OKOTSHA

Ngande wahombaso mbɔsa onto lambotshanyema oma l’etshumanelo?

Mongaka kandji efula etena katshanyema ose nkumbo kana ɔngɛnyi aso ɔmɔtshi oma l’etshumanelo l’ɔtɛ wakandasale pɛkato ko hayatshumoya. Woho wasalaso la ntondo k’ɛlɔmbwɛlɔ kalongolaso oma lo Bible kokaka mɛnya yɛdikɔ ya ngandji kokaso Nzambi ndo kɔlamelo yele la so lo dikambo sɔ.a Tɔsɛdingole ambola amɔtshi wonyiyama lo dikambo sɔ.

Ngande wahombaso mbɔsa onto lambotshanyema oma l’etshumanelo? Bible mbutaka ɔnɛ: “Tanyosohanaki la unyanyu, naka ndi eko umunanyi, kuyanga kanga okomiya, kuyanga otemodi a dikishi, kuyanga otenganyi, kuyanga umbidjoki a wanu, kuyanga opotwanyi tanyolekaki l’untu oso.” (1 Koreto 5:11) Lo kɛnɛ kendana la onto tshɛ “lahatshikala lu wetshelu wa Kristu,” Bible mbutaka ɔnɛ: “Tanyûlungulaki lu luudu, tanyuwemulaki, ne dia untu tshe latuwemulaka eko umbekesanedi andi lu etsha andi wa kolo.” (2 Joani 9-11) Hatohombe sawola la anto wambotshanyema oma l’etshumanelo akambo wa lo nyuma kana mbɔtɔ lɔngɛnyi la wɔ. Tshoto y’Etangelo ya Ngɔndɔ ka dikumi l’ahende 15, 1981, lɛkɛ 23, ya lo Falase mbutaka ɔnɛ: “Mbisha onto ‘Mɔyɔ’ kokaka monga nna dia ntondo diakonya onto lo sawo ndo otsha lo lɔngɛnyi. Onde sho kombolaka takola nna dia ntondo sɔ otsha le onto lambotshanyema oma l’etshumanelo?”

Onde ekɔ mɛtɛ ohomba dia pembola la nde losambi? Eelo, l’ɔtɛ w’ɛkɔkɔ efula. Ntondotondo, dui sɔ mɛnyaka kɔlamelo yaso otsha le Nzambi ndo l’Ɔtɛkɛta ande. Sho hatokitanyiya Jehowa paka l’etena kele dikambo sɔ wɔdu koko sho salaka dui sɔ kânga l’etena kediɔ wolo le so. Ngandji kokaso Nzambi totshutshuyaka dia sho kitanyiya wadjango ande tshɛ, teya dia nde ekɔ la losembwe ndo nde tolangaka ndo ɔnɛ ɛlɛmbɛ ande wekɔ dia wahɔ aso woleki. (Isaya 48:17; 1 Joani 5:3) Dui dia hende, lo mangana l’otshi wa pɛkato wahayatshumoya sho ndjakokɛka shoamɛ ndo kokɛka ase etshumanelo akina diaha vɔ mbɔtɔ mindo lo nyuma ndo lo lɔkɛwɔ ndo dia etshumanelo monga la lokumu l’ɔlɔlɔ. (1 Koreto 5:6, 7) Dui dia sato, woho wasukɛso atɔndɔ wa lo Bible la wolo tshɛ mbeyaka monga la wahɔ le onto lambotshanyema. Lo sukɛ yɛdikɔ yakɔshi kɔmite ka kilombo, sho mbeyaka munanda otema w’otshi wa pɛkato wele polo ndo lo etena kɛsɔ atasale otshikitanu kânga mbadja dikumanyi welo dia mbokimanyiya. Woho wayondoshisha diɔtɔnganelo dia nɛmɔ efula diasande la wakinde wa ngandji mbeyaka mbokimanyiya dia nde ‘kana yimba,’ mɛna woke woke wa kɔlɔ kosadinde ndo takola wanya wahombama dia nde kalolɛ Jehowa.​Luka 15:17.

Ko kayotota naka owotɔ aso ɔmɔtshi mbambotshanyema oma l’etshumanelo? L’etena kɛsɔ, diɔtɔnganelo diele lam’asaso la ose nkumbo ɔsɔ mbeyaka mbidja kɔlamelo yaso l’ohemba wa wolo. Ngande wahombaso mbɔsa ose nkumbo lambotshanyema oma l’etshumanelo? Lanɛ, hatotɔtɛkɛta akambo tshɛ wakoka tomba, koko tayɔtɛkɛta akambo ahende wa weke.

Dui dia ntondo mendanaka la ose nkumbo lambotshanyema ladjasɛ la so lo luudu ɔtɔi. Lam’ele wotshanyemelo hahembola diwotɔ, awui wasalema la ngelo lushi la lushi wayotetemala salema woho wokowosalemaka. Koko, oma lo lɔkɛwɔ lande, nde akasɔnɛ dia pembola diɔtɔnganelo dia lo nyuma diasande l’ase nkumbo akina wele ambetawudi. Ɔnkɔnɛ, ase nkumbo akina wele la kɔlamelo hawotetemala monga la diɔtɔnganelo la nde l’akambo wa lo nyuma. Ɛnyɛlɔ, onto lambotshanyema hahombe monga wonya wasalema wekelo wa lo nkumbo. Koko, naka onto lambotshanyema eke ɔna dikɛnda, kete ambutshi ande wekekɔ l’ɔkɛndɛ wa mbêtsha ndo mbongola. Etena kɛsɔ, ambutshi ande wele la ngandji mbeyaka mbɔsa yɛdikɔ ya mbekaka la nde Bible.b​—Tukedi 6:20-22; 29:17.

Dui dia hende mendanaka la ose nkumbo lambotshanyema lahadjashi la so luudu ɔtɔi. Kânga mbakokaso mbala mɔtshi sawola la nde awui amɔtshi w’ohomba wa lo nkumbo, asawo asɔ pombaka monga lo pai. Ase nkumbo wele la kɔlamelo hawoyange tɛkɛ nɛndɛ dia mbɔtɔnganɛ l’owotɔ awɔ ɔmɔtshi wambotshanyema wahadjashi la wɔ luudu ɔtɔi. Koko, kɔlamelo yele la wɔ otsha le Jehowa ndo otsha l’okongamelo ande mbatshutshuyaka dia vɔ sukɛ yɛdikɔ y’oma l’Afundelo yendana la wotshanyemelo. Woho wayowosala la wolo diaha ndeka ndjaɔtɔnganyiya l’otshi wa kɔlɔ mbeyaka mbokimanyiya dia nde kamba dimɛna la wongwelo wolongodinde.c​—Heberu 12:11.

[Nɔtɛ ya l’ɛse ka dikatshi]