TSHAPITA 5

‘Ɔnɛ Ekɔ Ɔnami’

ETENA kasala ana awui w’ɔlɔlɔ, wanɛ wawaodia ngɛnangɛnaka. Etena kasala ɔna womoto dikambo dimɔtshi di’ɔlɔlɔ, she funɛka anto akina lo mbuta ate: “Ɔnɛ ekɔ ɔnami la womoto.” Kana etena kasala ɔna pami awui w’ɔlɔlɔ, she ngɛnangɛna dia mbuta ate: “Ɔnɛ ekɔ ɔnami la pami.”

Yeso salaka nshi tshɛ kɛnɛ kangɛnyangɛnya She. Diakɔ diayafuna She lo dikambo diande. Onde wɛ mbohɔka kɛnɛ kakasale She Yeso lushi lɔmɔtshi etena kaki Yeso nde l’ambeki ande asato?. . . Nzambi akatɛkɛta la wolo tshɛ oma l’olongo dia mbutɛ ambeki asɔ ate: ‘Ɔnɛ ekɔ ɔnami la ngandji, dimi latɔ̂ngɛnangɛnaka.’​—⁠Mateu 17:⁠5.

Yeso ngɛnangɛnaka nshi tshɛ dia sala awui wangɛnyangɛnya She. Onde wɛ mbeyaka lande na? Nɛ dia nde mɛtɛ mbokaka She ngandji. Naka onto ekɔ lo sala akambo paka nɛ dia wekɔ lo mbofundɛ dia mbâsala, kete mbeyaka monga wolo nde sala akambo asɔ. Koko naka nde mbetawɔ mbâsala la lolango lande ndamɛ, kete hatonga wolo le nde. Onde wɛ mbeyaka kɛnɛ kalembetshiya mbetawɔ sala dikambo?. . . Dui sɔ nembetshiyaka mɛtɛ nanga dia sala dikambo dimɔtshi.

Kânga la ntondo ka Yeso ndja lanɛ la nkɛtɛ, nde aketawɔ sala dikambo tshɛ diakɔlɔmbɛ She dia sala. Nde akasalaka ngasɔ nɛ dia nde mbokaka Jehowa Nzambi ka She ngandji. Yeso aki lo dihole dia woke efula l’olongo lale She. Koko Nzambi aki l’olimu ɔmɔtshi wa lânde wakandalange dia Yeso sala. Dia sala olimu ɔsɔ, Yeso akahombe mimɔ oma l’olongo. Nde akahombe mbotɔ oko ɔna ashashi lanɛ la nkɛtɛ. Yeso aketawɔ sala dui sɔ nɛ dia Jehowa akalange nde disala.

Dia nde mbotɔ oko ɔna ashashi lanɛ la nkɛtɛ, Yeso akahombe monga l’ombutshi wa womoto. Onde wɛ mbeyaka onto laki nyango Yeso?. . . Mariya mbaki nyango. Jehowa akatome ondjelo ande Ngabiriyɛlɛ oma l’olongo dia nde ndjewoya Mariya. Ngabiriyɛlɛ akawotɛ dia nde ayota ɔna pami. Wayɔlɛ ɔn’ɔsɔ lokombo ɔnɛ Yeso. Ko onto akɔna akahombe monga she aki ɔn’ɔsɔ na?. . . Ondjelo akate dia Jehowa Nzambi mbayonga She. Diakɔ diele Yeso akahombe mbelamɛ ɔnɛ Ɔna Nzambi.

Oko le yɛ ngande wakayaoke Mariya lo kɛnɛ kendana la dui sɔ na?. . . Onde nde akate ate: “Dimi halange monga nyango Yeso”? Kema, Mariya aki suke dia sala kɛnɛ kakalangaka Nzambi. Ko ngande wakakoke Ɔna Nzambi mimɔ oma l’olongo ko ndjotɔ oko ɔna ashashi lanɛ la nkɛtɛ? Ngande wakatshikitana eotwelo kaki Yeso la eotwelo k’ana akina tshɛ na? Onde wɛ mbeyaka?. . .

Nzambi akatonge ambutshi aso wa ntondo, Adama la Eva woho wa vɔ ahende mamatana kâmɛ lo yoho ya diambo efula. L’ɔkɔngɔ, ɔna ashashi akakoke tatɛ pama lo dikundju diaki nyango. Anto mbutaka ɔnɛ ɔsɔ ekɔ mɛtɛ dihindo! Dimi shikikɛka dia wɛ mbetawɔka dikambo sɔ.

Nzambi akasale dikambo dimɔtshi diele diaki dihindo dia mamba. Nde akɔshi lɔsɛnɔ l’Ɔnande oma l’olongo ko lidja lo dikundju diaki Mariya. Ɔsɔ mbaki mbala ka ntondo ndo k’ekomelo ka Nzambi sala woho wa dikambo dia ngasɔ. Etombelo waki la dihindo sɔ ele Yeso akatatɛ la pama lo dikundju diaki Mariya paka oko watohamaka ana akina tshɛ l’akundju w’anyangɛwɔ. L’ɔkɔngɔ wa lâsɔ, Mariya akayotshukanaka la Yɔsɛfu.

Lam’akakoke etena ka Yeso mbotɔ, Mariya nde la Yɔsɛfu waki l’osomba wa Bɛtɛlɛhɛma. Koko anto wakalole l’osomba ɔsɔ. Mariya nde la Yɔsɛfu komonga kânga la luudu la vɔ mbidjasɛ, ɔnkɔnɛ, vɔ wakatodjasɛ lo lokoto la waa nyama. Mariya akôte, ndo waketanya Yeso lo elelo ka waa nyama oko wakokayɛ mɛna lanɛ. Elelo ka waa nyama kɛdikɛdi dihole diadjɛwɔ waa ngɔmbɛ ndo nyama nkina diangɔ dia ndɛ.

Akambo amɔtshi w’ɔngɛnɔngɛnɔ wakasalema l’otsho wakotɔ Yeso. Ondjelo ɔmɔtshi akɛnama le anami w’ɛkɔkɔ waki suke la Bɛtɛlɛhɛma. Nde akawatɛ ate Yeso aki onto l’ohomba efula. Ondjelo akate nto ate: ‘Nyolonge! Lekɔ lo nyotɛ lokumu l’ɔlɔlɔ layosha anto ɔngɛnɔngɛnɔ. Onto ɔmɔtshi layoshimbɛ anto ambotɔ ɛlɔ.’​—⁠Luka 2:​10, 11.

Ondjelo akatɛ anami w’ɛkɔkɔ dia vɔ koka totana Yeso la Bɛtɛlɛhɛma oshami l’elelo ka waa nyama. Oma lâsɔ, andjelo akina wakaye la shashimoya ko wakasangana kâmɛ l’ondjelo wa ntondo dia tombola Nzambi. Andjelo asɔ wakembe vate: “Lutumbu layali le [Nzambi] . . . Ki kayali la kete l’atei w’antu [w’ɔlɔlɔ].”​—⁠Luka 2:​12-14.

Lam’akamɔ andjelo asɔ, anami w’ɛkɔkɔ wakatshu otsha la Bɛtɛlɛhɛma ko wakatotana Yeso. Lam’akawakome lɛkɔ, vɔ wakatɛ Yɔsɛfu nde la Mariya awui w’ɔlɔlɔ tshɛ wakawoke. Shi wɛ koka kanyiya ɔngɛnɔngɛnɔ waki la Mariya lo woho wakandetawɔ monga nyango Yeso?

L’ɔkɔngɔ diko, Yɔsɛfu nde la Mariya wakɔshi Yeso ko wakatshu la nde otsha l’osomba wa Nazarɛtɛ. Lɛsɔ mbakole Yeso. Lam’akandakome opalanga, nde akatatɛ olimu ande wa woke wa mbetsha anto. Ɔsɔ aki etenyi kɛmɔtshi k’olimu wakalangaka Jehowa Nzambi di’Ɔnande kamba lanɛ la nkɛtɛ. Yeso aketawɔ sala olimu ɔsɔ nɛ dia Nde akokaka She lele l’olongo ngandji efula.

La ntondo ka Yeso tatɛ olimu ande oko Ombetsha a Woke, nde akabatizama l’Ɔkɛdi wa Jɔrɔdana oma le Joani Obatizanyi. Oma lâsɔ, dikambo dimɔtshi dia diambo efula diakatombe! Etena kakayatombaka Yeso oma l’ashi, Jehowa akate oma l’olongo ate: ‘Ɔnɛ ekɔ Ɔnami la ngandji, dimi latɔ̂ngɛnangɛnaka.’ (Mateu 3:17) Kema wɛ tɔngɛnangɛnaka lam’akotɛ ambutshi ayɛ ɔnɛ vɔ kolangaka?. . . Sho koka monga l’eshikikelo dia Yeso nde lawɔ akangɛnangɛna.

Yeso akasalaka nshi tshɛ kɛnɛ kaki ɔlɔlɔ. Nde kondjafuna dia monga woho w’onto wakinde komonga. Nde kombutɛ anto ate nde aki Nzambi. Ondjelo Ngabiriyɛlɛ akatɛ Mariya ate Yeso ayelamɛ ɔnɛ Ɔna Nzambi. Yeso ndamɛ akate ate nde aki Ɔna Nzambi. Ndo nde kombutɛ anto ate nde mbeyaka awui efula ndeka She. Nde akate ate: “Papa ambundeka.”​—⁠Joani 14:⁠28.

Kânga l’olongo, etena kakawoshaka She olimu ɔmɔtshi wa sala, Yeso kotonaka. Nde kombutaka dia nde ayosala olimu ɔsɔ ko l’ɔkɔngɔ nde ndjosala dui dikina lo dihole di’olimu wakawawosha. Nde akokaka She ngandji. Diakɔ diele nde akahokamɛka kɛnɛ kakataka She. Oma lâsɔ, etena kakaye Yeso lanɛ la nkɛtɛ, nde akasale kɛnɛ kakotome She lele l’olongo dia ndjosala. Nde kombetsha wenya ande lo salaka awui akina. Aha la tâmu, Jehowa akangɛnangɛnaka Ɔnande.

Sho lawɔ nangaka ngɛnyangɛnya Jehowa, shi mɛtɛ?. . . Lâsɔ, sho pombaka mɛnya dia sho mɛtɛ mpokamɛka Nzambi oko wakasalaka Yeso. Nzambi tɛkɛtaka la so l’ekimanyielo ka Bible. Shi bu dimɛna sɛma dia tekɔ lo mpokamɛ kɛnɛ kata Nzambi ko tete le tekɔ lo mbetawɔ ndo tekɔ lo sala awui wahɔtɔnɛ la Bible?. . . Ndo ohɔ dia tayolanga ngɛnyangɛnya Jehowa naka sho mɛtɛ mbôkaka ngandji.

Kakianɛ adia avɛsa akina anɛ wa lo Bible wɛnya kɛnɛ kahombaso mbeya ndo mbetawɔ lo dikambo dia Yeso: Mateu 7:​21-23; Joani 4:​25, 26; ndo 1 Timote 2:​5, 6.

[Osato wa lo lɛkɛ 33]

Ondjelo Ngabiriyɛlɛ akandatɛ Mariya?

[Osato wa lo lɛkɛ 34]

Lande na kakawetanya Yeso lo elelo ka waa nyama?

[Osato wa lo lɛkɛ 35]

Naa lokumu l’ɔlɔlɔ lakatɛ ondjelo ɔmɔtshi l’atei w’andjelo anɛ anami w’ɛkɔkɔ?