TSHAPITA 14

Sho Pombaka Kimwanɛka

ONDE ndoko lushi lakakosalɛ onto ɔmɔtshi dikambo dia kɔlɔ?. . . Onde nde akakonyangiya kana akakotɛ dikambo dimɔtshi dia kɔlɔ?. . . Onde wɛ pombaka sɔmbɔya onto akɔ?. . .

Naka onto ɔmɔtshi ambânyangiya, anto efula sɔmbɔyaka kɔlɔ lo kɔlɔ. Koko Yeso akatetsha dia sho pombaka kimwɛ wanɛ watosalɛ kɔlɔ. (Mateu 6:12) Ko ahombaso sala naka onto ɔmɔtshi ambotosalɛ kɔlɔ mbala efula? Mbala ngana yahombaso mbokimwɛ?. . .

Dikambo sɔ mbakalange Petero mbeya. Ɔnkɔnɛ, nde akambola Yeso lushi lɔmɔtshi ate: ‘Onde dimi koka mbokimwɛ kânga mbala esambele?’ Aha mbala esambele tsho. Yeso akawotɛ ate: ‘Naka onto ambokosalɛ kɔlɔ tena efula, wɛ pombaka mbokimwɛ mbala akumi esambele l’esambele.’

Ɔsɔ mɛtɛ ekɔ mbala efula! Tayohɛ kɔlɔ kana munga efula yakatosalɛ onto akɔ, shi mɛtɛ? Kɛsɔ mbakatotɛ Yeso: Hatohombe mbohɔ lofulo l’awui wa kɔlɔ lakoka anto akina tosalɛ. Naka wanɛ wotosale kɔlɔ wambɔlɔmba dia mbakimwɛ, kete sho pombaka mbakimwɛ.

Yeso akalange mɛnya ambeki ande ohomba w’efula wa kimwɛ anto. Ɔnkɔnɛ, l’ɔkɔngɔ wa nde kadimola dimbola diaki Petero, nde akakɔndɔlɛ ambeki ande ɔkɔndɔ ɔmɔtshi. Onde wɛ nangaka mboka ɔkɔndɔ akɔ?. . .

Ekɔ ɔkɔndɔ wa nkumekanga kɛmɔtshi k’ɔlɔlɔ efula. Nde aki mɛtɛ ɔlɔlɔ efula. Nde akasɔndjaka ekambi ande akuta lam’akiwɔ l’ohomba w’ekimanyielo. Koko lushi lakalange nkumekanga kɛsɔ di’ekambi ande waki l’abasa futa abasa awɔ lakakoke. Ɔnkɔnɛ, wakela okambi ɔmɔtshi wakahombe futa dibasa di’ekenga wa falanga miliyɔ 60 yaki nkumekanga kɛsɔ. Ɔsɔ aki akuta efula mɛtɛ!

Koko okambi ɔsɔ akale akuta tshɛ waki nkumekanga ndo nde kokoka mbasɔmbɔla. Ɔnkɔnɛ, nkumekanga akatome dui dia vɔ sondja okambi ɔsɔ. Nkumekanga kɛsɔ akate nto dia vɔ sondja ndo wadi aki okambi akɔ ndo ana ande ndo diangɔ diande tshɛ. Ɔnkɔnɛ, nkumekanga akahombe kondja akuta ande l’ɔkɔngɔ wa sondja anto asɔ la diangɔ diawɔ. Ngande wafɔnyayɛ wakahombe okambi ɔsɔ ndjaoka?. . .

Nde akake adwe la ntondo ka nkumekanga ndo akɔ̂sɛngasɛnga ate: ‘Lam’alangayɛ, ombisha nshi efula kele kakɔsɔmbɔlɛ oseka ɛngɔ kayɛ tshɛ.’ Otondonga wɛ mbaki nkumekanga kɛsɔ, kakɔna kotoyosala l’okambi ɔsɔ na?. . . Nkumekanga akoke okambi ande kɛtshi. Ɔnkɔnɛ, nkumekanga akôkimwɛ. Nde akatɛ okambi ɔsɔ dia nde takandahombe futa nto kânga dikuta ɔtɔi l’atei w’ekenga wa falanga miliyɔ 60. Okambi ɔsɔ akahombe monga l’ɔngɛnɔngɛnɔ efula mɛtɛ!

Ko kakɔna kakasale okambi ɔsɔ oma lâsɔ na? Nde akatshu ndo akatɛnana l’okambi okina w’osekande waki la dibasa diande di’ekenga wa falanga lokama eto. Nde akakimɛ osekande lo wudi ndo akatatɛ mbôhina ata ate: ‘Futa dibasa diami di’ekenga a falanga lokama!’ Onde wɛ koka fɔnya di’onto koka sala dikambo dia ngasɔ djekoleko l’ɔkɔngɔ wa nkumekanga mbokimwɛ akuta efula wakandahombe futa?. . .

Mɛtɛ, okambi waki la dibasa di’ekenga wa falanga lokama aki kanga wola. Nde kokoka futa akuta asɔ wonya akɔ. Ɔnkɔnɛ, nde akakusama l’ekolo w’osekande ndo akɔ̂sɛngasɛnga ate: ‘Lam’alangayɛ, ombisha nshi efula kele kafute dibasa diayɛ.’ Onde pami kɛsɔ akasha osekande nshi efula?. . . Otoyosala na?. . .

Onto ɔsɔ komonga ɔlɔlɔ oko nkumekanga. Nde akayange di’akuta ande tomba paka wonya akɔ. Ndo lam’ele osekande okambi kokoka futa akuta ande, nde akawodje lo lokanu. Ekambi ekina wakɛnyi kɛnɛ tshɛ kakatombe ndo vɔ kɔngɛnangɛna dikambo sɔ. Vɔ wakoke okambi wakawadje lo lokanu kɛtshi. Ɔnkɔnɛ vɔ wakatshu ko wakatotɛ nkumekanga dikambo sɔ.

Nkumekanga kɔngɛnangɛna kɛnɛ kakete kɛsɔ kânga yema. Nde akomalɛ okambi wakatone dia kimwɛ osekande ɔsɔ efula. Ɔnkɔnɛ, nde akawete ndo akawotɛ ate: ‘Wɛ okambi wa kɔlɔ, shi lakakokimwɛ dibasa diakayɔshi le mi? Onde wɛ totoyokimwɛ osekayɛ?’

Okambi waki kokimwɛ osekande ɔsɔ akahombe kondja wetshelo oma le nkumekanga k’ɔlɔlɔ kɛsɔ. Koko nde kokondja wetshelo ɔsɔ. Ɔnkɔnɛ, nkumekanga akadje okambi ɔsɔ lo lokanu polo l’etena kakandahombe futa ekenga ande wa falanga miliyɔ 60. Lo mɛtɛ, lo lokanu nde kokoka pondjo kondja akuta wa ndjokawoya nkumekanga kɛsɔ. Ɔnkɔnɛ, nde akahombe tshikala lo lokanu polo lo nyɔi kande.

Lam’akashidiya Yeso kɔndɔla ɔkɔndɔ ɔsɔ, nde akatɛ ambeki ande ate: ‘Papa lele l’olongo ayonyosalɛ ngasɔ naka nyu hanyokimwɛ asekanyu kɔlɔ oma l’etema anyu.’​—⁠Mateu 18:​21-35.

Ondo wɛ amboka lâsɔ dia sho tshɛ tekɔ la dibasa dia woke le Nzambi. Lo mɛtɛ, lɔsɛnɔ lele laso ndja oma lende! Ɔnkɔnɛ, naka sho mbɛdika dibasa diele laso le Nzambi, kete diɔ ndeka nɛ diele l’anto akina oya le so woke. Kɛnɛ kahombawɔ tɔsɔmbɔlɛ ekɔ oko ekenga lokama wa falanga yakahombe okambi ɔmɔtshi sɔmbɔlɛ osekande. Koko kɛnɛ kahombaso sɔmbɔlɛ Nzambi l’ɔtɛ w’awui wa kɔlɔ wasalaso ekɔ oko ekenga wa falanga miliyɔ 60 wakahombe okambi ɔsɔ sɔmbɔlɛ owandji ande.

Nzambi ekɔ ɔlɔlɔ efula. Kânga takasale awui wa kɔlɔ, nde tokimwɛka. Nde hatona dia tofutsha lo mbɔsa nsɛnɔ yaso pondjo pondjo. Koko sho pombaka mbohɔka wetshelo ɔnɛ: Nzambi tokimwɛka paka naka sho kimwɛka anto watosalɛ kɔlɔ. Kema ɔsɔ ekɔ wetshelo w’ohomba efula?. . .

Ko naka onto ɔmɔtshi ambokosalɛ dikambo dimɔtshi dia kɔlɔ, koko ambokɔlɔmba edimanyielo, kakɔna kayoyosala na? Onde wɛ ayowokimwɛ?. . . Ayoyosala naka nde ambokosalɛ dikambo sɔ mbala efula?. . . Onde wɛ ayotetemala la mbokimwɛ?. . .

Naka sho mbalɔmba di’onto tokimwɛ, kete sho nangaka di’onto akɔ tokimwɛ, shi mɛtɛ?. . . Ɔnkɔnɛ sho pombaka kimwɛ onto akɔ woho akɔ wâmɛ. Sho hatohombe mbuta tsho dia tambokimwɛ onto koko sho pombaka mɛtɛ mbokimwɛ oma k’ɛse otema. Lam’asalaso dikambo sɔ, sho mɛnyaka dia sho nangaka mɛtɛ monga ambeki waki Ombetsha a Woke.

Dia shihodia ohomba wa kimwanɛka, tadia ndo Tukedi 19:11; Mateu 6:​14, 15; ndo Luka 17:​3, 4.

[Osato wa lo lɛkɛ 77]

Kakɔna kakalange Petero mbeya lo kɛnɛ kendana la kimwanɛka?

[Osato wa lo lɛkɛ 78]

Kakɔna kakete lam’akalɔmbɛ okambi nkumekanga kande dia nde nyomowosha nshi efula dia nde mbeya futa dibasa diande?

Ngande wakasalɛ okambi akɔ osekande okambi laki kokoka futa dibasa diande?

[Osato wa lo lɛkɛ 80]

Kakɔna kakasalɛ nkumekanga okambi waki kokimwɛ osekande na?

[Osato wa lo lɛkɛ 81]

Ayoyosala naka onto ɔmɔtshi ambokɔlɔmba dia mbokimwɛ?