AMBOLA W’OMA LE AMBADI

Onde ekɔ dimɛna di’ambutshi w’Akristo mbidjasɛ dihole ɔtɔi l’ɔnawɔ lambotshanyema wonya wa nsanganya?

Ndooko tɔndɔ dia lo Bible diɛnya dihole shikaa diahomba anto wambotshanyema oma l’etshumanelo mbidjasɛka lo Mbalasa ka Diolelo wonya wa nsanganya. Periodikɛ kɛnɛ kokɛnyaka ambutshi w’Akristo woho wakokawɔ nkimanyiya anawɔ weke la ngelo wambotshanyema oma l’etshumanelo lo nyuma naka ekɔ ohomba nsala dui sɔ. Oko wɛnyamidiɔ lo lɛkɛ 19 ndo 20 la Tshoto y’Etangelo ya Ngɔndɔ ka dikumi l’ɔtɔi 15, 1988 lo Falase, ambutshi kokaka mbeka Bible l’ɔnawɔ lambotshanyema leke dikɛnda laakatetemala mbidjasɛ kaamɛ la wɔ. Ondo dui sɔ diayokimanyiya ɔnɔsɔ dia nde ntshikitanya lɔkɛwɔ lande la kɔlɔ.a

Lo kɛnɛ kendana la dihole diahombawɔ mbidjasɛ lo Mbalasa ka Diolelo wonya wa nsanganya, ondo ayoleka dimɛna di’ana w’akɛnda wambotshanyema mbidjasɛ ki dihole ɔtɔi l’ambutshi awɔ. Oko wele ndooko tɔndɔ diɛnya ɔnɛ anto wambotshanyema pombaka todjasɛka l’ɔkɔngɔ, mbele ndooko tɔndɔ diashimba di’ana w’akɛnda wambotshanyema mbidjasɛ dihole ɔtɔi l’ambutshi awɔ, oyadi dihole diakɔna diayowodjasɛ. Lam’ele ambutshi wekɔ l’ɔkɛndɛ wa nkokɛ lonyuma l’anawɔ, vɔ kombolaka mɛtɛ ndjashikikɛ dia kana ɔnawɔ lambotshanyema ekɔ lo nkondja wahɔ oma lo nsanganya. Ɔnɔsɔ ayoleka kimanyiyama oma le ambutshi ande naka nde mbidjasɛka la wɔ dihole ɔtɔi, lo dihole dia nde tadjasɛka ahole akina.

Ko kayotota dikambo di’ɔna lambotshanyema oma l’etshumanelo lele aya bu la ngelo? Onde dui sɔ nembetshiyaka dia nde hahombe mbidjasɛ dihole ɔtɔi l’ambutshi ande lo nsanganya? Lo nshi yakete, periodikɛ kɛnɛ kakɛnya hwe dionga diahomba Okristo monga la diɔ otsha le ose nkumbo lambotshanyema lele aya bu la ngelo.b Koko mbetawɔ di’onto lambotshanyema mbidjasɛ ki suke l’ewotɔ ande wonya wa nsanganya ntshikitana etale la nyanga dia monga la nde la diɔtɔnganelo dia ma ma. Naka ase nkumbo weke la kɔlamelo le Jehowa monga l’ekanelo k’ɔlɔlɔ otsha le owotɔ awɔ wambotshanyema ndo nsala la wolo dia nkitanyiya tɔndɔ dia lo Bible dialɔmba Akristo diaha vɔ mbɔtɔnɛ la woho w’onto ɔsɔ, kete l’etena kɛsɔ vɔ ndooko l’ɔkɔkɔ wa ndjaɛndja onongo.​—1 Kɔr. 5:11, 13; 2 Jni. 11.

Ɔnkɔnɛ, oyadi onto lambotshanyema kondjasɛka suke l’ewotɔ ande kana suke l’anto akina wonya wa nsanganya, ase etshumanelo hawohombe ntɛkɛta kana mɛnya ɔnɛ dikambo diekɔ kɔlɔ. Mbidja dɛmbɛlɛmbɛ lo kɛnɛ kendana la dui sɔ koka ntondja ekakatanu efula l’etshumanelo. Naka ndo ase nkumbo, ndo ɔnɛ lambotshanyema oma l’etshumanelo nsala la wolo dia nkitanyiya atɔndɔ wa lo Bible wendana la wotshanyemelo, ndo naka hadiototakanya ase etshumanelo, kete dui sɔ hela ekakatanu wendana l’ahole wahomba anto wambotshanyema mbidjasɛ lo Mbalasa ka Diolelo wonya wa nsanganya.c