TSHAPITA 22

Sho Hatohombe Mbuta Kashi

OHƆSA di’ɔna womoto ɔmɔtshi ambotɛ nyango ate: “Dimi layokawola la ngelo kam’atombaso oma lo kalasa.” Koko l’ɔkɔngɔ wa kalasa, nde ambotshikala dia kɛnya l’asekande koko nde amboyotɛ nyango ate: “Ombetsha ami mbakambute dia dimi tshikala l’ɔkɔngɔ wa kalasa.” Onde ekɔ dimɛna mbuta dui dia ngasɔ?. . .

Kana ohɔsa di’ɔna pami ɔmɔtshi ambotɛ she ate: “Dimi hamboki ponde l’etei ka luudu.” Ko ayotota naka nde mɛtɛ akoki ponde? Kema ekɔ kɔlɔ mbuta ɔnɛ nde hoki?. . .

Ombetsha a Woke akatɛnya dikambo dia dimɛna dia sala. Nde akate ate: ‘Eelo kayɛ kayale Eelo, ndo Kema kayɛ kayale Kema; nɛ dia dui dikina tshɛ diahema lâdiko ndja oma le kanga kɔlɔ.’ (Mateu 5:37) Yeso akandalange mbuta lâsɔ na?. . . Nde akalange mbuta dia sho pombaka sala kɛnɛ kataso.

Ɔkɔndɔ ɔmɔtshi wa lo Bible mɛnyaka ohomba wa mbutaka mɛtɛ. Ɔkɔndɔ akɔ mendanaka l’anto ahende wakayataka ɔnɛ ambeki waki Yeso mbewɔ. Tende kɛnɛ kakete.

Ngɔndɔ oko ɔtɔi la yema l’ɔkɔngɔ wa nyɔi ka Yeso, anto efula w’oma l’ahole w’etale wakaye la Jerusalɛma dia ndjosala fɛtɛ kɛmɔtshi k’ase Juda k’ohomba efula kakawetaka Pɛntɛkɔsta. Ɔpɔstɔlɔ Petero akasha sawo dia diambo efula diakandatɛ anto awui wendana la Yeso. Nzambi akolola Yeso oma lo nyɔi. Ɔsɔ mbaki mbala ka ntondo kakoke anto efula wakaye la Jerusalɛma awui wendana la Yeso. Anto asɔ wakalange nyomoleka mbeya awui efula. Akawasale na?

Vɔ kosangoya dia tshikala edja, koko wakayotshikalaka edja. Ɔnkɔnɛ, l’ɔkɔngɔ wa nshi mɔtshi, anto amɔtshi l’atei awɔ komonga nto l’akuta ndo waki l’ohomba w’ekimanyielo woho wa vɔ somba diangɔ dia ndɛ. Ambeki wa la Jerusalɛma wakalange dia kimanyiya angɛndangɛnda asɔ. Ɔnkɔnɛ, efula l’atei awɔ wakasondja diangɔ diawɔ ndo wakela akuta oya le apɔstɔlɔ waki Yeso. Ɔnkɔnɛ, apɔstɔlɔ wakashaka wanɛ waki l’ohomba akuta.

Ananiya nde la Safira ka wadɛnde, wanɛ waki ase etshumanelo k’Akristo ka la Jerusalɛma wakasondja ekambɔ kawɔ kɛmɔtshi. Ndoko onto lakawatɛ dia vɔ kisondja. Vɔamɛ mbakɔshi yɛdikɔ shɔ. Koko vɔ kosala dui sɔ l’ɔtɛ wa ngandji kakawokaka ambeki waki Yeso w’eyoyo. Ananiya la Safira wakalange mɛtɛ di’anto fɔnya dia vɔ wekɔ anto w’ɛlɔlɔ efula ko tete le bu. Ɔnkɔnɛ, vɔ wakɔshi yɛdikɔ ya tota dia wayanga kimɔ akuta tshɛ wosondjishawɔ ekambɔ kɛsɔ dia kimanyiya anto akina. Ko tete le waki la kanyi ya kimɔ paka etenyi kɛmɔtshi k’akuta keto ko vɔ mbuta ɔnɛ wambokimɔ akuta akɔ tshɛ. Akanyiyayɛ lo dikambo sɔ?. . .

Oma lâsɔ Ananiya akaye dia ndjɛnana l’apɔstɔlɔ. Nde akawasha akuta akɔ. Koko Nzambi akeyaka mɛtɛ dia nde hakimwe akuta tshɛ. Ɔnkɔnɛ, Nzambi akewoya ɔpɔstɔlɔ Petero di’Ananiya ambota kashi lo dikambo di’akuta.

Oma lâsɔ Petero akate ate: ‘Ananiya, lande na ketawɔyɛ dia Satana kotshutshuya dia sala dikambo nɛ? Ekambɔ kayɛ mbakitɔ. Vɔ kokotshutshuya dia kisondja. Ndo kânga l’ɔkɔngɔ wa wɛ sondja ekambɔ kakɔ, wɛ akakoke mbɔsa yɛdikɔ wɛmɛ lo kɛnɛ kendana la kɛnɛ kayoyosala l’akuta akɔ. Lande na kasɛmayɛ ɔnɛ akuta tshɛ mbokimweyɛ etena kɛnɛ kele wɛ akakimwe paka etenyi keto na? Ɔnkɔnɛ, eya di’aha sho ato mbatɛyɛ kashi koko ndo Nzambi.’

Ɔsɔ komonga dui dia tshitshɛ. Ananiya akate kashi! Aha kɛnɛ kakandataka kengo mbakandasale. Nde akasɛmaka tsho dia nde ekɔ lo kisala. Bible totɛka kɛnɛ kakayeta l’ɔkɔngɔ. Tɔ mbutaka ɔnɛ: ‘Lam’akandoke ɛtɛkɛta waki Petero, Ananiya akakɔ ndo akavu.’ Nzambi akadiake Ananiya! Oma lâsɔ, wakɛmbɛ odo ande otsha l’andja ndo wakatokundɛ.

Wenya oko esato oma lâsɔ, Safira akaye. Nde kombeya kɛnɛ kakakomɛ omɛnde. Ɔnkɔnɛ, Petero akawombola ate: ‘Onde nyakasondja ekambɔ l’oshinga w’akuta wakanyatosha anɛ?’

Safira akakadimola ate: ‘Eelo, l’oshinga ongo mbakatasondja ekambɔ kakɔ.’ Koko ɔsɔ aki kashi! Vɔ wakatshike akuta amɔtshi w’oma lo wanɛ wakawasondja ekambɔ dikambo diawɔ vɔamɛ. Ɔnkɔnɛ, Nzambi akadiake ndo Safira.​—⁠Etsha 5:​1-11.

Wetshelo akɔna wahombaso kondja oma lo kɛnɛ kakakomɛ Ananiya nde la Safira na?. . . Dui sɔ tetshaka dia Nzambi halange mbuta kashi. Nde nangaka dia sho mbutaka mɛtɛ nshi tshɛ. Koko anto efula mbutaka di’ekɔ dimɛna mbuta kashi. Onde wɛ fɔnyaka dia kɛnɛ kata anto kɛsɔ kekɔ mɛtɛ?. . . Onde wɛ mbeyaka dia kashi mbele l’ɔtɛ wa hemɔ ndo pâ tshɛ yɛna anto lanɛ la nkɛtɛ mbidja ndo nyɔi?. . .

Ohɔ dia Diabolo akatɛ Eva womoto la ntondo kashi. Diabolo akatɛ Eva ɔnɛ nde hatovɔ naka nde tona dia kitanyiya dui diaki Nzambi ndo ndɛ olowa wakoshimbe Nzambi di’aha ndɛ. Eva aketawɔ kɛnɛ kakawotɛ Diabolo ndo akale olowa akɔ. Nde akatshutshuya Adama dia nde lawɔ ndɛ. Etena kɛsɔ mbakawakome atshi wa pɛkato ndo ana awɔ tshɛ wakahombe mbotɔ atshiwa wa pɛkato. Lam’ele vɔ wekɔ atshi wa pɛkato, ana waki Adama tshɛ mɛnaka pâ, sowaka ndo mvɔka. Ngande wakatatɛ asui ndo ekakatanu ɛsɔ tshɛ na?. . . Akambo asɔ wakatatɛ oma lo kashi.

Diakɔ diakate Yeso dia Diabolo ‘ekɔ kanga kashi ndo she kashi’! Nde mbaki onto la ntondo lakate kashi. Lam’ata onto kashi, nde salaka kɛnɛ kakasale Diabolo ntondo. Sho pombaka kanyiya dikambo sɔ lam’ahembamaso dia mbuta kashi.​—⁠Joani 8:⁠44.

Etena kakɔna kɛnayɛ ɔnɛ wɛ koka pembama dia mbuta kashi?. . . Shi ekɔ lam’asalayɛ dui dimɔtshi dia kɔlɔ?. . . Eya dia wɛ koka ndanya ɛngɔ kɛmɔtshi aha la lolango layɛ. Ko lam’ayowokombola ɔnɛ akalanyisha ɛngɔ kɛnɛ, onde wɛ ayohomba mamiya onanyɔ kana kadiyɛ? Kana onde wɛ ayota wate haleye woho wakalanyi ɛngɔ kakɔ?. . .

Ko ayoyosala naka wɛ akahumbi sala dɛvɔarɛ diayɛ koko wɛ hamanyi la disala na? Onde wɛ ayohomba mbuta ɔnɛ wɛ akashidiyisha la disala oyadi wɛ hadishidiyisha?. . . Sho la dia mbohɔka Ananiya nde la Safira. Vɔ kombuta kɛnɛ kaki tshɛ mɛtɛ. Ndo Nzambi akɛnya dia vɔ waki atshi wa kɔlɔ ndo akâdiake.

Ɔnkɔnɛ, oyadi kɛnɛ tshɛ kakokaso sala, tɔ kayonga l’etombelo wa kɔlɔ efula naka sho mbuta kashi lo dikambo diakɔ ndo hatohombe mbuta awui wele bu tshɛ mɛtɛ. Bible mbutaka ɔnɛ: “Nyutaneli akambu wa mete.” Tɔ mbutaka nto ɔnɛ: “Tanyutaki kashi.” Jehowa mbutaka nshi tshɛ mɛtɛ ndo nde nongamɛka dia sho salaka woho akɔ wâmɛ.​—⁠Efeso 4:25; Kolosai 3:⁠9.

Sho la dia mbutaka nshi tshɛ mɛtɛ. Kɛsɔ mbatama lo Etumbelu 20:16; Tukedi 6:​16-19; 12:19; 14:5; 16:6; ndo Heberu 4:⁠13.

[Osato wa lo lɛkɛ 117]

Naa kɔlɔ kosadi ɔna pami ɔnɛ?

[Osato wa lo lɛkɛ 118]

Kashi kakɔna kakatɛka Ananiya Petero lanɛ?

[Osato wa lo lɛkɛ 119]

Kakɔna kakakomɛ Ananiya l’ɔtɛ wa kashi kande?

[Osato wa lo lɛkɛ 120]

Onto akɔna lakate Yeso ɔnɛ nde mbakate kashi ka ntondo ndo etombelo akɔna wakonge?

[Osato wa lo lɛkɛ 121]

Etena kakɔna kakokayɛ pembama dia mbuta kashi?