ kokaka monga la dihonga diele la so ohomba dia tondoya ɔlɔshamelo tshɛ.—Adia Osambu 138:3.
Ɛlɔ kɛnɛ Akristo wekɔ lo sambisha la dihonga
15. Ngande wakahanya akambo wa mɛtɛ anto ɛlɔ kɛnɛ?
15 Lo nshi yaso nyɛ oko wakidiɔ lo nshi y’edjedja, akambo wa mɛtɛ wekɔ lo tetemala kahanya anto. Anto amɔtshi mbaetawɔka etena kele akina hawowashihodia ndo hawolange ɔtɛmwɛlɔ aso. Anto amɔtshi tɔnyɔlaka, tɔtɛngaka kana tohetshaka oko wakate Yeso. (Mat. 10:22) Tena dimɔtshi, tita sango mbutaka awui wa kashi lo lokombo laso. (Osam. 109:1-3) Koko, lo nkɛtɛ k’otondo ekambi waki Jehowa wekɔ lo sambisha lokumu l’ɔlɔlɔ la dihonga.
16. Dui diakɔna diɛnya dia dihonga diaso kokaka kimanyiya di’anto wasambishaso tshikitanya kanyi yawɔ?
16 Dihonga diaso mbeyaka konya anto akina dia vɔ tshikitanya kanyi yele lawɔ lo dikambo dia losango la Diolelo. Kadiyɛso kɛmɔtshi ka lo wodja wa Kirghizistan mbutaka ɔnɛ: “Etena kakimi l’esambishelo, onto ɔmɔtshi akambutɛ ate: ‘Dimi lekɔ la mbetawɔ le Nzambi, koko aha Nzambi k’Akristo. Naka wɛ sombɔ ndja nto lanɛ, layotshungola mfɔ kami dia tɔ kosalɛ kɔlɔ!’ Nde aki la mfɔ ka shaka kakakelekama mɔlɔla. Koko l’okahanyelo wa Nkumu ya Diolelo No. 37, ‘Ekomelo ka ɛtɛmwɛlɔ wa kashi kaya suke!,’ lakɔshi yɛdikɔ ya kalola lo lokombo lɔsɔ l’elongamelo ka tohomana l’onto okina la lo nkumbo ka pami kɛsɔ. Koko, paka pami kakɔ mbakadihola etena kakamakɔkɔla. Aha la tshimbatshimba, lakalɔmbɛ Jehowa ndo oma lâsɔ lakate nte: ‘Akemwe yɔnɛ, dimi mbohɔka sawo diakatasawola ambeta mingu shato ndo dimi mbohɔka mfɔ kayɛ. Koko, lakalangi kela traktɛ kɛnɛ nɛ dia l’ɛnyɛlɔ kayɛ, dimi lekɔ la mbetawɔ le Nzambi ɔtɔi ka mɛtɛ. Kem’edja, Nzambi ayolanya ɛtɛmwɛlɔ wawosha sɔnyi. Wɛ ayokoka mbeka akambo efula wendana la dikambo sɔ lo mbadia traktɛ kɛnɛ.’ Lakambe efula dia mɛna dia pami kɛsɔ aketawɔ mbɔsa traktɛ kɛsɔ. Oma lâsɔ, lakatshu tosambisha lo luudu lokina. Minitɛ ngana l’ɔkɔngɔ, pami kɛsɔ akandjele la lowango okime traktɛ kakɔ. Nde akate ate: ‘Lamboshila kiadia. Ko ahombami sala diaha dimi ndjolanyema oma le Nzambi?’ ” Lakatatɛ mbeka la pami kɛsɔ Bible ndo nde akatatɛ mbɔtɔ lo nsanganya y’Akristo.
17. Ngande wakakeketsha dihonga diaki la kadiyɛso kɛmɔtshi ombeki wa Bible waki la wɔma?
17 Dihonga diaso kokaka kimanyiya anto akina dia vɔ lawɔ monga la dihonga. Lo wodja wa Russie, kadiyɛso kɛmɔtshi kaki lo mutuka wɛmba anto akasha onto ɔmɔtshi lakadjasɛ suke la nde periodikɛ. Pami kɛmɔtshi akafumbɔ oma lo nkɔsa kande, akakɔsɔla kadiyɛso periodikɛ kɛsɔ, akakimɔnyamɔnya ndo akakikasha l’andja wa mutuka. Lo ndɔka kadiyɛso la dui dia wolo, nde akambola lɛnɛ akadjasɛka kadiyɛso ndo akawotɛ diaha nde sombɔ sambisha nto lo ngelo kɛsɔ. Kadiyɛso akalɔmbɛ ekimanyielo ka Jehowa ndo akohɔ ɛtɛkɛta waki Yeso wata ɔnɛ: “Tanyukaki wane wadiaka alimba woma.” (Mat. 10:28) La ki tshɛ, nde akemala ndo akatɛ pami kɛsɔ ate: “Halotokotɛ lɛnɛ adjasɛmi ndo layotetemala sambisha lo ngelo kɛnɛ.” Oma lâsɔ, nde akakite oma lo mutuka. Aha la kadiyɛso mbeya, ombeki ande wa Bible ɔmɔtshi akikɔ lo mutuka ɔsɔ. Womoto ɔsɔ aketawɔ dia wɔma w’onto mboshimba diaha nde mbɔtɔ lo nsanganya y’Akristo. Koko, l’ɔkɔngɔ wa mɛna dihonga diakakɛnɛmɔla kadiyɛso, ombeki wa Bible ɔsɔ akɔshi yɛdikɔ ya tatɛ mbɔtɔ lo nsanganya.
18. Kakɔna kayotokimanyiya dia sambisha la dihonga oko wakasale Yeso?
18 Lo andja ɔnɛ wânganyi la Nzambi, ekɔ ohomba monga la dihonga dia sambisha woho wakasambisha Yeso. Kakɔna kayotokimanyiya dia sala dikambo sɔ? Elongamelo kele la so. Totetemale fudia ngandji kokaso Nzambi ndo onyaso onto. Tɔlɔmbake Jehowa dia nde tosha dihonga. Tohɔke mbala tshɛ dia Yeso ekɔ kâmɛ la so. (Mat. 28:20) Nyuma k’ekila kayotokeketsha. Ndo Jehowa ayotɔtshɔkɔlaka ndo ayotosukɛka. Ɔnkɔnɛ, nyɛsɔ tonge la dihonga ndo tote ɔnɛ: “[Jehowa] keli ukimanyidi ami; haluki woma. Kayuntshela untu?”—Heb. 13:6.
Ngande wayoyokadimola?
• Bonde kele ekambi waki Nzambi wekɔ l’ohomba wa monga la dihonga?
• Lo kɛnɛ kendana la dihonga, wetshelo akɔna wakondjaso oma le . . .
ekambi waki Nzambi wa kɔlamelo wakasɛnaka la ntondo ka Kristo?
Yeso Kristo?
Akristo wa lo ntambe ka ntondo?
asekaso Akristo ɛlɔ kɛnɛ?
[Osato wa lo lɛkɛ 21]
Yeso akɛnya lo sɛkɛ lokeso l’ewandji w’ɛtɛmwɛlɔ aha la mboka wɔma
[Osato wa lo lɛkɛ 23]
Jehowa toshaka dihonga dia sambisha