TSHAPITA 2

Mukanda W’oma Le Nzambi Ka Ngandji

OHOMBUTƐ, dibuku diakɔna dialekayɛ nanga?. . . Ana amɔtshi mbeyaka nsɔna dibuku diatɛkɛta awui wa waa nyama. Akina mbeyaka sɔna dibuku diele l’asango efula lɔkɔ. Wadielo w’abuku asɔ koka mbisha ɔngɛnɔngɛnɔ efula.

Koko abuku woleki amɛna l’andja w’otondo ele wanɛ watewoya akambo wa mɛtɛ wendana la Nzambi. Dimɔtshi l’atei w’abuku asɔ ndeka akina tshɛ dimɛna. Onde wɛ mbeyaka dibuku diakɔ?. . . Bible mbele dibuku diakɔ.

Lande na kele Bible ohomba efula na?. . . Nɛ dia tɔ ndja oma le Nzambi. Tɔ totɛka awui wendana la nde ndo wendana l’awui w’ɔlɔlɔ wayondotosalɛ. Ndo tɔ tɛnyaka kɛnɛ kahombaso sala dia mbɔ̂ngɛnyangɛnya. Tɔ kekɔ oko mukanda w’oma le Nzambi.

Nzambi akakoke funda Bible k’otondo l’olongo, oma lâsɔ ko nde kisha anto. Koko nde kosala ngasɔ. Kânga mbele tokanyi takaye oma le Nzambi, nde akakambe l’ekambi ande wa lanɛ la nkɛtɛ dia funda etenyi koleki woke k’awui wa lo Bible.

Ngande wakasale Nzambi dui sɔ na?. . . Dia sho shihodia woho wakandadisale, tende ɛnyɛlɔ kɛnɛ. Lam’okaso dui di’onto ɔmɔtshi l’aradiyo kana lo fɔni, diɔ koka ndja oma le onto ɔmɔtshi langanyi la so etale k’efula. Lam’endaso televiziɔ, sho koka mɛna ndo alɛdi w’anto w’oma lo wedja ekina wa l’andja ndo sho koka mboka kɛnɛ katɛkɛtawɔ.

Anto koka ntshɔ etale efula polo ndo lo ngɔndɔ lo mashinyi awɔ ndo vɔ koka toma awui oma lo ngɔndɔ oya lanɛ la nkɛtɛ. Onde wɛ mbeyaka dui sɔ?. . . Naka anto koka sala ngasɔ, onde Nzambi hakoke nde lawɔ toma awui oma l’olongo?. . . Lo mɛtɛ, nde kokaka toma! Ndo nde akasale dui sɔ edja efula la ntondo k’anto monga l’aradiyo, la fɔni kana la televiziɔ.

Mɔsɛ akoke Nzambi atɛkɛta. Mɔsɛ kokoka mɛna Nzambi, koko nde akakoke mboka dui diande. Miliyɔ y’anto waki lawɔ etena kakasalema dui sɔ. Lushi lɔsɔ, Nzambi akasutshasutsha dikona di’otondo ndo akungola ndo angadimu wa ndjadi wakikɔ. Anto wakeye ɔnɛ Nzambi katɛkɛta, koko waki la wɔma w’efula. Ɔnkɔnɛ, vɔ wakatɛ Mɔsɛ vate: “Keli [Nzambi] tateketaki la su, tutukuvo.” Oma lâsɔ, Mɔsɛ akafunde awui wakawotɛ Nzambi. Ndo kɛnɛ kakafunde Mɔsɛ kekɔ lo Bible.​—⁠Etumbelu 20:​18-21.

Mɔsɛ mbakafunde abuku atanu wotate wa lo Bible. Koko aha ndamɛ oto mbakafunde tenyi dia Bible. Nzambi akakambe l’anto oko 40 dia funda tenyi dia Bible. Anto asɔ wakasɛnaka ambeta edja efula, ndo ɛnɔnyi efula wakete dia Bible shila la fundama. Ofundelo ɔsɔ wakɔshi ɛnɔnyi oko 1 600! Dikambo dia diambo ko, kânga mbele anto amɔtshi l’atei wa wanɛ wakafunde Bible kɔmɛnana ndoko lushi, awui tshɛ wakawafunde mbɔtɔnɛka dimɛna.

Anto amɔtshi wakakambe Nzambi la wɔ dia funda Bible waki anto wa lokumu. Kânga mbaki Mɔsɛ onami w’ɛkɔkɔ, nde akayokoma ɔnɔmbɔdi wa wodja w’Isariyɛlɛ. Sɔlɔmɔna aki nkumekanga kakaleke lomba ndo ɔngɔnyi lanɛ la nkɛtɛ. Koko afundji akina kombeyamaka efula. Amɔsɛ akakokɛka esongo wa fingo.

Ndo nto, ofundji ɔmɔtshi wa Bible aki dɔkɔtɛlɛ diakasakɛka anto. Onde wɛ mbeyaka lokombo lande?. . . Lokombo lande Luka. Ofundji okina wa Bible aki onongodi w’elambo. Lokombo lande Mateo. Okina nto aki ombewi w’ɛlɛmbɛ wa wodja ndo w’ɔtɛmwɛlɔ w’ase Juda. Nde akafunde abuku efula oleki afundji akina wa Bible. Onde wɛ mbeyaka lokombo lande?. . . Lokombo lande Paulo. Ndo ambeki waki Yeso wakawelɛka Petero nde la Joani waki amundji wa nse mbakafunde Bible.

Efula k’afundji wa Bible asɔ wakafunde awui wayosala Nzambi lo nshi yayaye. Ngande wakaweye awui asɔ la ntondo ka ndo vɔ salema na?. . . Nzambi mbakatɛ apami asɔ awui akɔ. Nde akawatɛ kɛnɛ kakahombe salema.

Lo nshi yaki Yeso Ombetsha a Woke lanɛ la nkɛtɛ, etenyi koleki woke ka Bible kakashile la fundama. Tohɛke di’Ombetsha a Woke amboshilaka la mbudɛ l’olongo. Nde akeyaka kɛnɛ kakasale Nzambi. Onde nde aketawɔka dia Bible kakaye oma le Nzambi?. . . Eelo, nde aketawɔka.

Lam’akatɛka Yeso anto awui wendana l’elimu waki Nzambi, nde akadiaka oma lo Bible. Tena dimɔtshi nde akawatɛka kɛnɛ kata Bible aha la nde mbifola Bible. Ndo nto, Yeso akatewoya awui efula w’oma le Nzambi. Yeso akate ate: ‘Akambo wakamoke oma le nde mbatɛmi anto wa l’andja ɔnɛ.’ (Joani 8:26) Yeso akoke akambo efula oma le Nzambi nɛ dia nde akasɛnaka kâmɛ la Nde. Ko lende akokaso mbadia akambo wakate Yeso asɔ na?. . . Lo Bible. Akambo akɔ tshɛ wakafundama dia sho mbawadiaka.

Lo mɛtɛ, lam’akakambe Nzambi l’anto dia funda Bible, vɔ wakakifunde l’ɔtɛkɛta wakawatɛkɛtaka lo nshi yakɔ. Ɔnkɔnɛ, etenyi koleki woke ka Bible kakafundama lo Hɛbɛru, tenyi dimɔtshi lo Arameyɛ, ndo tenyi efula lo Grɛkɛ. Lam’ele ɛlɔ kɛnɛ anto efula haweye mbadia ɛtɛkɛta ɛsɔ, Bible akakadimɔma l’ɛtɛkɛta ekina. Ɛlɔ kɛnɛ, tenyi dia Bible diokoka mbadiema l’ɛtɛkɛta ndekana 2 260. Ohokanyiya efula k’ɛtɛkɛta ɛsɔ! Bible ekɔ mukanda wakafundɛ Nzambi anto wa l’ahole tshɛ. Koko, oyadi tɔ kambokadimɔma l’ɛtɛkɛta efula, awui wa lɔkɔ ndja oma le Nzambi.

Kɛnɛ kata Bible kekɔ ohomba efula le so. Tɔ kakafundama ambeta ɛnɔnyi efula. Koko, tɔ mbutaka awui weta nshi nyɛ. Ndo tɔ totɛka kɛnɛ kayanga sala Nzambi kem’edja. Tɔ mbutaka awui watokeketsha efula mɛtɛ! Tɔ toshaka elongamelo ka diambo.

Bible totɛka nto woho walanga Nzambi dia sho nsɛna. Tɔ totɛka kɛnɛ kele dimɛna ndo kɛnɛ kele kɔlɔ. Ekɔ ohomba wɛ mbeya awui asɔ ndo ekɔ ohomba dia ndo dimi lawɔ mbaeya. Bible totɛka akambo wendana l’anto wakasale awui wa kɔlɔ ndo kɛnɛ kakâkomɛ woho wa sho mbeya mbewɔ ekakatanu wakâkomɛ. Tɔ totɛka nto akambo wendana l’anto wakasale awui w’ɔlɔlɔ ndo etombelo w’ɔlɔlɔ wakonge l’awui akɔ le wɔ. Akambo asɔ tshɛ wakafundama dikambo dia wahɔ aso.

Koko dia kondja wahɔ w’efula oma lo Bible, ekɔ ohomba sho mbeya okadimwelo wa dimbola dimɔtshi. Dimbola diakɔ diɔ nɛ: Onto akɔna akatosha Bible na? Ngande wayoyokadimola?. . . Eelo, Bible k’otondo ndja oma le Nzambi. Lâsɔ, ngande wakokaso mɛnya mɛtɛ dia tekɔ la lomba?. . . Ele lo mpokamɛ Nzambi ndo lo sala kɛnɛ katande.

Ɔnkɔnɛ, ekɔ ohomba sho tshungola etena ka mbadiaka Bible kâmɛ. Lam’alongolaso mukanda oma le onto ɔmɔtshi lokaso ngandji efula, sho mbadiaka mukanda akɔ mbala la mbala nɛ dia vɔ wekɔ la nɛmɔ le so. Yoho shɔ mbahombaso mbɔsa Bible nɛ dia tɔ kekɔ mukanda w’oma le Onto loleki toka ngandji. Tɔ kekɔ mukanda w’oma le Nzambi ka ngandji.

Yatshungwɛ yema y’etena kakianɛ dia mbadia avɛsa anɛ wɛnya dia Bible ekɔ mɛtɛ Ɔtɛkɛta wa Nzambi wakafundama dikambo dia wahɔ aso: Romo 15:4; 2 Timote 3:​16, 17; ndo 2 Petero 1:​20, 21.

[Esato wa lo lɛkɛ 17]

Ngande weyaso dia Nzambi koka tɛkɛta la so oma l’etale k’efula?

[Esato wa lo lɛkɛ 19]

Naa nkombo y’afundji wa Bible anɛ?

[Osato wa lo lɛkɛ 20]

Awui akɔna wakokayɛ mbeka oma lo wadielo wa Bible na?