TSHAPITA 16

Kakɔna Kele Mɛtɛ Ohomba?

LUSHI lɔmɔtshi, pami kɛmɔtshi akaye dia ndjɛnana la Yeso. Nde akeyaka dia Yeso aki la lomba efula, ɔnkɔnɛ nde akawotɛ ate: ‘Ombetsha, ote ɔnalengo dia nde mbishami diangɔ dimɔtshi diele lande.’ Pami kɛsɔ akafɔnyaka di’ɔnango akahombe mbosha diangɔ dimɔtshi.

Otondonga wɛ mbaki Yeso, kakɔna kotoyowotɛ?. . . Yeso akɛnyi dia pami kɛsɔ aki l’okakatanu ɔmɔtshi. Koko okakatanu ɔsɔ komonga wa monga la kɛnɛ kaki l’ɔnango. Okakatanu waki la pami kɛsɔ ele nde kombeyaka kɛnɛ kaki mɛtɛ ohomba lo lɔsɛnɔ.

Ohɛsɔ tokane yimba lo dikambo sɔ. Kakɔna koleki ohomba le so? Onde monga l’ana wa pɔpi kana la diangɔ dikina di’amɛna dia kɛnyaka ladiɔ, monga l’ahɔndɔ w’eyoyo kana la diangɔ dikina dia woho ɔsɔ?. . . Kema, ekɔ ɛngɔ kɛmɔtshi koleki diangɔ sɔ ohomba. Ɔsɔ mbele wetshelo wakalange Yeso mbetsha. Ɔnkɔnɛ, nde akakɔndɔla ɔkɔndɔ wendana la pami kɛmɔtshi kakatone dia kambɛ Nzambi. Onde wɛ nangaka mboka ɔkɔndɔ ɔsɔ?. . .

Pami kɛsɔ aki l’ɔngɔnyi efula. Nde aki la dikambɔ ndo la mvudu ya weke y’ombawɔ diangɔ dia ndɛ. Diangɔ diakandonɛ diakatombe ndo diakole dimɛna efula. Nde komonga nto la dihole lo mvudu yande dia momba diangɔ tshɛ diakandane oma lo dikambɔ diande. Lâsɔ, akandahombe sala na? Nde akate ate: ‘Layohandjola mvudu yami yombami diangɔ ko dimi mbika mvudu kina yoleki weke. Oma lâsɔ, dimi layomba diangɔ diami tshɛ di’oma lo dikambɔ ndo diangɔ diami tshɛ di’amɛna lo mvudu y’eyoyo shɔ.’

Pami k’ɔngɔnyi kɛsɔ akafɔnyaka dia ɔsɔ aki dikambo dia lomba efula diakandahombe sala. Nde akafɔnyaka dia nde aki la lomba efula lo woho wakandombe diangɔ efula. Nde akate ate: ‘Dimi lamomba diangɔ efula di’amɛna. Diɔ diayokimanyiya ɛnɔnyi efula. Kakianɛ lambokoka mumuya yema. Dimi layɔlɛ, layɔnɔ, ndo layoyangɛnyangɛnya.’ Koko pami k’ɔngɔnyi kɛsɔ aki la dikambo dimɔtshi dia kɔlɔ lo yimba yande. Onde wɛ mbeyaka dikambo diakɔ?. . . Nde akakanyiyaka paka dikambo diande ndo di’ɔngɛnɔngɛnɔ ande hita. Nde akohɛ Nzambi.

Ɔnkɔnɛ Nzambi akatɛ pami k’ɔngɔnyi kɛsɔ ate: ‘Enda wɛ pami k’enginya kɛnɛ. Wɛ ayovɔ l’otsho w’ɛlɔ. Kakianɛ onto akɔna ayɔsa diangɔ diombayɛ nɛ na?’ Onde pami k’ɔngɔnyi kɛsɔ akakoke ndjokamba la diangɔ sɔ l’ɔkɔngɔ wa nyɔi kande?. . . Kema, onto okina mbayoyɔsa diangɔ diakɔ. Yeso akate ate: ‘Kɛsɔ mbayokomɛ onto layaombela diangɔ dikambo diande ndamɛ koko bu ɔngɔnyi le Nzambi.’​—⁠Luka 12:​13-21.

Shi wɛ halange monga oko pami k’ɔngɔnyi kɛsɔ?. . . Oyango wa woke waki lande lo lɔsɛnɔ aki wa kondja diangɔ dia l’emunyi efula. Ɔsɔ aki oyango wa kɔlɔ. Nde akalangaka nshi tshɛ monga la diangɔ efula. Koko nde komonga ‘ɔngɔnyi le Nzambi.’

Anto efula wekɔ oko pami k’ɔngɔnyi kɛsɔ. Vɔ nangaka nshi tshɛ monga la diangɔ efula. Koko dui sɔ koka tondja ekakatanu wa weke. Ɛnyɛlɔ, shi wɛ ekɔ la diangɔ dia kɛnyayɛ ladiɔ?. . . Diangɔ diakɔna dia tɔkɛnyɔ diele layɛ? Ohombutɛdiɔ. . . Ayoyosala naka osekayɛ ɔmɔtshi ekɔ la ponde kana l’ɔna la pɔpi kana l’ɛngɔ kekina ka kɛnyɔ keyɛ bu latɔ na? Onde ayonga dimɛna wɛ mbutɛ ambutshi ayɛ dia paka vɔ kosombɛ ɛngɔ kakɔ ndo wɛ?. . .

Ondo ekɔ tena dimɔtshi diɛnama dia ɛngɔ ka tɔkɛnyɔ kekɔ ohomba efula. Ko kakɔna kayokomaka l’ɔkɔngɔ wa tshanda mɔtshi na?. . . Tɔ komaka omusu. Tɔ koka ndana ko wɛ monga hayɔngɛnangɛna kɛnya latɔ nto. Lo mɛtɛ, wɛ ekɔ l’ɛngɔ kɛmɔtshi koleki diangɔ dia tɔkɛnyɔ ohomba. Onde wɛ mbeyaka ɛngɔ kakɔ?. . .

Ɛngɔ kakɔ ko lɔsɛnɔ layɛ. Lɔsɛnɔ layɛ lekɔ ohomba efula nɛ dia otondonga wɛ bu lalɔ, tshike ndoko kakokayɛ sala. Koko lɔsɛnɔ layɛ nemanɛka la sala kɛnɛ kangɛnyangɛnya Nzambi, shi mɛtɛ?. . . Lâsɔ tatongake oko pami k’enginya kaki l’ɔngɔnyi kakohɛ Nzambi.

Aha ana ato mbakoka sala awui w’enginya oko pami k’ɔngɔnyi kɛsɔ. Ndo efula k’epalanga mbasala ngasɔ. Amɔtshi l’atei awɔ nangaka nshi tshɛ monga la diangɔ efula lâdiko wa nɛ diele lawɔ. Vɔ koka monga la diangɔ dia ndɛ, ahɔndɔ wa ndɔta ndo dihole dia mbidjasɛ diele lawɔ ohomba. Koko vɔ nangaka diangɔ dikina efula. Vɔ nangaka monga l’ahɔndɔ efula. Ndo vɔ nangaka monga la mvudu ya weke efula. Diangɔ sɔ nɔmbaka akuta efula. Ɔnkɔnɛ, vɔ kambaka la wolo dia kondja falanga efula. Ndo lam’akondjawɔ falanga efula, vɔ nangaka nyomonga la kina nto efula.

Epalanga ɛmɔtshi kambaka efula amboleka dia kondja falanga woho ɔnɛ wele wohombaka ndo etena ka monga kâmɛ la nkumbo yawɔ. Ndo vɔ bu l’etena ka ndjasha l’awui waki Nzambi. Onde falanga yawɔ koka mbasha lɔsɛnɔ?. . . Ndooko. Onde vɔ koka kamba la falanga yawɔ l’ɔkɔngɔ wa nyɔi kawɔ?. . . Kema. Nɛ dia onto lambovɔ hakoke sala ndoko dikambo ɔtɔi.​—⁠Undaki 5:​5, 10.

Onde kɛsɔ nangaka mbuta dia ekɔ kɔlɔ monga l’akuta?. . . Kema. Akuta koka tokimanyiya dia somba diangɔ dia ndɛ ndo ahɔndɔ wa ndɔta. Bible mbutaka di’akuta kokɛka. (Undaki 7:12) Koko naka tekɔ la ngandji k’akuta, kete tayonga l’ekakatanu wa wolo. Tayonga oko pami k’ɔngɔnyi k’enginya kakayaombɛ diangɔ koko komonga ɔngɔnyi le Nzambi.

Monga ɔngɔnyi le Nzambi kɛdikɛdi na?. . . Kɛsɔ nembetshiyaka mbetsha Nzambi lo dihole dia ntondo lo nsɛnɔ yaso. Anto amɔtshi mbutaka dia vɔ wekɔ la mbetawɔ le Nzambi. Vɔ fɔnyaka dia monga tsho la mbetawɔ kete amboshila. Ko onde vɔ wekɔ mɛtɛ ɛngɔnyi le Nzambi?. . . Kema, vɔ wekɔ oko pami k’ɔngɔnyi kakohɛ Nzambi.

Yeso kombohɛ She lele l’olongo ndoko lushi. Nde komona dia monga l’akuta efula. Ndo nde komonga la diangɔ efula dia l’emunyi. Yeso akeyaka kɛnɛ kaki mɛtɛ ohomba lo lɔsɛnɔ. Onde wɛ mbeyaka kɛnɛ kaki ohomba efula kɛsɔ?. . . Kɛnɛ kaki ohomba efula kɛsɔ aki monga ɔngɔnyi le Nzambi.

Ohombutɛ, ngande wakokaso monga ɔngɔnyi le Nzambi?. . . Sho koka monga ɔngɔnyi le Nzambi lo salaka kɛnɛ kɔ̂ngɛnyangɛnya. Yeso akate ate: “Dimi latutshaka akambu watôngenyangenyaka nshi tshe.” (Joani 8:29) Nzambi ngɛnangɛnaka lam’asalaso awui walangande dia sho sala. Ohombutɛ kakianɛ, awui akɔna wakokayɛ sala dia ngɛnyangɛnya Nzambi?. . . Eelo, wɛ koka mbadia Bible, ntshɔ lo nsanganya y’Akristo, nɔmba Nzambi, ndo kimanyiya anto akina dia vɔ mbeya awui wendana la nde. Ɔsɔ ekɔ mɛtɛ awui woleki ohomba lo lɔsɛnɔ.

Lam’ele Yeso aki ɔngɔnyi le Jehowa, Jehowa akokokɛ. Nde akasha Yeso difuto dia nsɛna pondjo pondjo. Naka sho monga oko Yeso, kete Jehowa ayotoka ngandji ndo ayotokokɛ sho lawɔ. Nyɛsɔ tonge oko Yeso ndo tatongake pondjo oko pami k’ɔngɔnyi kakohɛ Nzambi.

Avɛsa amɔtshi wa lo Bible wɛnya woho wa monga la kanyi ya dimɛna lo dikambo dia diangɔ dia l’emunyi vɔ anɛ: Tukedi  23:4; 28:20; 1 Timote 6:​6-10; ndo Heberu 13:⁠5.

[Osato wa lo lɛkɛ 87]

Okakatanu akɔna waki la pami kɛnɛ?

[Osato wa lo lɛkɛ 88]

Kakɔna kakanyiya pami k’ɔngɔnyi kɛnɛ?

[Osato wa lo lɛkɛ 89]

Kakɔna kele layɛ koleki diangɔ dia tɔkɛnyɔ nɛmɔ?

[Esato wa lo lɛkɛ 91]

Kakɔna kasala ɔn’ɔnɛ kele mɛtɛ ohomba?