TSHAPITA 4

Nzambi Ekɔ La Lokombo

MBALA efula naa dui dia ntondo diatoyombolaka onto mbala ka ntondo kahomanayɛ la nde na?. . . Eelo, wɛ towombolaka lokombo lande. Sho tshɛ tekɔ la nkombo. Nzambi akasha onto la ntondo lakandatonge lanɛ la nkɛtɛ lokombo. Nde akawɔlɛ Adama. Nde akɔ̂lɛ wadi aki Adama lokombo ate Eva.

Koko, aha anto ato mbele la nkombo. Ohokanyiya diangɔ dikina diele nto la nkombo. Naka onto ɔmɔtshi ambokosha ɔna pɔpi kana nyama kɛmɔtshi kakawasale dia kɛnyaka latɔ, kema wɛ mbishaka ɛngɔ kakɔ lokombo lɔmɔtshi?. . . Eelo, monga la lokombo ekɔ dikambo di’ohomba efula.

Ohowalɛ l’otsho l’olongo dia menda efula ka tɔtɔ taheyama mbadia tele lɔkɔ. Onde wɛ fɔnyaka dia tɔ tekɔ la nkombo?. . . Eelo, Nzambi akasha oseka yɔɔtɔ tshɛ ya l’olongo lokombo. Bible totɛka ɔnɛ: “Ndi atalaka efula ka toto, atutoleka kumbu to tshe.”​—⁠Osambu 147:⁠4.

Onto akɔna lakokayɛ mbuta ɔnɛ nde mbaheme l’andja w’otondo?. . . Eelo, Nzambi mbaheme. Onde wɛ fɔnyaka dia nde ekɔ la lokombo?. . . Yeso akate dia Nde ekɔ la lokombo. Mbala kɛmɔtshi Yeso akatɛ Nzambi lo dɔmbɛlɔ ate: ‘Dimi lakeyanya lokombo layɛ le ambeki ami.’ (Joani 17:26) Onde wɛ mbeyaka lokombo laki Nzambi?. . . Nzambi ndamɛ totɛka lokombo lande. Nde mbutaka ate: ‘Dimi kele Jehowa. Ɔsɔ mbele lokombo lami.’ Ɔnkɔnɛ, lokombo laki Nzambi ele JEHOWA.​—⁠Isaya 42:⁠8.

Ngande watoyoyaokaka lam’ohɔ anto akina lokombo layɛ na?. . . Shi wɛ tongaka l’ɔngɛnɔngɛnɔ?. . . Jehowa lawɔ nangaka di’anto mbeya lokombo lande. Ɔnkɔnɛ, sho pombaka kamba la lokombo la Jehowa lam’atɛkɛtaso awui wendana la Nde. Ombetsha a Woke akakambaka la lokombo laki Nzambi, Jehowa, lam’akandatɛkɛtaka l’anto. Mbala kɛmɔtshi, Yeso akate ate: ‘Wɛ pombaka nanga Jehowa Nzambi kayɛ l’otema ayɛ tshɛ.’​—⁠Mako 12:⁠30.

Yeso akeyaka dia ‘Jehowa’ ekɔ lokombo l’ohomba efula. Diakɔ diakandetsha ambeki ande dia vɔ kambaka la lokombo laki Nzambi. Nde akawaetsha ndo dia kambaka la lokombo laki Nzambi l’alɔmbɛlɔ awɔ. Yeso akeyaka dia Nzambi nangaka di’anto tshɛ mbeya dia Jehowa mbele lokombo Lande.

Ambeta deko aha nɛ, Nzambi akɛnya ohomba wa lokombo lande le Mɔsɛ laki ose Isariyɛlɛ. Ana w’ase Isariyɛlɛ wakasɛnaka lo wodja wakawelɛka Edjibito. Wakelɛka anto wa lo wodja ɔsɔ ɔnɛ as’Edjibito. Vɔ wakakonya ase Isariyɛlɛ ɛhɔmbɔ awɔ ndo wakâhɛnyɔlaka efula. Lam’akakome Mɔsɛ opalanga, nde akahembe dia kimanyiya ose Isariyɛlɛ ɔmɔtshi. Dikambo sɔ diakomadia Farawɔ laki nkumekanga k’Edjibito. Nde akalange ndjaka Mɔsɛ! Ɔnkɔnɛ, Mɔsɛ akalawɔ oma l’Edjibito.

Mɔsɛ akatshu otsha lo wodja okina. Nde akatshu otsha lo wodja wa Midiyana. Lɛkɔ, Mɔsɛ akatotshuka wadi ndo akatatɛ mbodia ana. Nde akakambe nto olimu w’onami w’ɛkɔkɔ. Lushi lɔmɔtshi, lam’akalamaka Mɔsɛ ɛkɔkɔ suke la dikona dimɔtshi, nde akɛnyi dikambo dia diambo efula. Dja yakahɛtaka l’atei wa dikombokombo, aha la diɔ nongola! Mɔsɛ akasukana woho wa nde mɛna dikambo sɔ dimɛna dimɛna.

Onde wɛ mbeyaka kɛnɛ kakatombe?. . . Mɔsɛ akoke dui oma l’atei wa dikombokombo diakahɛtaka sɔ. Dui diakɔ diakawete la wolo ɔnɛ: “Mose! Mose!” Onto akɔna akawetaka na?. . . Nzambi mbakawetaka! Nzambi aki l’olimu efula wakandalange dia Mɔsɛ kamba. Nzambi akate ate: ‘Yaka lanɛ kele kotome le Farawɔ, nkumekanga k’Edjibito dia totondja wodja ami, mbut’ate ana w’ase Isariyɛlɛ oma l’Edjibito.’ Nzambi akalake Mɔsɛ ɔnɛ nde ayowokimanyiya dia sala dikambo sɔ.

Koko Mɔsɛ akatɛ Nzambi ate: ‘Ohɔsa dia dimi lambotshɔ otsha le ana w’ase Isariyɛlɛ l’Edjibito ndo lambotowatɛ nte Nzambi mbotomi, ayomosala naka vɔ wambomumbola vate: “Na lukumbu landi?” Ngande wayomowatɛ?’ Nzambi akatɛ Mɔsɛ dia totɛ ana w’ase Isariyɛlɛ ɔnɛ: ‘Jehowa mbotomi oya le nyu. Jehowa mbele lokombo lami la pondjo pondjo.’ (Etumbelu 3:​1-15) Kɛsɔ mɛnyaka dia Nzambi akahombe tetemala monga la lokombo Jehowa. Nde hatshikitanyaki lokombo lɔsɔ pondjo. Nzambi akalange mbeyama oma lo lokombo lande la Jehowa, pondjo pondjo.

Lam’akakawola Mɔsɛ otsha l’Edjibito, as’Edjibito wakakane vate Jehowa aki oko jambizambi mɔtshi y’ase Isariyɛlɛ. Vɔ kɔfɔnyaka dia nde aki Nzambi ka nkɛtɛ k’otondo. Diɔ diakɔ diakatɛ Jehowa nkumekanga k’Edjibito ate: ‘Lotsha mbeyanya lokombo lami lo nkɛtɛ k’otondo.’ (Etumbelu 9:16) Jehowa akeyanya lokombo lande mɛtɛ. Onde wɛ mbeyaka woho wakandasale dikambo sɔ?. . .

Nde akasɔnɛ Mɔsɛ dia nɔmbɔla wodja w’Isariyɛlɛ oma l’Edjibito. Lam’akawakome lo Ndjale ka Bela, Jehowa akatola ndjale l’ahende woho wa vɔ kondja mboka ka mbeta. Ase Isariyɛlɛ wakatenyanya ndjale kɛsɔ ekolo efumbu aha la wâle ɔmɔtshi. Koko Farawɔ nde l’alembe ande tshɛ wakɔtɔ l’etei ka ndjale kakômia Jehowa kɛsɔ. Ko oma lâsɔ, mpele di’ashi diakemala wedi akɔ ehende diakambwɛ as’Edjibito ko vɔ tshɛ wakavu.

Yema tshitshɛ oma lâsɔ, anto wa lo nkɛtɛ k’otondo wakatatɛ mboka kɛnɛ kakasale Jehowa lo Ndjale ka Bela. Ngande weyaso ɔnɛ vɔ wakoke dikambo sɔ na?. . . L’ɔkɔngɔ w’ɛnɔnyi oko 40, ase Isariyɛlɛ wakakome la Kanana mbut’ate lo nkɛtɛ yakalake Jehowa dia mbâsha. Lo nkɛtɛ shɔ, osekaseka wakawelɛka Rahaba akatɛ apami ahende w’ase Isariyɛlɛ ate: “Shu takuki uku akumia [Jehowa Ndjale ka Bela] la ntundu kanyu lam’akanyatumbi uma l’Edjibitu.”​—⁠Jashua 2:⁠10.

Ɛlɔ kɛnɛ, anto efula wekɔ oko as’Edjibito asɔ. Vɔ hawetawɔ dia Jehowa mbele Nzambi kakanga nkɛtɛ k’otondo. Ɔnkɔnɛ, Jehowa nangaka di’ekambi ande mbewoya anto akina awui wendana la nde. Kɛsɔ mbakasale Yeso. Oya l’ekomelo ka lɔsɛnɔ lande la lanɛ la nkɛtɛ, Yeso akatɛ Jehowa lo dɔmbɛlɔ ate: ‘Dimi lakeyanya lokombo layɛ le wɔ.’​—⁠Joani 17:⁠26.

Onde wɛ nangaka monga oko Yeso? Lâsɔ ewoya anto akina ɔnɛ lokombo laki Nzambi ele Jehowa. Wɛ ayɛna di’anto efula haweye lokombo lɔsɔ. Ondo wɛ kokaka mbaɛnya divɛsa dia lo Bible dia Etatelu 22:14. Tɔshi Bible yaso kele tadia divɛsa sɔ kâmɛ. Diɔ mbutaka ɔnɛ: “Abarahama akole dihuli so ati: Jehowa-Jire (kitshimudi ati: [Jehowa] ayukutsha).”

Kakɔna kamboteya oma lo wadielo wa divɛsa nɛ na?. . . Eelo, tambeya dia Jehowa mbele lokombo loleki woke tshɛ. Lɔ mbele lokombo laki Nzambi Nkanga-Nkudu-Tshɛ lele She aki Yeso ndo Ɔnɛ lakatonge diangɔ tshɛ. Ndo ohɔ dia Yeso akate dia sho pombaka nanga Jehowa Nzambi l’otema aso tshɛ. Onde wɛ nangaka Jehowa?. . .

Ngande wakokaso mɛnya dia sho nangaka Jehowa na?. . . Yoho mɔtshi ele lo nyanga dia mbêya oko Ɔngɛnyi. Yoho kina ele lo mbewoya anto akina lokombo lande. Sho koka mbaɛnya mbala kakɔ ɔtɔi oma lo Bible dia Jehowa mbele lokombo lande. Sho koka nto mbaewoya diangɔ dia diambo diakatonge Jehowa ndo awui w’ɔlɔlɔ efula wakandasale. Dui sɔ ngɛnyangɛnyaka Jehowa efula nɛ dia nde nangaka di’anto mbeya awui wendana la nde. Sho koka salaka dikambo sɔ, shi mɛtɛ?. . .

Aha anto tshɛ mbayolanga mpokamɛ lam’atɛkɛtaso awui wendana la Jehowa. Anto efula kompokamɛ kânga Yeso lele Ombetsha a Woke lam’akandatɛkɛtaka awui wendana la Jehowa. Koko dui sɔ koshimba Yeso dia nde tetemala mbewoya awui wendana la Jehowa.

Ɔnkɔnɛ, ɛsɔ tokoya ɛnyɛlɔ kaki Yeso. Totetemale la mbewoya awui wendana la Jehowa. Jehowa Nzambi ayotɔngɛnangɛna nɛ dia sho nangaka lokombo lande.

Kakianɛ tadia kâmɛ avɛsa amɔtshi w’oma lo Bible wɛnya ohomba wa lokombo laki Nzambi: Isaya 12:​4, 5; Mateu 6:9; Joani 17:6; ndo Romo 10:⁠13.

[Osato wa lo lɛkɛ 27]

Onde wɛ akeyaka dia tɔɔtɔ tshɛ tekɔ la nkombo?

[Osato wa lo lɛkɛ 28]

Naa wetshelo w’ohomba wakakondja Mɔsɛ oma lo dikombokombo diakahɛtaka dja?

[Osato wa lo lɛkɛ 29]

Ngande wakeyanya Nzambi lokombo lande lo Ndjale ka Bela?

[Esato wa lo lɛkɛ 30]

Yeso akeyanya lokombo laki Nzambi. Onde wɛ koka mbishola lokombo laki Nzambi lo Bible?