Andja w’oyoyo wakalake Nzambi
BIBLE, Ɔtɛkɛta wa Nzambi wakafundama, toshaka elongamelo lam’atatɔ ɔnɛ: “Keli ne dia daka diandi, mbalungamelasu ulungu w’uyuyu la kete y’uyuyu, lene udjashi akambu w’ololo.”—2 Petero 3:13.
Elɛwɔ “ulungu w’uyuyu”? Bible kakatanyaka olongo la ɛlɔmbwɛlɔ. (Etsha 7:49) “Ulungu w’uyuyu” ekɔ lowandji l’oyoyo layolɛ lâdiko dia nkɛtɛ. Lɔ lekɔ oyoyo nɛ dia lɔ mbayɔhɛna mandji yolɛ nshi nyɛ; ɔsɔ ekɔ nto nna di’oyoyo l’ekotshamelo ka sangwelo diaki Nzambi. Ɔsɔ mbele Diolelo diakatetsha Yeso dia nɔmbaka. (Mateu 6:10) Lam’ele Nzambi mbele Kiɔkɔ ya lowandji lɔsɔ ndo nde mbidjasɛ l’olongo, lɔ mbelamɛka ɔnɛ “diulelu dia l’ulungu.”—Mateu 7:21.
Elɛwɔ “kete y’uyuyu”? Ɔsɔ kema okama wa nkɛtɛ w’oyoyo, nɛ dia Bible mbutaka hwe di’anto wayodjasɛka la nkɛtɛ kɛnɛ pondjo pondjo. “Kete y’uyuyu” ekɔ tshunda di’anto di’oyoyo. Tɔ kayonga oyoyo nɛ di’anto wa kɔlɔ wayonyɛma. (Tukedi 2:21, 22) Anto tshɛ wayɔsɛna lɔkɔ wayɔlɛmiya ndo wayokitanyiya Otungi ndo wayɔtɔngɔnyiya nsɛnɔ yawɔ l’akambo walɔmbande. (Osambu 22:27) Anto wa lo wedja tshɛ wekɔ lo nɔmbama dia mbeka akambo walɔmbande asɔ ndo mbɔtɔnganyiya nsɛnɔ yawɔ l’akambo akɔ oma ko kakianɛ. Onde wɛ ekɔ lo sala dui sɔ?
L’andja w’oyoyo waki Nzambi, onto tshɛ ayɔlɛmiya ɛlɔmbwɛlɔ Kande. Onde ngandji kokayɛ Nzambi kotshutshuyaka dia mbokitanyiya? (1 Joani 5:3) Onde dui sɔ mɛnamaka lo nkumbo kayɛ? l’olimu kana la kalasa? ndo lo yoho yakambayɛ la lɔsɛnɔ layɛ?
L’andja w’oyoyo, anto wayonga kâmɛ lo ɔtɛmwɛlɔ wa Nzambi ɔtɔi ka mɛtɛ. Onde wɛ tɛmɔlaka Otungi w’olongo la nkɛtɛ? Onde ɔtɛmwɛlɔ ayɛ salaka dia mɛtɛ wɛ monga kâmɛ l’atɛmɔdi wa wanyayɛ wa lo wedja tshɛ, waoho tshɛ ndo ɛtɛkɛta tshɛ?—Osambu 86:9, 10; Isaya 2:2-4; Zefaniya 3:9.
[Kiombo ya lo lɛkɛ 17]
Nzambi kɛnɛ kalaka akambo asɔ
Nde ekɔ Otungi w’olongo wɛnama ndo wa nkɛtɛ. Nde mbakelamɛ oma le Yeso Kristo ɔnɛ: ‘Nzambi ɔtɔi ka mɛtɛ.’—Joani 17:3.
Efula k’anto nɛmiyaka tozambizambi tɔsɛdiwɔ vɔamɛ. Miliyɔ y’anto nkusamɛka dikishi di’aha la lɔsɛnɔ. Akina tombolaka atshunda w’anto, lomombo la l’emunyi, wetshelo w’anyanya w’anto kana nsaki yawɔ hita. Aha wanɛ tshɛ wakamba la Bible mbalɛnya lokombo laki ɔnɛ lele Bible mbêlɛka ɔnɛ: ‘Nzambi ka mɛtɛ.’—Euhwelu k’Elembe 4:35.
Otungi mbutaka lo dikambo diande ndamɛ ɔnɛ: “Dimi mbele Jehowa. Ɔsɔ mbele lokombo lami.” (Isaya 42:5, 8, NW) Lokombo lɔsɔ tanemaka ndekana mbala 7 000 lo Bible l’ɛtɛkɛta wakatafundama ntondo. Yeso Kristo aketsha ambeki ande dia nɔmbaka ɔnɛ: “Shɛso lele l’olongo, lokombo layɛ lakidiame.”—Mateo 6:9, NW.
Woho akɔna w’onto wele Nzambi ka mɛtɛ? Nde mbutaka lo dikambo diande ndamɛ dia nde ekɔ kanga “ketshi ndu [kanga] ngandji ka mamba, lahuki kele esadi, luludi too la ngandji ka shikaa [ndo la akambo wa mɛtɛ]” ndo onto latoshaka wanɛ wɔnyɔla ɛlɛmbɛ ande l’okonda dilanya. (Etumbelu 34:6, 7) Ɔkɔndɔ wendana la ditshelo diande otsha le anto shikikɛka mɛtɛ k’ɛtɛkɛta ɛsɔ.
Lokombo lɔsɔ ndo kanga lɔ pombaka kidiama, mbut’ate mbɔsama oko ekila. Oko wende Otungi ndo Omboledi w’Andja w’Otondo, nde mbasungana sho kitanyiya ndo tɛmɔla. Onde wɛ mbokitanyiyaka ndo mbɔtɛmɔlaka?
[Kiombo/Osato wa lo lɛkɛ 18]
Etshikitanu akɔna wayela “Ulungu w’Uyuyu la Kete y’Uyuyu”?
Nkɛtɛ kambokadimɔ Paradiso Luka 23:43
Tshunda dia l’andja w’otondo Joani 13:35;
diele anto wa lo wedja tshɛ, Enyelo 7:9, 10
waoho tshɛ ndo ɛtɛkɛta tshɛ
waya kâmɛ lo ngandji
Olimu w’ɔlɔlɔ ndo mbo Isaya 25:6;
ya ndɛ tshavutshavu Isaya 65:17, 21-23
Hemɔ, shɔkɔ ndo Isaya 25:8;
nyɔi aya bu Enyelo 21:1, 4
[Kiombo/Esato wa lo lɛkɛ 19]
Onde wɛ ayokondja wahɔ?
Nzambi hakoke mbuta kashi!—Tito 1:2.
Jehowa mbutaka ate: “Diui diatutumbaka uma l’unyo ami . . . hadiutukalulaka le mi ukalulakalula. Keli dio diatutshaka lulangu lami ndu diatushidiyaka kene kakamasanguya.”—Isaya 55:11.
Jehowa ekɔ lo tonga “ulungu w’uyuyu la kete y’uyuyu.” Lowandji la l’olongo lamboshilaka tatɛ kamba olimu. Etshina ka “kete y’uyuyu” kamboshilaka la kengama.
L’ɔkɔngɔ wa diɔ mbuta akambo amɔtshi wa diambo wayela “ulungu w’uyuyu la kete y’uyuyu” anto, dibuku di’Enyelo mbutaka awui wata Nzambi, Nkum’Olongo ndamɛ ate: ‘Enda! Dimi leetɛ diangɔ tshɛ eyoyo.’ Nde mbutaka nto ate: ‘Ofunde, nɛ di’ɛtɛkɛta ɛnɛ wekɔ kɔlamelo ndo mɛtɛ.’—Enyelo 21:1, 5.
Wombola w’ohomba wambɔma v’ɔnɛ: Onde tekɔ lo sala etshikitanu wahombama dia sho sungana monga l’ɔnɔngɔ w’anto wayokenga “kete y’uyuyu” kayɔlɔmbwama oma le “ulungu w’uyuyu”?