Ambola w’oma le ambadi

Onde kadiyɛso pombaka ndɔta kitambala etena kakadimolande sawo di’oma lo Bible oya l’ɔtɛkɛta w’akanga a mpoke lo nsanganya y’Akristo l’etshumanelo kana lo nsanganya ya weke?

Kadiyɛso nɔmbamaka dia ndɔta kitambala etena tshɛ kasalande awui wahomba paka omɛnde kana ɔnangɛso ɔmɔtshi nsala l’etshumanelo. Dui sɔ mbɔtɔnɛka la tɔndɔ diakafunde ɔpɔstɔlɔ Paulo diata ɔnɛ: “Umuntu tshe lalomba, kana lata dui l’ote andi hakumbami, ambonyola ote” ande nɛ dia “ote a wumuntu eli pami.” (1 Kor. 11:3-10) Etena kalɔta kadiyɛso kitambala lo yoho ya dimɛna lo waaso wa ngasɔ, nde mɛnyaka woho wakitanyiyande yɛdikɔ ya teokrasi yendana la lowandji l’atei w’etshumanelo k’Akristo.​—1 Tim. 2:11, 12.a

Ko kayotota dia kadiyɛso kambɔlɔmbama dia nkadimola sawo diasha ɔnangɛso oya l’ɔtɛkɛta w’akanga a mpoke? Lo mɛtɛ, kadiyɛso kɛsɔ ekɔ lo nkonya tsho tokanyi ta ɔnangɛso lasha sawo le akanga a mpoke. Kɛsɔ mɛnyaka dia aha nde mbetsha. Koko, nkadimola oya l’ɔtɛkɛta w’akanga a mpoke ntshikitana la nkadimola oya l’ɛtɛkɛta ekina. L’ɛtɛkɛta watɛkɛtama, ampokami mendaka ɔtɛkɛtshi ndo vɔ mpokamɛka okadimwelo. Lo tena dia ngasɔ, ampokami hawɛnyi tsho akadiyɛso wakadimola, koko vɔ mɛnaka ndo ɔtɛkɛtshi. Lo tena dimɔtshi, vɔ mbeyaka nsɔna dia mbidjasɛ lodjasɛ etena kakadimolawɔ, koko naka vɔ memala, vɔ mbɛlɛka otsha le ɔtɛkɛtshi, koko aha otsha le ampokami. Ɔnkɔnɛ, hatonga ohomba dia paka kadiyɛso ndɔta kitambala.

Lâdiko dia lâsɔ, l’ɔtɛ w’ehamelo wambosalema l’akambo wa tshulatshula wakamba la so etena kakadimɔma sawo l’ɔtɛkɛta w’akanga a mpoke, mbala efula ampokami w’akanga a mpoke mɛnaka paka ɔnɛ lakadimola. Okadimudi tombaka lo televiziɔ ka woke ndo mbala mɔtshi ɔnɛ lasha sawo hɛnama le akanga a mpoke. La awui asɔ lo yimba, ayonga dimɛna dia kadiyɛso kakadimola sawo oya l’ɔtɛkɛta w’akanga a mpoke mbeya ɔkɛndɛ ande wa hende oko wende okadimudi lo ndɔta kitambala.

Ko ngande wendana etshikitanu ɛsɔ la okadimwelo wa otsha l’ɔtɛkɛta w’akanga a mpoke wa asawo wa Kalasa k’olimu wa teokrasi, wɛnyɛlɔ, kɔmatɛrɛ yashama lo Wekelo wa Bible wa l’etshumanelo, asawo wa lo Losanganya l’olimu ndo Wekelo wa Tshoto y’Etangelo? Onde kadiyɛso kakadimola oya l’ɔtɛkɛta w’akanga a mpoke lo waaso asɔ pombaka ndɔta kitambala? Mɛnamaka dia lo waaso amɔtshi, kema ohomba dia paka kadiyɛso ndɔta kitambala nɛ dia ampokami tshɛ mbeyaka dia aha nde mbalɔmbɔla losanganya. Ɛnyɛlɔ, etena kakadimolande kɔmatɛrɛ yasha ampokami, asawo washa akadiyɛso akina kana wɛnyɛlɔ. Koko, etena kakadimolande asawo washa anangɛso, Wekelo wa Tshoto y’Etangelo, Wekelo wa Bible wa l’etshumanelo walɔmbɔla ɔnangɛso kana etena kembande esambo l’ɔtɛkɛta w’akanga a mpoke, kadiyɛso pombaka ndɔta kitambala. Lo losanganya l’otondo, kadiyɛso mbeyaka nɔmbama dia kadimola l’ɔtɛkɛta w’akanga a mpoke dikambo dia anangɛso, akadiyɛso, ana ndo dikumanyi. Lâsɔ ayonga ohomba nde ndɔta kitambala lo losanganya l’otondo.

[Nɔte ka l’ɛse ka dikatshi]