OKOTSHA

Etena kakɔna kahomba kadiyɛso ndɔta kitambala, ndo lande na?

Etena kakɔna ndo lande na kahomba Okristo wa womoto ndɔta kitambala etena kasalande awui wendana la ɔtɛmwɛlɔ? Nyɛsɔ tɔsɛdingole kɛnɛ kakafunde ɔpɔstɔlɔ Paulo lo dikambo sɔ l’ekimanyielo ka nyuma k’ekila. Nde akatosha ɛlɔmbwɛlɔ kahombama dia sho mbɔsa tɛdikɔ t’amɛna ndo tatombola Nzambi. Lo 1 Koreto 11:3-16, Paulo akate awui asato wa mbidja yimba: 1) awui wasalande walɔmba dia ndɔta kitambala, 2) ahole wahombande ndɔta kitambala ndo 3) eyango wayowotshutshuya dia nde kamba la ɔlɛmbɛ ɔsɔ.

Awui. Paulo shilaka awui ahende: dɔmbɛlɔ ndo mbewoya prɔfɛsiya. (Divɛsa 4, 5) Lo mɛtɛ, dɔmbɛlɔ ekɔ yoho mɔtshi ya tɛmɔla Jehowa lo sawola la nde. Ɛlɔ kɛnɛ, mbewoya prɔfɛsiya mendanaka la wetshelo tshɛ w’oma lo Bible wetsha Okristo wa mɛtɛ tshɛ. Ko onde Paulo akalange mbuta dia womoto pombaka ndɔta kitambala etena tshɛ kalɔmbande kana kasambishande akambo wa mɛtɛ wa lo Bible? Kema. Dihole dialɔmba womoto kana diasambishande mbɛnya dia kana nde kokaka ndɔta kitambala kana bu.

Ahole. Paulo akatɛkɛta di’ahole ahende: lo nkumbo kana l’etshumanelo. Nde akate ate: “Ote a umuntu eli pami . . . Umuntu tshe lalomba, kana lata diui l’ote andi hakumbami, ambonyola ote [ande].” (Divɛsa 3, 5) Lo nkumbo, Jehowa omi mbakandakitsha ɔtɛ wa womoto. Onyake paka nde kɛnyisha lo yoho ya dimɛna dia nde mbetawɔka lowandji l’omɛnde, nde ayɔnyɔla omɛnde naka nde kotsha ɛkɛndɛ wakasha Jehowa omɛnde. Ɛnyɛlɔ, naka ekɔ ohomba dia nde nɔmbɔla wekelo wa Bible etena kele omɛnde lawɔ, kete nde pombaka mbeya lowandji lele l’omɛnde lo ndɔta kitambala. Nde ayosala dikambo sɔ, oyadi omɛnde ambobatizama kana kema, nɛ dia nde mbele ɔtɛ wa nkumbo.a Naka nde pombaka nɔmba kana sambisha la ntondo k’ɔnande la pami leke dikɛnda lambobatizama, kete nde pombaka ndɔta kitambala aha l’ɔtɛ w’ɔnɛ ɔnande ekɔ owandji wa nkumbo, koko dia mɛnya dilɛmiɛlɔ lo lowandji lakasha Jehowa Akristo w’apami wambobatizama l’etshumanelo.

Paulo akatɛkɛta nto dikambo di’etshumanelo lo mbuta ate: “Naka untu ayudja tamu, shu kema la etshelu kekina; kuyanga ekelizia wa [Nzambi] kema la to.” (Divɛsa 16) L’etshumanelo k’Akristo, apami wambobatizama mbele l’ɔkɛndɛ wa nɔmbɔla. (1 Timote 2:11-14; Heberu 13:17) Paka apami mbasɔnama oko dikumanyi kana ekambi wakimanyiya ndo mbele l’ɔkɛndɛ wa nama ɛkɔkɔ waki Nzambi. (Etsha 20:28) Koko lo tena dimɔtshi, vɔ mbeyaka nɔmba Okristo ɔmɔtshi wa womoto dia kotsha ɔkɛndɛ ɔmɔtshi wahomba paka apami wambobatizama wele l’akoka kotsha. Ɛnyɛlɔ, nde mbeyaka nɔmbama dia nɔmbɔla losanganya l’otsha l’olimu w’esambishelo naka ɔnangɛso ɔmɔtshi lambobatizama ndo lele l’akoka bu. Kana nde mbeyaka nɔmbɔla wekelo wa Bible la ntondo k’ɔnangɛso ɔmɔtshi lambobatizama. Lam’ele awui asɔ mendanaka la ɔkɛndɛkɛndɛlɔ w’etshumanelo, nde ayɔlɔta kitambala dia mɛnya dia nde mbeyaka dia nde ekɔ lo kotsha ɔkɛndɛ ɔmɔtshi wakasha Nzambi apami.

Koko, ekɔ nto awui akina wendana l’ɔtɛmwɛlɔ wahalɔmbɛ dia paka kadiyɛso ndɔta kitambala. Ɛnyɛlɔ, nde hahombe sala dikambo sɔ l’etena kashande kɔmatɛrɛ lo nsanganya, etena kasambishande lo luudu la luudu kâmɛ l’omɛnde kana l’Okristo okina wa pami wambobatizama kana etena kekande ndo kalɔmbande l’anande wahatabatizama. Lo mɛtɛ, ambola akina mbeyaka monyiyama ndo naka kadiyɛso heye shikaa kɛnɛ kakokande sala, kete nde koka sala eyangelo ekina.b Naka l’ɔkɔngɔ wa nde sala eyangelo, nde heye dimɛna kɛnɛ kahombande sala ndo naka nkum’otema kande mbotɛka dia ndeka dimɛna nde ndɔta kitambala, kete ndoko kɔlɔ dia nde sala dikambo sɔ.

Eyango. Lo divɛsa dia 10, sho tanaka ɛkɔkɔ ehende watshutshuya Okristo wa womoto dia nde kitanyiya didjango sɔ: “Umuntu eko la dikambu dia ndjala la djimbitelu ya diulelu l’ote andi, lu dikambu di’andjelo.” Ntondotondo, tolembete etelo k’ɔnɛ “djimbitelu ya diulelu.” Ndɔta kitambala ekɔ yoho yɛnya womoto dia nde mbeyaka lowandji lakasha Jehowa apami wambobatizama l’etshumanelo. Omalɔkɔ, nde mɛnyaka ngandji ndo kɔlamelo yande otsha le Jehowa Nzambi. Ɔkɔkɔ wa hende tanemaka l’ɛtɛkɛta wata ɔnɛ “dikambu di’andjelo.” Shɛngiya yakɔna yele la woho walɔta womoto kitambala le ditongami dia wolo dia lo nyuma sɔ?

Andjelo mbidjaka yimba efula lo mɛna ditongami tshɛ dia l’okongamelo waki Jehowa oyadi etenyi ka l’olongo kana ka la nkɛtɛ dietawɔ lowandji laki Jehowa. Vɔ kondjaka nto wahɔ oma lo woho wakitanyiya anto wele bu kokele lowandji laki Jehowa. Vɔ lawɔ pombaka kitanyiya yɛdikɔ yaki Jehowa, dui diele efula ka l’atei awɔ kotondoya disala lo nshi y’edjedja. (Jude 6) Ɛlɔ kɛnɛ, andjelo kokaka mɛna woho wakoka Okristo ɔmɔtshi wa womoto lele l’akoka efula, lakɔtɔ kalasa efula ndo lele la yimba efula ndeka pami kɛmɔtshi kambobatizama ka l’etshumanelo, koko kadiyɛso kɛsɔ mongaka suke dia kitanyiya ɔnangɛso ɔsɔ. Lo tena dimɔtshi, womoto mbeyaka monga Okristo w’okitami wayotolɛ kâmɛ la Kristo. Womoto ɔsɔ ayotonga lo dihole dia lâdiko efula ndeka ndo andjelo ndo ayolɛ kâmɛ la Kristo l’olongo. Ande ɛnyɛlɔ ka dimɛna le andjelo wɛna akambo asɔ nshi nyɛ lee! Oma lo kɔlamelo yawɔ ndo woho wayakitshakitshawɔ, akadiyɛso tshɛ wekɔ mɛtɛ la diɛsɛ dia mɛnya okitanyiya wa l’okitshakitsha tshɛ lo washo wa miliyɔ y’andjelo wa kɔlamelo!

[Nɔtɛ ya l’ɛse ka dikatshi]